Part 18

Daz smæhen daz vrou Lûnete dem herren Îweine tete, daz gæhe wider kêren, der slac sîner êren, daz sî sô von ime schiet daz si in entrôste noch enriet, daz smæhlîche ungemach, dazs im an die triuwe sprach, 10 diu versûmde riuwe und sîn grôziu triuwe sînes stæten muotes, diu verlust des guotes, der jâmer nâch dem wîbe: die benâmen sîme lîbe beide vreude unde den sin. nâch eime dinge jâmert in, daz er wære etswâ daz man noch wîp enweste wâ 20 und niemer gehôrte mære war er komen wære. Er verlôs sîn selbes hulde: wan ern mohte die schulde ûf niemen anders gesagen: in het sîn selbes swert erslagen. ern ahte weder man noch wîp, niuwan ûf sîn selbes lîp. er stal sich swîgende dan (daz ersach dâ nieman) unz er kom vür diu gezelt ûz ir gesihte an daz velt. dô wart sîn riuwe alsô grôz daz im in daz hirne schôz ein zorn unde ein tobesuht, 10 er brach sîn site und sîne zuht und zarte abe sîn gewant, daz er wart blôz sam ein hant. sus lief er über gevilde nacket nâch der wilde. Dô diu juncvrouwe gereit, dô was dem künege starke leit hern Îweines swære, und vrâgte wâ er wære (er wold in getrœstet hân) 20 unde bat nâch ime gân. und als in nieman envant, nû was daz vil unbewant swaz man ime dâ gerief, wander gegen walde lief. er was ein degen bewæret und ein helt unerværet: swie manhaft er doch wære und swie unwandelbære an lîbe unde an sinne, doch meistert vrou Minne daz im ein krankez wîp verkêrte sinne unde lîp. der ie ein rehter adamas rîterlîcher tugende was, der lief nû harte balde ein tôre in dem walde. Nû gap im got der guote, 10 der in ûz sîner huote dannoch niht volleclîche enliez, daz im ein garzûn widerstiez, der einen guoten bogen truoc: den nam er im und strâlen gnuoc. als in der hunger bestuont, sô teter sam die tôren tuont: in ist niht mêre witze kunt niuwan diu eine umbe den munt. er schôz prîslichen wol: 20 ouch gienc der walt wildes vol: swâ daz gestuont an sîn zil, des schôz er ûz der mâze vil. ouch muose erz selbe vâhen, âne bracken ergâhen. sone heter kezzel noch smalz, weder pfeffer noch salz: sîn salse was diu hungernôt, diuz im briet unde sôt daz ez ein süeziu spîse was und wol vor hunger genas. Dô er des lange gepflac, er lief umb einen mitten tac an ein niuweriute. dane vander nie mê liute wan einen einigen man: 10 der selbe sach im daz wol an daz er niht rehtes sinnes was. der vlôch in, daz er genas, dâ bî in sîn hiuselîn. dane wânder doch niht sicher sîn unde verrigelt im vaste de tür: dâ stuont im der tôre vür. der tôre dûht in alze grôz: er gedâhte ‘tuot er einen stôz, diu tür vert ûz dem angen, 20 und ist um mich ergangen. ich arme, wie genise ich?’ ze jungest dô verdâhter sich ‘ich wil im mînes brôtes gebn: sô lât er mich vil lîhte lebn.’ Hie gienc ein venster durch die want: dâ durch rahter die hant und leit im ûf ein bret ein brôt: daz suozt im diu hungers nôt; wand er dâ vor, daz got wol weiz, sô jæmerlîches nie enbeiz. waz welt ir daz der tôre tuo? er az daz brôt und tranc dâ zuo eines wazzers daz er vant in einem einber an der want, unde rûmtez im ouch sâ. der einsidel sach im nâ und vlêget got vil sêre 10 daz er in iemer mêre erlieze selher geste; wand er vil lützel weste wie ez umbe in was gewant. nu erzeicte der tôre zehant daz der tôre und diu kint vil lîhte ze wenenne sint. er was dâ zuo gnuoc wîse daz er nâch der spîse dar wider kom in zwein tagen, 20 und brâhte ein tier ûf im getragen und warf im daz an die tür. daz machte daz er im her vür deste willeclîcher bôt sîn wazzer unde sîn brôt: erne vorht in dô niht mê und was im bezzer danne ê, und vant ditz ie dâ gereit. ouch galt er im die arbeit mit sînem wiltpræte. daz wart mit ungeræte gegerwet bî dem viure. im was der pfeffer tiure, daz salz, unde der ezzich. ze jungest wenet er sich 10 daz er die hiute veile truoc, unde kouft in beiden gnuoc des in zem lîbe was nôt, salz unde bezzer brôt. Sus twelte der unwîse ze walde mit der spîse, unze der edele tôre wart gelîch eim môre an allem sîme lîbe. ob im von guotem wîbe 20 ie dehein guot geschach, ob er ie hundert sper zebrach, gesluoc er viur ûz helme ie, ob er mit manheit begie deheinen loblîchen prîs, wart er ie hövesch unde wîs, wart er ie edel unde rîch: dem ist er nû vil ungelîch. Er lief nû nacket beider, der sinne unde der cleider, 30 unz in zeinen stunden slâfende vunden drie vrouwen dâ er lac, wol umb einen mitten tac, nâ ze guoter mâze bî der lantstrâze diu in ze rîten geschach. und alsô schiere do in ersach diu eine vrouwe von den drin, dô kêrte sî über in und sach in vlîzeclîchen an. 10 nû jach des ein ieglich man wie er verlorn wære: daz was ein gengez mære in allem dem lande: und daz sî in erkande, daz was des schult; und doch niht gar, sî nam an im war einer der wunden diu ze manegen stunden an im was wol erkant, 20 unde nande in zehant. Sî sprach her wider zuo den zwein ‘vrouwe, lebt her Îwein, sô lît er âne zwîvel hie, oder ichn gesach in nie.’ Ir höfscheit unde ir güete beswârten ir gemüete, daz sî von grôzer riuwe und durch ir reine triuwe vil sêre weinen began, 30 daz eim alsô vrumen man diu swacheit solte geschehn daz er in den schanden wart gesehn. Ez was diu eine von den drin der zweier vrouwe under in: nû sprach sî zuo ir vrouwen ‘vrouwe, ir mugt wol schouwen daz er den sin hât verlorn. von bezzern zühten wart geborn nie rîter dehein danne mîn her Îwein, den ich sô swache sihe lebn. 10 im ist benamen vergebn, ode ez ist von minnen komen daz im der sin ist benomen. und ich weiz daz als mînen tôt daz ir alle iuwer nôt, die iu durch sînen übermuot der grâve Âliers lange tuot und noch ze tuonne willen hât, schiere überwunden hât, ober wirdet gesunt. 20 mir ist sîn manheit wol kunt: wirt er des lîbes gereit, er hât in schiere hin geleit: und sult ir ouch vor ime genesn, daz muoz mit sîner helfe wesn.’ Diu vrouwe was des trôstes vrô. sî sprach ‘unde ist der suht also daz sî von dem hirne gât, der tuon ich im vil guoten rât, wand ich noch einer salben hân die dâ Feimorgân machte mit ir selber hant. dâ ist ez umbe sô gewant daz niemen hirnsühte lite, wurd er bestrichen dâ mite, 10 erne wurde dâ zestunt wol varende unde gesunt.’ sus wurden sî ze râte und riten alsô drâte nâch der salben alle drî: wand ir hûs was dâ bî vil kûme in einer mîle. nû wart der selben wîle diu juncvrouwe wider gesant, diu in noch slâfende vant. 20 Diu vrouwe gebôt ir an daz lebn dô sî ir hâte gegebn die bühsen mit der salben, daz si in allenthalben niht bestriche dâ mite wan dâ er die nôt lite, dâ hiez sî sî strîchen an: so entwiche diu suht dan, under wær zehant genesn. dâ mite es gnuoc möhte wesn, daz hiez sî an in strîchen; und daz si ir nämelîchen bræhte wider daz ander teil: daz wære maneges mannes heil. ouch sante sî bî ir dan vrischiu kleider, seit von gran und cleine lînwât, zwei, schuohe und hosen von sei. 10 Nû reit sî alsô balde, daz sî in in dem walde dannoch slâfende vant, und zôch ein pfert an der hant, daz vil harte sanfte truoc (ouch was der zoum rîche gnuoc, daz gereite guot von golde), daz er rîten solde, ob ir daz got bescherte daz sî in ernerte. 20 Dô si in ligen sach als ê, nûne tweltes niuwet mê, sî hafte zeinem aste diu pfert beidiu vaste, und sleich alsô lîse dar daz er ir niene wart gewar. mit ter vil edelen salben bestreich si in allenthalben über houpt und über vüeze. ir wille was sô süeze daz sî daz alsô lange treip unz in der bühsen niht beleip. des wær doch alles unnôt, dâ zuo und man irz verbôt; wan daz si im den willen truoc, esn dûhtes dannoch niht genuoc, 10 und wær ir sehsstunt mê gewesn: sô gerne sach sî in genesn. Und dô siz gar an in gestreich, vil drâte sî von im entweich, wand sî daz wol erkande, daz schemelîchiu schande dem vrumen manne wê tuot, und barc sich durch ir höfschen muot, daz sî in sach und er sî niht. sî gedâhte ‘ob daz geschiht 20 daz er kumt ze sinnen, und wirt er danne innen daz ich in nacket hân gesehn, sô ist mir übele geschehn: wan des schamt er sich sô sêre dazer mich nimmer mêre willeclichen an gesiht.’ alsus enoucte sî sich niht unz in diu salbe gar ergienc und er ze sinnen gevienc. Dô er sich ûf gerihte und sich selben ane blihte und sich sô griulîchen sach, wider sich selben er dô sprach ‘bistuz Îwein, ode wer? hân ich geslâfen unze her? 10 wâfen, herre, wâfen, sold ich dan nimmê slâfen! wand mir mîn troum hât gegebn ein vil harte rîchez lebn. Ouwî waz ich êren pflac die wîl ich slâfende lac! mir hât getroumet michel tugent: ich hete geburt unde jugent, ich was schœne unde rîch und diseme lîbe vil unglîch; 20 ich was hövesch unde wîs und hân vil manegen herten prîs ze rîterschefte bejagt, hât mir mîn troum niht missesagt. ich bejagte swes ich gerte mit sper und mit swerte: mir ervaht mîn eines hant ein schœne vrowen, ein rîchez lant; wan daz ich ir doch pflac, sô mir nû troumte, unmanegen tac, unze mich der künec Artûs von ir vuorte ze hûs. mîn geselle was her Gâwein, als mir in mîme troume schein. 10 sî gap mir urloup ein jâr (dazn ist allez niht wâr): do beleip ich langer âne nôt, unz sî mir ir hulde widerbôt: die was ich ungerne âne. in allem disem wâne sô bin ich erwachet. mich hete mîn troum gemachet zeime rîchen herren. nû waz möhte mir gewerren, 20 wær ich in disen êren tôt? er hât mich geffet âne nôt. swer sich an troume kêret, der ist wol gunêret. Troum, wie wunderlich dû bist! dû machest rîche in kurzer vrist einen alsô swachen man der nie nâch êren muot gewan: swenner danne erwachet, sô hâstû in gemachet zeime tôren als ich. zwâre doch versihe ich mich, 10 swie rûch ich ein gebûre sî, wær ich rîterschefte bî, wær ich gewâfent unde geriten, ich kund nâch rîterlîchen siten alsô wol gebâren als die ie rîter wâren.’ Alsus was er sîn selbes gast, daz im des sinnes gebrast: und ober ie rîter wart und alle sîn umbevart 20 die heter in dem mære alss im getroumet wære. er sprach ‘mich hât gelêret mîn troum: der bin ich gêret, mac ich ze harnasche komen. der troum hât mir mîn reht benomen: swie gar ich ein gebûre bin, ez turnieret al mîn sin. mîn herze ist mîme lîbe unglîch: mîn lîp ist arm, mîn herze rîch. ist mir getroumet mîn lebn? ode wer hât mich her gegebn sô rehte ungetânen? ich möhte mich wol ânen rîterlîches muotes: 10 lîbes unde guotes der gebrist mir beider.’ als er diu vrischen cleider einhalp bî im ligen sach, des wuudert in, unde sprach ‘ditz sint cleider der ich gnuoc in mîme troume dicke truoc. ichn sihe hie niemen des sî sîn: ich bedarf ir wol: nû sints ouch mîn. nû waz ob disiu sam tuont? 20 sît daz mir ê sô wol stuont in mîme troume rîch gewant.’ alsus cleiter sich zehant. als er bedahte de swarzen lîch, dô wart er eime rîter glîch. Nu ersach diu juncvrouwe daz daz er unlasterlichen saz: sî saz in guoter kündekheit ûf ir pferit unde reit, als sî dâ vür wære gesant und vuorte ein pfert an der hant. weder si ensach dar noch ensprach. dô er sî vür sich rîten sach, 10 dô wærer ûf gesprungen, wan daz er was bedwungen mit selher siecheite daz er sô wol gereite niht ûf mohte gestân sô er gerne hete getân, unde rief ir hin nâch. dô tete sî als ir wære gâch und niht umb sîn geverte kunt, unz er ir rief anderstunt. 20 dô kêrte sî sâ unde antwurt ime dâ. sî sprach ‘wer ruofet mir? wer?’ er sprach ‘vrouwe, kêret her.’ sî sprach ‘herre, daz sî.’ sî reit dar, gehabt im bî. sî sprach ‘gebietet über mich: swaz ir gebietet, daz tuon ich,’ und vrâget in der mære wie er dar komen wære. Dô sprach her Îwein als ez ouch wol an im schein ‘dâ hân ich mich hie vunden des lîbes ungesunden. ichn kan iu des gesagen niht welch wunders geschiht mich dâ her hât getragen: 10 wan daz kan ich iu wol gesagen daz ich hie ungerne bin. nû vüeret mich mit iu hin: sô handelt ir mich harte wol, und gedienez immer als ich sol.’ ‘rîter, daz sî getân. ich wil mîn reise durch iuch lân: mich het mîn vrouwe gesant. diu ist ouch vrouwe über ditz lant: zuo der vüer ich iuch mit mir. 20 ich râte iu wol daz ir geruot nâch iuwer arbeit.’ sus saz er ûf unde reit. Nû vuorte sî in mit ir dan zuo ir vrouwen. diu nie man alsô gerne gesach. man schuof im guoten gemach von cleidern spîse unde bade, unz daz im aller sîn schade harte lützel an schein. hie het her Îwein sîne nôt überwunden unde guoten wirt vunden.