Part 3
Il n'est pas plus grant que le pied d'une mulle/ et si en enchasse l'en bien cent bestes hors de leur pasture.
Response.
C'est un pigne qui abat les poulz des cheveulx.
Demande.
De quoy a y le plus a paris et si y pert le moins.
Response.
Ce sont les pas des gens.
Demande.
De quel mestier a il le plus de gens a paris.
Response.
Des vuydeurs d'escuelles.
Demande.
Dedens paris a une chose. Qui droit ou milieu est enclose Qui tient le roy de france en guerre. Encontre cellui d'angleterre. Et se ne l'en puet nulz hors traire. Se tout paris ne veult deffaire.
Reponse.
Ostez .R. de paris. ce sera pais.
Demande.
Quele chose est ce qui soustendroit bien cent muis de paille/ et si ne soustiendroit pas une maille.
Response.
C'est l'eaue.
Demande.
Il est a la table et sy ne le mengue on mie/ et ens ou feu/ et si ne brule mie. et si va en l'eaue et si ne noye mie.
Response.
C'est le soleil.
Demande.
Quant il est jone c'est il. et quant il est viel c'est elle.
Response.
C'est la lune.
Demande.
Qui est la chose qui donne ce qu'elle n'a mie.
Response.
C'est une queux qui donne taillant au coutel qu'elle n'a pas.
Demande.
Quelle est la chose quant plus la boute l'en et mains y entre.
Response.
C'est la main qui entre en un gand.
Demande.
Blanc est le champ. noire est la semence. L'omme qui le semme. est de tres grant science.
Response.
C'est papier et enchre. et le clerc qui escript.
Demande.
Comment qu'il viengne ne qu'il voit. il fault tenir le cul a droit.
Response.
C'est une aguille qu'on enfile.
Demande.
Entre deux jambes le vif amble entre deux fesses. le vif tremble. Et quant il vient a la porte. son mastre busque.
Response.
C'est ung chevalier monté sur une haghenee.
Demande.
Pourquoy becque le coq en la paille.
Response.
Pour ce qu'il n'y puet mordre.
Demande.
Quel oysel est ce qui donne lait et sy vole en l'air.
Response.
C'est une chauvesoiris.
Demande.
Vint asne en un pré. vint asne a l'ostel. et vint asne a l'estable. quantes oreilles ont ilz quant il sont ensemble.
Response.
Il n'en a que deux. car il n'y a que un asne.
Demande.
Quelle chose est ce qui a les piez desseure et les genoulz dessoubz.
Response.
C'est une femme enchainte de vif enfant.
Demande.
Il est court et gros. Et si n'a nulz os. Et si ne voit goutte. Et quant vient ou trou. Dedens il se boute.
Response.
C'est un taulpe
Demande.
Qui est la beste qui a sa teste entre ses jambes.
Response.
C'est un chat qui lesche son cul sauve honner.
Demande.
Petite suis ne suis pas forte. Ne puis aler s'on ne me porte. Maintes gens sont en mon dangier. Duc. Conte. prince. et chevalier. Et se n'estoit par mon exploit. Bien croy qu'ilz morroient de froit.
Response.
C'est une aguille.
Demande.
La plus tresbelle fleur d'esté. Je vous ay de si prez esté. Que se mon viz fust embrasé. Vostre barbe eusse bien brulé.
Response.
C'est un homme qui baisa une rose.
Demande.
Une chose entra en la ville. a .viii. piez et a six oreilles. Trois culz et aussi une queue. Qui est chose bien merveilleuse
Response.
Ce sont deux hommes sur un cheval.
Demande.
Adevinés que c'est. quant on le boute/ il reboute et quant on le sacque il degoute.
Response.
C'est un asperge.
Demande.
Adevinés qui est la chose qui fut deux fois nee sans baptisier et pour les pecheurs au feu rostie et brulee.
Response.
C'est ung chapon.
Demande.
Quele chose est ce qui oncques ne fut ne ja ne sera et si les voiez tous les jours.
Response.
Ce sont les dois de vostre main que jamais ne seront aussy longs l'un comme l'autre.
Demande.
Je mis mon pied contre son pied/ et mon ventre contre son ventre/ et mon pendu en son fendu. et quant il fut ens il hallotta
Response.
C'est une huche qu'on euvre d'une clef.
Demande.
Il ne ot ne voit. mengue ne boit et qui le metteroit en exploit/ il orroit verroit beuveroit mengeroit/ et telement chanteroit que le dormant esveilleroit.
Response.
C'est un oef. car qui le metteroit couver il en isteroit un coq qui chanteroit.
Demande.
En bois naist/ en pré paist. femme le fille et fevre le fait/ si vole en l'air comme un oysel et fent en terre comme un pourcel.
Response.
C'est une flesche empennee et enferee.
Demande.
Adevinez lequel ostil de l'ostel est le plus sot.
Response.
C'est un tamis qui donne la farine et retient pour lui le son.
Demande.
Adevinez qui est l'ostil en l'ostel le plus sage.
Response.
C'est le van qui retient le pur fourment et il met hors la paille et l'ordure.
Demande.
Adevinez que c'est quant on le boute par le queue il brait par le pied.
Reponse.
C'est un molin a vent.
Demande.
Adevinez que c'est qui n'est pas si grant que le pied d'une geline et s'en garderoit on bien l'avoir d'une royne.
Response.
C'est une clef.
Demande.
Adevinés que c'est quant il naist il brait/ et quant il est nez il se taist
Response.
C'est le hault vent issant du trou sur quoy on siet.
Demande.
Seriette va par chambre. Et si n'a ne pied ne jambe. Et quant elle est hors on le nye Et s'abruve la compaignie.
Response.
C'est une vesse.
Demande.
Dequoy a le connin plusgrant peur.
Response.
C'est d'un homme qui a grise barbe.
Demande.
Il est deux fois nez et housez et esperonnez et s'a une creste que un chascun voit.
Response.
C'est un cok. car il fut oef premiers et puis coq aprés.
Demande.
Saluez moy cellui que j'ayme que je ne cognoy point et vous le cognoissiez si ne le veistes oncques
Response
C'est vostre cuer que je ne congnoy point. Et vous ne le veistes oncques/ et si le cognoissiez bien
Demande.
Adevinez que c'est/ cellui qui le vent en est joyeux/ et cellui qui l'achate en est courrouchiez/ et cellui qui en besoingne le met n'en scet riens.
Response.
C'est un luysel.
Demande.
Comment donneriez vous a vostre dame par amours une pomme au jour d'huy qui demain seroit cuellie.
Response.
On ne cueille nulles pommes que de main.
Demande.
De cinquante ostez ent cent. Ilz en seront plus bel et gent. Et si en vauldront plus d'argent.
Response.
Faittes de .l. coqs des cappoons
Demande.
Je pensse et si pourpense et penser me couvient. combien celle ne m'appartient. qui est fille de mon tayon et si n'est point ma tante.
Response.
C'est ma mere.
Demande.
Pourquoy vont les gens au moustier.
Response.
Pour ce que le moustier ne puet venir a eulx.
Demande.
Comment feroit on ce que dieu ne puet faire.
Response.
Ce seroit de parler a plusgrant de lui ce que dieu ne fist oncques
Demande.
Comment envoyeriez vous a vostre dame par amours un poisson de toutes eaues. en un plat de toutes fleurs par un homme de tous consaulx.
Response.
Je lui envoyeroie un saulmon en un plat de cire par prestre confesseur.
Demande.
Monseigneur et madame un estre ont.
Response.
Ilz ont un jardin.
Demande.
Desquelz piez a il le plus en la riviere.
Response.
Des mouilliez.
Demande.
Je vis un chevalier. Qui fist un sault hier. Et s'estoit filz de jument.
Response.
C'estoit ung cheval que hier avoit veu faire un sault.
Demande.
Je vis un escuier qui point n'estoit homme.
Response.
C'estoit un escu d'armes.
Demande.
Trois moisnes passoient. Trois poires pendoient. Chascun en prist une. Et s'en demoura deux.
Response.
L'un des moisnes avoit nom chascun.
Demande.
Je vous demande se oncques veistes le prestre sursemé.
Response.
Oyl quant il est sur un champ nouvel semé.
Demande.
Quelle beste est ce qui tousjours va/ et jamais lieue ne fera.
Response.
C'est un lymaçon.
Demande.
Quele chose est ce qui a deux dos et si n'a que un ventre.
Response.
C'est un soufflet.
Demande.
Quele chose est ce qui a trois piez et une queue et si ne puet aler avant.
Response.
C'est un gril.
Demande.
Quele chose est ce qui toute jour va sur l'espinotte et si ne deschire point sa cotte.
Response.
C'est le soleil.
Demande.
Quele chose est ce qui a les dens sur le dos.
Response.
C'est une crameillie.
Demande.
Quele chose est ce qui a dens sans teste et queue sans cul.
Response.
C'est un rastel.
Demande.
Deux qui couroient. et dix qui les chassoient. deux qui les regardent/ et un qui leur fait la moe
Response.
Ce sont deux poux qui sont ou sain d'une personne et les deux yeux les regardent. et les dix dois qui les chassent. et cellui qui les tue leur fait la moe.
Demande.
Dix tirans et quatre pendans et cul aval/ et cul amont. et cul a terre beaux sire dieux que puet ce estre.
Response.
C'est une vache. et une femme qui le trait.
Demande.
Quele chose est ce qui n'a ne char ne os ne sang et s'appelle biens les gens.
Response.
C'est une cloche quant on le sonne.
Demande.
Qu'esse qu'on jette par dessus la maison et si en retient on bien la queue
Response.
C'est un loissel de fil.
Demande.
Quele chose est ce qui est la plusfiere du monde.
Response.
C'est un estront qui court au fil de l'eaue car il ne s'aresteroit point pour le pape.
Demande.
Adevinez quele chose fait de cest heure le plusjone de paris.
Response.
Il envieillist.
Demande.
Huy est/ demain ne sera mie/ et a la sainct jehan mengera des cherises.
Response.
C'est une espousee qui est pucelle. et demain ne le sera pas.
Demande.
J'ay mon poing plain de vergellettes. Qui ne sont. verdes ne seches.
Response.
Ce sont anneaux d'or en ses dois
Demande.
Emmy les champs a quatre soeurs. qui courent aussy fort l'une comme l'autre et si ne pevent rataindre l'une l'autre.
Response.
Ce sont les quatre volans d'un molin a vent.
Demande.
Moins en y a et plus poise.
Response.
C'est le corps d'un homme quant l'ame en est hors.
Demande.
Quele chose est ce qui va et sa mere n'ala oncques.
Response.
C'est un ver nourri en la feve ou en une noix.
Demande.
Adevinez que c'est que plus est jone et plus est grant.
Response.
C'est un frommage.
Demande.
De queles fueilles a il le plus au bois.
Response.
De celles qui ont queue.
Demande.
Adevinez que c'est. Avan piez.
Response.
Nennil. il n'en a nulz.
Demande.
Quele chose est ce comme plus a de trous et plus poise.
Response.
C'est un haubergon.
Demande.
Quele chose est ce qui va le plus droit ou milieu du bois.
Response.
C'est la moele.
Demande.
Pour quoy va le bergier au buisson.
Response.
Pour ce que le buisson ne puet venir a lui.
Demande.
Qui est la chose que plus est petite et plus la redoubte on.
Response.
C'est une planche dessus un parfont fossé.
Demande.
En quelle saison de l'an porte l'oye plus de plumes.
Response.
C'est quant le gars est dessus elle.
Demande.
Lesqueles brebis sont ce qui plus menguent ou les blanches ou les noires.
Response.
Ce sont les blanches. car il en est plus que de noires.
Demande.
Cognoisteriez vous bien un oef d'une noire geline.
Response.
Oyl. car un oef n'est pas une geline.
Demande.
Veistes vous oncques un four a cheval.
Response.
Oyl. quant je chevauchoie par devant un four.
Demande.
De quele chose est le prestre eschars aux riches et large aux povres.
Response.
C'est d'eaue benoite. car le prestre en donne pou aux riches et largement aux povres.
Demande.
Quele chose est ce que j'ay. vous en avez. les bois/ les herbes. les bestes. les oyseaux. et toutes les choses du monde en ont/ et mesmes les poissons qui noent.
Response.
C'est l'ombre.
Demande.
Qui est la plus douce plume du monde.
Response.
C'est celle d'un estront musy.
Demande.
Locquette siet a la paroit. Se vous y mettiez vostre doit. Sachiez qu'elle vous morderoit.
Response.
Ce sont pignes a pignier laine.
Demande.
Qui est la terre burelure. Com plus y pleut et plus est dure plus y fait chault et plus est molle. et plus y vente et plus s'en volle.
Response.
C'est sablon.
Demande.
Quele chose est ce dont il fault plus a un que a deux.
Response.
C'est d'eaue en un baing.
Demande.
Pour quoy sault le lievre le fossé.
Response.
Pour ce qu'il ne le puet engamber.
Demande.
Quantes queues de veel fauldroit il pour avenir au ciel.
Response.
Une seule mais qu'elle fust longue assez.
Demande.
Quele chose de l'ostel est le plus sage.
Response.
C'est un van qui retient le meilleur grain.
Demande.
Qu'esse qui est ars avant qu'il viengne au feu.
Response.
C'est un arc a main.
Demande.
Pourquoy gist la vache ou pré.
Response.
Pour ce qu'elle ne s'y puet seoir.
Demande.
Qui est la plus large eaue du monde et la moins parfonde.
Response.
C'est la rousee.
Demande.
Quele chose est ce qui est trop estroite pour un. bien a point pour deux. et trop large pour trois.
Response.
C'est quant aucun a courroux au cuer il lui est trop estroit pour lui seul. et quant il le dist a son compaignon il lui est plus a point mais quant le tiers le scet c'est trop large.
Demande.
Quele chose est ce quant les ennemis entrent en une maison pour prendre l'oste/ la maison ist hors par les fenestres.
Response.
C'est un pescheur qui prent le poisson hors d'une nasse l'eaue qui est la maison du poisson ist hors par les pertuis de la nasse.
Demande.
Adevinez que c'est avant que le pere soit nez sa fille est dessus la maison.
Response.
C'est le feu que avant qu'il soit alumez la fumiere qui est sa fille est au dessus de la cheminee.
Demande.
Adevinez que c'est noirot sur tripot et rougot lui bat le cul.
Response.
C'est un noir pot sur un treppié et le feu dessobz.
Demande.
Je vis aler gens emmy les champs qui n'estoient filz ne d'hommes ne de femmes.
Response.
C'estoient filles.
Demande.
Mon pere et ma mere ont un enffant et si n'est mon frere ne ma seur.
Response.
Ce suis je mesmes.
Demande.
Un enfant porta ma mere. Qu'en elle engendra mon pere. Et si n'est son filz ne mon frere
Response.
C'est ma seur.
Demande.
Quele femme esse qui plus a affaire que dix autres et si ne fait riens
Response.
C'est une femme enchainte d'enffant/ et les autres dix ne le sont pas.
Demande.
Adevinez que c'est qui est sur sa mere/ et est en sa femme et mengue son pere.
Response.
C'est un prestre qui est en une eglise qui est sa femme il est sur terre qui est sa mere/ et mengue dieu qui est son pere.
Demande.
Adevinez quele chose c'est/ quant en hault monta son nom porta/ quant il descendi son nom perdi.
Response.
C'est bled quant on le porte amont pour mouldre c'est bled/ et quant il descend c'est farine.
Demande.
Adevinez que c'est ilz sont trois. l'un vient et va. l'autre tourne/ et le tiers tire la langue.
Response.
C'est une femme qui file l'une des mains tourne le fuiseau/ l'autre va et vient. et quant elle mouille son lin elle tire la langue.
Demande.
Adevinez que c'est qui pent et se tent. et le rouge blicque blacque qui tout droit au cul li frappe. se fait remouvoir chou de dens.
Response.
C'est un pot qui pent/ et boult sur le feu. et le flambe qui au cul lui frappe
Demande.
Quele chose est ce qui a gheule d'os. et barbe de char et par nuit jette un si hault cry qu'il fait entrer les blans vestus ou ventre de leur mere/ dont jamais n'en vuident qu'ilz n'aient mengié leur pere.
Response.
C'est un cok. qui a bec d'os. barbe de char. qui chante de nuit pour le cry du quel les blans moisnes se lievent et entrent en l'eglise qui est le ventre de leur mere. et illec celebrent et menguent leur pere nostre sauveur jhesucrist.
A ce point dist l'un de mes compaignons. Puis mes bonnes meres. et vous jones filles que le cok a chanté qui est enseigne de minuit affin aussy que ne soions rencontrez du loup garou ne des fuirolles qui vont de nuit. et que puissiez aler reposer nous prenderons de vous congié pour ceste fois/ et nous pardonnez que sy rondement avons devisé. car il est mardi et le jour sent aincoires les grasses trippes.
Mais demain ou jeudi au plus loing nous retournerons se c'est vostre plaisir atout autre marchandise d'amours que avons a vendre. non pas pour argent/ mais a change l'une marchandise pour l'autre. et atant nous departismes.
Le jeudi aprés soupper pour entretenir la promesse que avions faite aux jones filles de retourner vers elles atout nostre amourese marchandise nous meismes a chemin affin aussi de oyr d'elles aucune joyeuseté pour passer les longues nuis et le temps plus joyeusement que a pluseurs est moult ennuyable et desplaisant pour les mutacions qui se font de present en ces marches par deça par la premission divine/ ausqueles qui tousjours y penseroit jamais fin ne la cause pourquoy ce se fait ne trouveroit. Si le delaissons en dieu et en sa disposicion et penssons de distribuer nostre marchandise en tel change que prouffiter puissent les deux parties en tout bien et honneur tant les vendeurs comme les acheteurs.
Nous doncques arrivez en la maison ou l'assamblee de la serie se faisoit saluames la compaignie laquele nous receut assez agreablement en nous rendant nostre salut et aprés que fulmes assiz chescun en son entretenement. L'une et la plus vielle qui autresfois avoit esté ferue de la maladie de jalousie regarda sur moy qui assez estoie venus sur l'eage et me dist en tele maniere.
Sire grison je vous vens des sores harens.
Je simplement demanday combien.
Elle me respondy. Je vous ay aussi chier hors que ens.
Moy un petit esbahy de prime face de ce privé congié et non sans cause me commençay a pensser que j'avoie a dire attendu que je venoie pour vendre/ et je fus constrains d'acheter. mais un pou revenu a moy. et pensant que c'estoit la coustume des femmes de prevenir. Je passay assez courtoisement et lui mis audevant a vente la piece contre le trou et lui dis
Dame je vous vens la france ortie
Combien vault elle.
Elle picque point et fremie. et est plaine de jalousie. de son amour ne veuil je point. mais prie a dieu qu'il le vous doinst.
Tantost mes compaignons et pareillement les jones filles commencerent a desploier leurs marchandises et vendoient l'un a l'autre pelle mesle qui en peust avoir si en eust/ en la maniere qui s'ensieut et que j'en peus retenir. et mettre en memoire. Car oncques puis que me trouvay repudié et rebouté de la matrone je n'eus cuer de riens vendre ne d'acheter ains laissay couvenir les plus jones et me occuppay a escripre leurs joyeux dis et esbatemens en la maniere qui s'ensieut.
L'une des vielles vendi a un des nostres l'amour des hommes et dist
Gentil galant je vous vens l'amour des hommes.
Queles sont elles.
Elles sont fausses comme escume Et legieres comme la plume. volantes comme arondele. et tournoyant comme chandeille. Secretes comme la bretesche. Et durant comme flamesche.
Un autre dit.
Je vous vens l'ave maria. mon cuer est mien et nul ne l'a. et se donner je le voloie. point n'estes a qui le donrroie.
Je vous vens le gris cheval. mon cuer au vostre n'est egal. Car il aime tresloyaument. et le vostre tresfausement.
Je vous vens du soile l'espis. vous me baiserez se je ris. Mais pour ce que je ne ris mie. Certes vous ne me baiserez mie.
Dist une bonne galoise a son amoureux.
Je vous vens mon fuiselet. Il ne me chault se perdu est. Car j'entens plus a bien amer. Qu'a retordre ne qu'a filer.
Je vous vens le fuiseau d'argent vous avez le corps bel et gent. Je vous prie ne pensez mie. Que le dye par flaterie.
Je vous vens la fleur du bleu glay J'ay amé aime et aimeray. Malgré mesdisans plains de nuie Car en amours a douce vie.
Je vous vens le chapeau de flours il fut fait par fines amours. Mais nul ne le prengne a porter. Se loyaument ne veult amer. Car sachiez bien s'autre le porte. Sa couleur se change et transporte
Je vens ce que nulz ne puet faire Vivant en l'amoureux affaire. Amours garder sans courrouchier Et sens de femme sans changier
Je vous vens le milieu des yeulx Se il estoit et temps et lieux. Que fussions seulz entre nous deux Se vostre amour vous requeroie. Dittes moy sy vous ayde dieux. Sans mentir se je le auroye.
Dames je vous veuil vendre. Le gent cor d'oliffant. Amours par tout son regne. A fait crier son bant. Que dames et pucelles. Et tout loyal amant. Se ayent pourveu. De ce jour en avant. Leurs cuers de loyauté. Encontre faulz semblant. Qui entre les amans. Se va atapissant. Parquoy de leurs propos. Ne les voist essongant.
Je vous vens le rain d'olivier. Par dessus a un esprivier. Q'une dame y fait atachier. Pour les fins amans espier. Et dist qu'il ne s'en bougera. Jusques a dont que cilz vendra. Que oncques amours ne faussa.
Je vous vens la fleur gyrofflee En amours a mainte penssee. Quant je ne voy mon doulz ami Je vouldroie qu'il fust icy. Si vous prie que se le veez. que de par moy le saluez.
Je vens la rose vermeillette. qui bien liroit en se fueillette. Il trouveroit en bonne lettre. que damoiselle qui bien aime. en grant deduit sa vie maine.
Je vous vens le vert papegault d'amer loyaument ne me chault. Car on voit tout appartement. que qui bien aime loyaument. Il est quetif certainement.
Je vous vens le perle doré. amours m'ont dit et accusé. que vous avez vo temps usé. a faire pou de loyauté. a celles que vous avez aimé.
Je vous vens l'erbe qui verdoie. volentiers certes ameroie. se homme trouver je povoie. en qui je m'osaisse fier. mais leur cuer fault pour pou de chose. pourquoy en eulx fier ne m'ose. et que ne me face mocquier.
Je vous vens de fer le dou. vostre amie vous aime pou. se vous l'amez c'est sans partie. deportez vous ent je vous pris.
Chascun vous vent et le voy bien tenez vo cuer et je tendray le mien car se donné le vous avoie. bien croy que m'en repentiroie.
Je vous vens le paveillon noir en semblant de grant vouloir. se doit doloir toute sa vie. qui oncq n'eut joye de s'amie. si me doy dont bien dolouser. Car oncques n'eus joye en amer.
Je vous vens le dragon volant vo simple et gracieux semblant. de grant sens et beauté garny. m'a si navré en regardant. que je ne sçay s'il me feri. vous ressemblez a l'ayment. qui le dur fer attrait a lui/ Car vous avez en soubz riant. par mon costé mon cuer ravi.
Je vous vens le roussignoullet. j'ay veu le temps autre qu'il n'est. qui mieux valoit moins se prisoit et souffissoit qu'on le louoit. Or est le temps d'une autre guise. Car qui le moins vault plus se prise
Je vous vens la verde amande vostre ami a vous recommande. et autant de salus vous mande. Qu'il en pourroit en une mande/ de goutes d'eaue de fontaine. avant que la mande fust plaine.
Je vous vens la noire pye. d'amer ne me depriez mie. que je ne vous ameroie mie. car vous avez l'ueil trop gaillart se m'ariez tost mis d'une part.
Je vous vens une patenostre. mon cuer est mien et non par vostre et savez vous pour quel raison. Je l'ay mis en meilleur maison.
Je vous vens le col d'un cyne. amours qui mon cuer enlumine. de vostre bel et noble a tour. dont je ne cesse ne ne fine. a vous pensser et nuit et jour. car la couleur avez si fine. et de toute beauté la flour. vo doulz regard est medicine. pour moy garir de ma langour.
Je vous vens la gente soussie. elle est belle et s'est jolie. et moult fait le flair a loer. l'omme qui joist de s'amie. le puet honnestement porter.
Je vous vens du chesne la fueille je prie au dieu d'amours qu'il veuille dedens vo cuer mettre et escrire. ce que le mien pense et desire.
Je vous vens quatre pucellettes elles tissent amourettes. dedens un joly vergier. les roses et les violettes. si leur font des espeulettes. par dessoubz un vert laurier. la vient le dieu d'amourettes/ sur son poing un esprivier. tout chevauçant a cloquettes. sur un palefroy d'englentier.