Part 2
Sire chevalier a ceste vostre demande en est la response moult clere. Car trop mieulx ameroie oir dire mal de mon ami par tel si que je y trouvasse des biens que le contraire. On dist que tout noble et vaillant cuer ne se doit arrester aux parrolles volans. mais seulement a l'experience/ et a ce je m'en tiens.
Le chevalier.
Damoiselle puis que en vous treuve si parfaitte prudence aincoires veuil de vous savoir se en bone amour n'eut onques fin.
La damoiselle.
Sire chevalier aincoires plus avant vous veuil bien dire que en bonne amour n'eut onques commencement et si croy fermement que en elle jamais n'aura fin. ains a esté et est et sera avec dieu pardevant tous les siecles et est de present entre dieu et les hommes et si durera pardurablement.
Le chevalier.
Damoiselle pour ce que diversement est entre les hommes parlé d'amours l'un en le blasmant l'autre en la loant je vouldroie volentiers savoir de vous duquel il y a plus en amours ou de bien ou de mal.
La damoiselle.
Sire chevalier quoy que l'en die d'amours trop plus y a de bien que de mal envers ceulx qui s'en scevent entremettre. Car nul ne porroit tant de mal endurer en la queste d'amours que un tout seul bien ne l'en puisse guerdonner et enrichir.
Le chevalier.
Damoiselle combien que n'ayez aincoires esté mariee je vous demande se vous amiez bien parfaitement un escuier/ duquel pareillement vous fussiez bien amee. lequel dueil passeriez vous plus legierement/ ou se vostre ami se marioit a une autre damoiselle ou s'il morroit.
La damoiselle.
Certainement sire chevalier se si parfaitement l'amoie comme vous dittes mieulx ameroie qu'il morrust/ que qu'il se remariast a une autre de moy. Car trop dure chose me seroit a porter veoir autrui joyr de cellui en qui j'auroie du tout mis mon cuer et ma beneureté.
Le chevalier.
Damoiselle aincoires veuil de vous aprendre une chose de laquele paraventure aincoires n'avez eu besoing. C'est que se un escuier et une damoiselle aiment l'un l'autre parfaitement/ et il avient que un autre escuier requist la damoiselle de son amour je vous demande se elle le doit dire a son ami ou non.
La damoiselle.
Sire chevalier bien est vray que onques de ceste chose n'eus affaire. mais tant vous dy que la damoiselle le doit dire a son ami voire se elle le scet sage et discret autrement non. Car entre deux amans ne doit nulle rien estre celee ne aussy de femme a mary.
Le chevalier.
France damoiselle se ainsi fust que tenissiez loyales amours en voz mains je vous prie que me dittes que vous en feriez.
La damoiselle
Sire chevalier sachiez que sans aucun delay je les metteroie ou cuer de mon amy. car ailleurs ne les pourroie mieulx mettre a mon avantage et honneur.
Le chevalier.
Damoiselle lequel des deux ameriez vous mieulx ou que sceussiez toutes les pensseez de vostre ami ou qu'il sceust toutes les vostres
La damoiselle.
Sire chevalier mieulx ameroie savoir toutes les pensseez de mon ami qu'il sceust les miennes.
Le chevalier.
Certes damoiselle trop mieulx ameroie savoir celles de madame affin que je fusse certain de l'amour dont elle m'aimeroit.
Le chevalier.
Damoiselle je vous demande laquele des deux fait mieulx a prisier ou celle qui oncques n'ama par amours ou celle qui tout son temps a amé sans loyauté.
La damoiselle.
Sire chevalier je tiens que plus fait a prisier la dame qui onques n'ama Car s'elle n'aime et n'a en elle aucune des vertus d'amours. aussi n'a elle le grant vice de desloyauté qui est moult a vituperer en dame.
Le chevalier.
Damoiselle aincoires vous demande de quoy les amans doivent avoir plusgrant doubte ou d'estre escondis quant ilz prient leur dame. ou quant l'ottroy leur en est fait qu'ilz ne le perdent.
La damoiselle.
Sire chevalier je croy qu'ilz ont plusgrant doubte de le perdre. Car on doit plus resongnier a perdre la chose acquise que celle dont n'a aincoires eu la possession.
Le chevalier.
Damoiselle de vous convient que aincoires saches duquel vous avez plus usé en amours/ ou de semblant sans corrage/ ou de cuer sans semblant.
La damoiselle.
Sire chevalier je croy que ç'a esté de semblant sans corage. combien que ceste chose vous dy bien a regret/ mais riens ne vous puis celer/ car promis le vous ay.
Le chevalier.
Ma treshonnouree damoiselle je vous ay demandé de moult diverses demandes ausqueles moult honnestement et sagement m'avez respondu dont trop a jamais ne vous en sauroie remercier ne satisfaire en cas pareil ne en semblable. si n'ay pour tout vostre guerdon autre gaige a vous donner que mon cuer lequel je vous presente a tenir prisonnier a vostre obeissance. Et pour ce que point ne me enuie d'estre emprés vous et aussy que temps avons aincoires assez de deviser et de passer temps je vous supplie que me veuilliez aprendre et faire sage d'aucunes doutes que j'ay en mon cuer touchant les personnes des amans et que c'est d'amours.
La damoiselle.
Sire chevalier trop exauchiez mon ygnorance de me donner loenge non deservie. Car en moy n'a aincoires eu gaires d'experience ne de cognoissance de pluseurs choses es fais d'amours et ce a cause de ma tendre jonesse/ mais pour ce que promis le vous avoye a mon povoir tenu le vous ay. si vous prie que les ayez et prisiez tant qu'elles valent et non plus. et de ce que m'avez a demander j'en responderay a mon povoir/ et savoir qui n'est gaires grant/ si commenciez quant il vous plaira.
Le chevalier.
Qu'est en amours le dart villain. com plus me fiert et je plus l'aim. Que plus me bat villainement. plus l'endure legierement.
La damoiselle.
C'est faulz semblant.
Le chevalier.
Aux vrais amans qui aiment hault. Quele chose est que mieulx leur vaulx. et au besoing plus tost leur fault.
[La damoiselle.]
C'est beau parler.
Le chevalier.
Qui est d'amours mere et nourrice. com plus est noble et plus est nice.
La damoiselle.
C'est la pensee.
Le chevalier.
Quele est l'enseigne par dehors qui plus monstre l'amour du cuer
La damoiselle.
C'est muer couleur.
Le chevalier.
Quele est la seignourie. que l'amant puet avoir. Sans peur sans tricherie. sans joye et sans espoir.
La damoiselle.
C'est estre amé qu'on n'en scet riens
Le chevalier.
De quoy puet plusgrant bien venir. en vie d'amours maintenir.
La damoiselle.
C'est soy maintenir sagement.
Le chevalier.
Qu'est en amour la courtoisie moins prouffitable et plus prisie.
La damoiselle.
C'est estre accolez sans baisier.
Le chevalier.
Qui est une autre courtoisie. que nul ne rechoit qui en rie.
La damoiselle.
C'est courtois escondit.
Le chevalier.
Qu'est le moindre don qu'amours face. qui plus conforte et plus solace.
La damoiselle.
C'est doulz regart.
Le chevalier.
Qui fait aux fins amans joyr de ce de quoy ilz ont desir.
La damoiselle.
C'est courtoisie.
Le chevalier.
Qui fait amours long temps durer. et enforcer et embrachier.
La damoiselle.
C'est joye et leesse.
Le chevalier.
Quele chose esse qui monstre en fin. le faulx cuer et aussy le fin. Car en faulz cuer l'amour descroit et ou fin cuer double et si croist.
La damoiselle.
C'est par monstrer dangier.
Le chevalier.
Par quel semblant et par quel touche. cognoist on sage dame en bouche
La damoiselle.
C'est par la response qu'elle fait
Sire chevalier moult de joyeuses demandes m'avez faites ausqueles assez simplement et en brief je vous ay respondu si me pardonnez que si ruidement l'ay couchié/ car mieulx ne le sçay. et on dist encommun que qui fait le mieulx qu'il scet et qu'il puet on lui doit pardonner Or me pardonnez doncques/ et me satisfaittes a aucunes doubtes sur certaines demandes que aincoires vous veuil demander esqueles je croy vous estre expert mieulx que ne soyons entre nous femmelettes et n'ayez en desdaing ou despit quant si franchement vous empesche/ mais autant en avez de moy quant temps et lieu le vous semondront
Le chevalier.
Gentille damoiselle moult me plaist la franchise que dittes prendre et avoir sur moy/ car bien le povez dire et faire a vostre bon plaisir comme il vous poura aparoir cy aprés. Or commenciez quant vous plaira et je de mon petit sens et sans riens vous en celer diray a la france margarite ce que en moy en est
La damoiselle.
Sire chevalier je vous demande se vous aviez l'ottroy de vostre amie d'estre dix fois en sa compaignie a vostre volenté et jamais plus n'y deussiez estre se vous les prenderiez en brief temps ou se vous attenderiez longuement.
Le chevalier.
Damoiselle sachiez que je en prenderoie aucunes prestement et les autres garderoie. Car se je les avoie toutes prinses a une fois je devroie estre dolant quant si legierement auroie despendu les biens que madame m'auroit de sa grace otroiez et n'y porroie plus recouvrer.
La damoiselle.
Sire chevalier je vous demande se vous aviez l'ottroy de vostre amie de couchier avec elle par tel sy qu'elle deust avoir sur vous un souhait tel qu'il lui plairoit lequel ameriez vous mieulx ou qu'elle le prist a vostre couchier. ou a vostre lever.
Le chevalier.
Certes damoiselle mieulx ameroie qu'elle le preist au couchier. Car puis qu'elle m'aroit ottroié tele grace que d'estre la nuit emprés elle je pourroie bien penser que son souhait ne seroit point contraire a ma volenté. mais a mon avantaige et honneur.
La damoiselle.
Sire chevalier je vous veuil demander une joyeuse demande. c'est lequel vous ameriez le mieulx se vous teniez vostre dame par amours en lieu secret ou qu'elle fust vestue des plus precieux habis du monde ou que la tenissiez nue entre deux sacs.
Le chevalier.
Damoiselle a ceste demande a beau choix. car trop mieulx l'ameroie nue entre deux sacs que vestue des plus riches draps du monde. Comme mon cuer ne desire que son gracieux corps et non ses riches habis.
La damoiselle.
Sire chevalier je vous demande se vous amiez dame ou damoiselle et ung autre aussy l'amast pareillement. lequel ameriez vous le mieulx. ou que veissiez l'autre issir de la chambre d'elle quant vous y enteriez. ou qu'il y entrast quant vous en ysteriez.
Le chevalier.
Damoiselle que l'autre en yssist et je y entraisse. car se je lui veoie entrer et j'en ississe jamais n'auroie joye en mon cuer tant que a elle parlé auroie.
La damoiselle
Sire chevalier se vostre amie estoit en prison en une haute tour et eust tresgrant fain je vous demande comment vous lui donneriez a la pointe d'une lance deux parties de mes l'un cuisant et l'autre refroidant.
Le chevalier
Damoiselle je metteroie ung oeuf en ung pain chault si cuiroit l'un en refroidant l'autre.
La damoiselle.
Sire chevalier se une damoiselle avoit toute une nuit assiz sur vostre oreillier. et ne l'eussiez touchie ne elle vous et elle deust l'endemain estre une rose ou jardin assize entre mille autres roses pareille aux autres/ et s'il le vous couvenist recognoistre sur paine d'avoir la teste trenchie je vous demande comment vous la recognoisteriez.
Le chevalier.
Damoiselle je la recognoisteroie a ce que toutes les autres roses seroient chargeez de la rousee du ciel et elle point.
La damoiselle.
Sire chevalier trop ne me sauroie saouler de voz gracieuses et sages responses. si vous prie que me dittes quele dame ou damoiselle pour estre parfaitte doit estre
Le chevalier.
Damoiselle sachiez que toute dame d'honneur doit estre humble et courtoise en parler et en toutes ses manieres simple et coye.
La damoiselle.
Sire chevalier aincoires vous veuil demander une joyeuse demande asavoir se homme marié et femme mariee ou dame de religion pevent amer par amours loiaument et sans mesprendre.
Le chevalier.
Certes damoiselle je croy que oil pourtant qu'il n'y ait aucun villain fait ne villaine intencion de penssee deshonneste. Car en vraie amour n'a aucun vice ne pechié.
La damoiselle.
En verité sire chevalier bien le croy et moult sagement m'en avez satisfait dont je vous mercie. Mais aincoires veuil de vous savoir plus avant comment amours se pevent longuement maintenir et par quoy.
Le chevalier.
Volentiers et a mon povoir en ce vous serviray.
La damoiselle.
Du chastel d'amours vous demand. dont vient le premier fondement.
Le chevalier.
De honneste plaisance.
La damoiselle.
Or me nommez le maistre mur qui plus le fait et fort et dur.
Le chevalier.
C'est celer sagement.
La damoiselle.
Dittes moy qui sont les crestiaulx. les sayettes et les quarreaulx.
Le chevalier.
Ce sont les regars attrayans.
La damoiselle.
Qui est le maistre portier et garde qui l'entree deffent et garde.
Le chevalier.
C'est dangier.
La damoiselle.
Dittes moy dont qui est la clef. qui fait le chastel deffermer.
Le chevalier.
C'est prier continuelement.
La damoiselle.
Nommés la sale et le manoir. Ou on puet premier joye avoir
Le chevalier.
C'est accoller doucement.
La damoiselle.
Qui est la chambre ou est le lit et toute joye et tout deduit.
Le chevalier.
C'est joyssance entiere.
La damoiselle.
Aprés la garde me nommez. Par qui le chastel est gardez.
Le chevalier.
Vivre honnourablement. Et gracieusement. Soy vestir gentement. Parler courtoisement. Honnourer toute gent. Et amer loyaument.
La damoiselle.
Or devez l'ennemy nommer. Qui puet le chastel plus grever.
Le chevalier.
Eslongier sa dame longuement
La damoiselle.
De quoy fait amours courtoisie. Moins prouffitable et plus prisie.
Le chevalier.
C'est de baisier son amy.
La damoiselle.
Quele est le moindre don d'amours. Qui plus conforte les dolours
Le chevalier.
C'est doulx regart.
La damoiselle.
Qu'esse qu'amours oste des siens. Et s'est la chose honneur et biens.
Le chevalier.
C'est contenance.
La damoiselle.
Qu'est le prouffit qui puet venir. De joye d'amours maintenir.
Le chevalier.
C'est grace et honneur.
La damoiselle.
Par quel assay et par quel touche. Puet mieulx sage dame esprouver. Se cil qui la prie d'amer. L'aime de fin cuer ou de bouche
Le chevalier.
C'est par monstrer dangier a son amy.
La damoiselle.
Qu'esse qui plus amans eslieve Et plustost leur fait joye avoir Et aux amans plus nuist et grieve. Et leur fait mettre en nonchaloir.
Le chevalier.
C'est richesse.
La damoiselle.
Comment nomme on la maladie que tant plus approche on le mire et plus grieve.
Le chevalier.
C'est amours en cuer de leal amant.
La damoiselle.
Certes assez ne me puis esmerveillier de vos prudentes et sages responses sire chevalier/ et ne fust l'heure qui approche le departement de l'assamblee presente. aincoires vous traveillasse pour savoir de vous aucunes doubtes qui souvent me traveillent l'entendement/ especialement se le dieu d'amours fist onques aucuns commandemens a garder par ses subgez et bacelers errans en la queste d'amours pour plustost parvenir a sa court. et ou parfait service de leurs dames.
Le chevalier.
Damoiselle je vous respons et afferme que sy a/ lesquelz sont de moult grant especiauté.
La damoiselle.
Et combien sont ilz en nombre
Le chevalier.
Dix commandemens fait. amours a ses sergans. ausquelz tout cuer parfait. doit estre obeissant.
La damoiselle.
O sire chevalier. et combien que aincoires fust l'heure plus tard et que je deusse icy arrester oultre les autres. et si veuil de vous oyr ces sains commandemens voyre et que ce soit vostre plaisir les me dire.
Le chevalier.
Les .x. commandemens d'amours.
C'est que l'amant d'orgueil. soit exemps en tous temps/ ja parolle ne dye qui autruy soit nuisans. A tous soit acointables de parler et plaisans. Et toutes villonniez soit partout eschevans. D'estre faittis et cointes doit tousjours estre engrans. en toutes compaignies soit et liez et joyans. Nul villain mot ne soit hors de sa bouche yssans. Soit larges et courtois aux petis et aux grans. Et en un seul lieu soit son cuer perseverans. Qui ces commandemens ne garde il n'est pas vrays amans. Ne digne des grans biens d'amours participans.
La damoiselle.
Certainement bien doivent estre hault exaulciez ceulx qui ces sains commandemens acomplissent. mais sire chevalier aincores volentiers sauroie de vous pour congié prendre comment on appelleroit amours s'elles avoient perdu leur nom
Le chevalier.
Damoiselle sachiez qu'elles auroient nom. Tresor d'honneur pour la plushaulte et parfaitte chose qui soit ou monde et qui plus fait le monde durer et continuer ensemble.
Aincoires ay dessus mon cuer aucunes doubtes que avant que departons me convient de vous savoir. damoiselle si vous prie que ne vous veuille desplaire de la paine que je vous donne. et aprés vostre response je vous promés imposer fin et ne vous plus traveillier.
La damoiselle
Bien me plaist sire chevalier or demandez vostre bon plaisir.
Le chevalier.
Damoiselle doncques ains que departons. je vous demande lequel vous ameriez le mieulx ou d'entreprendre a faire mesdisans cesser de mesdire. ou vostre amy saouler de baisier.
La damoiselle.
Sire chevalier mieulx ameroie saouler mon amy de baisier que entreprendre a faire cesser mesdisans de hoingnier. car combien que raison ne lui souffeist pas de moy baisier si ne me porroit il tant anoyer que l'autre.
Le chevalier.
Damoiselle aincores vous demande par la foy que devez a dieu et a amours que me dittes se vous veistes en cest an homme a qui vous vouldriez requerre de son amour. mais que ce fust aussy honnourable chose pour vous le requerre comme ce seroit de lui. la vostre requerre.
La damoiselle.
Sire chevalier sachiez que oyl car aux dames est laissié franct arbitre de povoir eslire leur semblable en condicion et vertu comme a l'omme. mais vergoingne leur deffend.
Le chevalier
Damoiselle lequel ameriez vous mieulx ou que vostre amy joyst de vostre amour par si que nul ne le peust savoir. ou qu'il n'en joyst pas mais chascun cuidast qu'il en joyst.
La damoiselle.
Sire chevalier mieulx ameroie qu'il en joyst et que nul n'en sceust riens. Car toutes femmes doivent tousjours garder leur honneur et sur toutes choses eschever les parolles des mesdisans.
Le chevalier.
Damoiselle je vous demande se une femme puet avoir deux amis en parfaite amour.
La damoiselle.
Sire chevalier sachiez que nennil neant plus qu'elle puet de partir son cuer en deux parties/ et celle qui le fait est incertaine et fait a blasmer.
Le chevalier.
Damoiselle je vous demande se proesse ou hardement esmeut point cuer de dame ou damoiselle a amer par amours.
La damoiselle.
Certainement si fait sire chevalier/ Car femme de sa propre nature desire tousjours que cellui qu'elle entend a amer soit hardi et preux. Et aussy l'en dist communement que couard n'aura ja belle amie.
Le chevalier.
Damoiselle je vous prie que me dittes le pourquoy et la raison
La damoiselle.
Certes sire chevalier moult volontiers. la cause si est pour ce que la dame ou damoiselle en est plus redoubtee cremue et mieulx prisie laquele chose desire cuer de femme. comme d'elle mesmes ne soit a craindre.
Le chevalier.
Damoiselle je vous demande le quel de deux vous ameriez le mieulx ou que vostre ami se l'avez ou entendez avoir fust larges et courtois/ ou eschars et hardis.
La damoiselle.
Sire chevalier mieulx ameroie qu'il fust larges et courtois. car hardement ne puet longuement durer en cuer eschars pour ce que avarice qui est un lait vice et pechié mortel ne lui laisse demourer Et je suis certaine que dieu aime mieulx sage couardise que fol hardement et aussy fait tout honneste corrage.
Le chevalier.
Damoiselle je vous demande et prie que me dittes de toutes les vertus que vostre ami a laquele mieulx vous plaist. Et de tous ses vices s'aucuns en a/ lequel plus vous desplaist.
La damoiselle.
Sire chevalier sauve le bon advis de celles que mieulx se cognoissent en amour que moy/ mieulx doit plaire loyauté en cuer d'amant et desloyauté le plus desplaire.
Le chevalier.
Damoiselle on dist souvent en commun que amours sont pendans a la perche. en quel point sont elles lors.
La damoiselle.
Sire chevalier amours pendent a la perche quant l'amant a mis ses bras au col de s'amie par amours sans la baisier.
Le chevalier.
Damoiselle quant amans font nouvelles amours que deviennent les vielles.
La damoiselle.
Sire chevalier elles sont mises en la prison de oubly.
Le chevalier.
Damoiselle du quel vous plaigniez vous le plus en amours. ou de trop prier. ou de pou prier.
La damoiselle.
Sire chevalier de trop prier car de legier on s'en pourroit taner.
Le chevalier.
Damoiselle je vous demande lequel vous ameriez le mieulx ou que vostre amy morust pour l'amour de vous. ou que morussiez pour l'amour de lui.
La damoiselle.
Sire chevalier mieulx ameroie qu'il morust pour l'amour de moy car se morte estoie pour l'amour de luy on n'en feroit que mocquier et se je vivoie aprés lui j'auroie toute ma vie regret et souvenance de son amour.
Le chevalier.
Certainement damoiselle aprés celle response plus ne vous veuil traveillier attendu que en ce seroie d'oppinion contraire. car mieulx ameroie morir pour l'amour de madame qu'elle morust pour l'amour de moy et a ce y a bonne rayson. car la reste de ma vie ne me seroit que langueur et deshonneur et mieulx vault morir a honneur que vivre a honte et ainsy me seroit la vie pire que mort.
Mes dames et vous mes damoiselles qui avez veu et leut cy dessus les demandes et responses amoureuses et honnestes pour entretenir en gracieuses devises chevaliers et gentilz hommes/ je vous suplie que se aucune chose y avez trouvé qui soit a vostre desplaisance que le me pardonnés. Car il ne m'a esté possible de tout avoir retenu ce que par ci devant ay oy et veu. ne aussy du temps present ne puis rendre raison queles devises les nobles et frisques damoiselles ont envers leurs mignons comme je soye de leur compaignie banni pour dame viellesse a tout son fronchié visage qui m'est venue audevant pour le desplaisir de laquele jonesse la fresche et envoisie est departie de ma compaignie et a emporté de moy beauté qui moult m'estoit favorable et propice et pour laquele j'estoie appellé et bien venu entre les dames. Or ne me reste doncques autre poissance que d'en deviser/ et aussi mettre par escript ce qu'en puis avoir retenu. Et pour ce que du temps passé je me suis trouvé par fortune qui m'a mené en pluiseurs et diverses compaignies aussy bien moiennes et basses d'estat comme nobles et hautes. je veuil maintenant reciter pluiseurs demandes et adevinailles que soloient faire les jones compaignons de mon temps aux matrones et filles es assembleez qu'ilz faisoient es longues nuis d'yver aux series pour passer plus joyeusement icelles. Et s'il y a chose un pou grasse il me soit pardonné/ car c'est ouvrage et devises de nuit
S'ensieut icelles demandes.
Une chose fut trouvee qui oncques esté n'avoit/ et cellui qui riens n'y avoit le donna a cellui a qui c'estoit.
Response.
Ce fut le sainct baptesme que sainct jehan donna a nostre sauveur jhesucrist.
Demande.
Un enfant fut parlant et vifz. son pere mort et enfouis. le pere vit/ et le filz non/ Or regardés par quel raison.
Response.
Cestui enfant estoit aveugle.
Demande.
Je fus nez avant que mon pere Et engendrés avant ma mere Et si tuay le quart du monde. Si grant qu'il est a la reonde. Et si despucellay ma taye. Regardez se c'est chose vraye.
Reponse.
Ce fut kayn qui tua abel son frere.
Demande.
Comment serviriez vous vostre dame par amours d'un mes venant du cul sans villonnie sur un trenchoir de trestous bois.
Response.
Je la serviroie d'un oef sur le plat d'une cuignie.
Demande.
J'ay un hostil bel et roit. Une fois crombe/ et l'autre fois droit. Vray dieu qu'il est bel quant il tend. Et si ne vault riens s'il ne tend Je sacque aval/ je tire amont. Je fiers en un trou bien parfont
Response.
C'est un arc a main.
Demande.
Il n'est non plus gros q'une puche. Et s'en fait on bien une amuche
Response.
C'est une fuelle de colles.
Demande.