Chapter 6

¶ Icy parle Nature a noble cueur/ et l'enorte luy donnant courage de vengier le desconfort de noblesse feminine

Nature.

¶ Vous avez ouy la complaincte De ceste dame que cy est Que s'est et dolosee et plaincte Tremblant comme fueille en forest. Lequel ennuy/ s'il vous deplaist Monstrez qu'estes bien enseignez Et de son mal sans faire arrest: La confortez et l'en vengez

Vous y pouez sur tous servir Dieu et sa grace y acquerir Et plusgrant honneur deservir Que vous n'oseriez requerir Car elle que bien peut merir Tout le travail qu'on prent pour elle Assez bien a. pour vous cherir En tant que portez sa querelle

Pourtant vous prie et vous conseille Que vous entreprenez la queste Et que voustre corps se traveille En ceste emprise a ma requeste Vous y ferez double conqueste En bien. en gloire. en joie. en fame Quant l'amour dieu vous sera preste Et la grace de toute dame

Soyes hardis sy n'ayés peur D'homme que vous veulle assallir A la fin vous serés vainqueur Du tout a voustre bon plaisir Sy viendrés a voustre desir D'avoir fait sy noble victoire Pourquoy vous pourés pervenir A felicité et a gloire

C'est belle chose que de user Jeunesse en euvre meritoire Et soy de telz faiz delecter Dont l'on acquiert honneurs et gloire Des vaillans/ fault avoir memoire De leur prudence et noblez fais Car se le corps est transitoire Le bon renom ne meurt jamaix

Ravallez les faulses coustumes De vilain cueur et malle bouche Et les mectez en amertumes Sans pité. nes que d'une souche Gent qui est plaine de reprouche Chescun la devroit traynner Car dieu les maldit de sa bouche Et les commande de vanner

En fleur de voustre jeune aage Esprouvez voustre corps en guerre Monstrez se vous avez visage De voulenté d'honneur acquerre Vous en pouez icy conquerre Plus qu'oncques ne fist alexandre Mais s'il vous fault beaucop enquerre Vous craignez voustre sang espandre

Mal fustes baptisé de fait Noble cueur. comme vous savez Se vous ne monstrez par effect Q'un noble cueur en vous avez Se vous ces faitz ne relevez Ne sçay qui les relevera Et se la pene en eschevez En qui plus l'on se fiera

Sus a cheval. armez le corps Prenés pays: je vous supplie Faites ce dont je vous recors Car l'eure est plus que paremplie Dieu vous doint sa grace acomplie Bonne aventure en briefve adresse Priant celle que nul oblie Qu'elle vous garde et vous adresse.

¶ Icy Noble cuer prent congié de Dame Nature

Noble cueur.

Ma dame tout mon bien ma joie Tout la plushault desir que j'aie Je vous mercie Ma treschoisie. Mille foys plus que ne pourroie Des biens que voustre cueur m'octroie. Et vous affie Comme a m'amie Et a ma dame ou que je soie. Que refuser je ne sauroie Ma povre vie D'estre exploictie En tous lieux ou je penseroie Qu'aucun service vous seroie Ou courtoisie Si vous supplie Par vous je suis formé et fait Mené a vie et a effect Par voustre affaire Si doy bien faire Pour vous que seule avez defait Mon cueur mon corps paré et fait Tel qu'a refaire Ny a que faire. Combien que point ne fuz parfait Ne en grace le mieulx refait Car au parfaire A ung grant faire Mais de voustre don et bien fait Que j'ay sur ung plus imparfait Pour satisfaire Mercier vous doy ou meffaire Des dames dont parlé avez Craindre certes vous ne devez Ou que je tende Que je n'entende Que leur honneur soit eslevez Et tous leurs malvaillans grevez Car c'est la bende Que plus me bende Les entrailles bien le savez Car de long temps suis aggravez De leur legende Qui crie amende Entre tous ses amis privez Si vous pry que plus n'estrivez De leur esclande Qui est trop grande Et chescun a moy s'en actende A dieu vous dy dame Nature Et a dieu ma tresnoble et pure Celle que j'ame Doubte et reclame Sur toute vive creature A dieu mon mirouer ma figure Mon corps mon ame Mon fruit mon balsme Ma viande ma nouriture A dieu le seul rabat d'ordure Adieu la dragme Contre la flame De vilains et puant ordure A dieu ma dame Je m'en voys vengier voustre blasme Dieu vous doint sa grace et s'amour Santé confort espoir vigour Repos liesse Qui ne vous cesse Jamais. jusques au dernier jours Ny aprés. mais dure tousjours Helas princesse Fleur de noblesse. Eslongnier me fault voustre atour Priez dieu que joyeux retour Me face adresse Vers la jeunesse De vous ma souveraine fleur. Que me paissez de la doulceur De vo haultesse A dieu vous dy: et je vous lesse

¶ Icy se parte Noble cueur: en prenant congié de Noblesse Feminine.

Qui lors le piteux partement Veist/ quant noble cueur fut party Je croy/ que tout apertement Son cueur se fust parmy party On ne veist oncq en tel party Faicte si plourant departie Et force fut que je party Oeulx. leur doleur et partie

Acolemens entrebaisiers Undes de larmes et rivieres y avoit/ plus que par milliers Et de tristes piteuses chieres Gratieux motz. doulces manieres Maintz durs souspirs maintez astraintes y vey. qui sont tresmal legieres A porter long temps par contraintes

En fin par ung piteux souspir Noble cueur montoit a cheval Et comme honteux va ferir D'esperons courrant contreval Mais dieu scet en quel piteux mal La pouvre dame demouroit A qui le cueur fist sy tresmal A pene qu'elle n'en mouroit

Et tout acop vecy venir Le beau levrier ferme et delivre Parquoy il me va souvenir Que noble cueur me failloit suivre. Et lors/ ou comme fol ou yvre Je me gectay sur ses espaules Deliberé de le poursuvire Fust en irlande ou en gaules

Acop le levrier me rendoit Emprés le fortuneux errant A qui le cueur d'ardeur fondoit De trouver ce qu'aloit querant Qui mainte laude aloit ferant En traversant boys et passages Et en chescun lieu enquerant Des coustumes et des usages

Tousdis ramentevoit sa dame Et pensoit que homme ne l'oist: Car je ne fuz apparceu d'ame Non plus q'un qui s'esvanoyst Courist saillist trotast fuyst Tousjours luy fuz emprés la coue Homs qui d'un tel varlet joyst Fait que tel s'il le desavoue

¶ Comment noble cueur arriva en une Isle ou il y avoit ung chasteaulx merveilleux ouquel y avoit ung pillier de marbre/ sur lequel estoit une ymaige d'argent tenant ung escuisson et y avoit grant escripture dedans la quelle il lut

En fin de compte il arriva Au bout de troys jours en une ysle Ou ung tresfort chasteau trouva Qui a prendre estoit difficile Ouvré estoit par main habile En lieu si tresavantegeux Que combatans jusqu'a dix mille Ny eussent esté dommageux

Boys y avoit riviere pree Qu'a ung chasteau ne doit fallir Sy estoit toute la contree Forte a entrer dure a saillir L'on ne la pouoit assaillir De quel costé qu'on se virast Ne homme en faire tressaillir Qui trop dehors ne se tirast

Ainsy donc tout seul et sans paige Fortune le fit la venir Toutesvoyes: il quist passage Tout par tout pour y avenir Qui par aler et par venir Parmy la forest en la pree Tant cercha. qu'il va survenir Ou estoit la certaine entree

L'entree estoit ung fort portal De bastille tresbien garnie De coulevrines de metal Et de tous engins bien fournie Assise en place tresplaine Sur la riviere au bout d'un pont Qui par droicte voie et unie On milieu du chasteau respont

Hors avoit ung pilier de marbre Dessus une ymage d'argent Soubz l'ombre d'un tresplaisant arbre Merveilleusement bel et gent Autour n'y avoit nulle gent Dont l'on se peust apparcevoir Mais j'en estoie negligent Car il fut bien gardé de voir

L'image tenoit en ses mains Ung escu/ d'autrepart ung cor. Et en l'escu y avoit maints Escriptz. de finez lettres d'or Et droit a pié du sicanor Avoit ung nain. qui y couchoit Qui brayoit comme fait ung tor Quant estrangier y approuchoit

¶ Icy est le contenu de l'escripture qu'estoit en l'escu que l'idole tenoit.

L'escript disoit. Cy est la place De deux forts geants exillés Qui ne craingnent homme qu'on face Tant soit des armes bien stilez Reboutez sont et avilez Des femmes pour vray testmoignier Mais ceulx qui rompront noz filez Trouveront a qui besongnier

C'est cueur vilain/ et malle bouche Qui gardent icy le passage Si hardy. Que homs a l'escu touche S'il ne veult acomplir l'usage Ou qu'il n'y laisse pour truage Ung membre tel que nous vouldrons Lequel. pour le mectre en servage De noz espeez luy touldrons

La coustume sy est ytelle Qu'il fault se combatre a eulx deux Et que tant treuve en sa cautelle Qu'il maistrie la force d'eulx Mais avant que combatre a ceulx Il fault que devers eulx se tire Et aucuns motz injurieux Leur oser reprouchier et dire

Parler y fault la teste nue A nous sans espee ou baston Affin que mieulx nous soit congnue La furte. qu'a le champion Lors s'il nous dist qui ne soit bon Sans avoir dequoy soy vengier S'il nous plaist nous le tueron Qui a peur/ fuye le dangier

L'acteur.

Quant noble cueur avoit leu Tout ce qui estoit en escript Lors dist/ mal luy est escheu Ha qui t'a cy mis en escript Le cueur luy crevoit de despit De l'orgueil des vilains bossus Mais encor il donna respitz A l'estu sans frapper dessus

Lors se tiroit apart ung poy Vers ung buisson qui la estoit Et ne pensoie pas pourquoy Que de la place il s'esloignoit Lors sur terre s'agenoilloit Comme ung. qui point ne se varie Es ses mains vers lez cieulx joignoit. Disant a la vierge marie

O glorieuse inestimable Dame des cieulx et tresnotable Souveraine dame et princesse O tresglorieuse haultesse O clarté pure irregradable O beaulté jamais deffaillable O des cieulx la gouverneresse O des anges commanderesse O royne incomparable O habundant fons de richesse O tresor de toute liesse O pure vierge inviolable O doulceur tresinenarrable Je te pry trespuissant maistresse Prens la clameur que je t'adresse O precieux et digne armaire O miraculeux sanctuaire Remply par seule affinité De toute la divinité O tresmelodieux repaire Temple sacré/ ou quel repaire Par singuliere dignité La divine benignité O tabernacle salutaire Vers qui les anges se vont traire Pour louer la propinquité Que tu as a la trinité O cierge qui lez cieulx esclaire Mirouer impossible a pourtraire Luisant jusqu'en infinité Au dextre de la deité

Dame j'ay immortel desir D'aucun plaisir Te faire/ et avec ce d'escrire Motz. dont ta tresdigne haulteur Puist avoir los gloire et honneur Car autre que toy ne desire. Jamais eslire Ne servir quelque part que tyre Qui est la plus belle et meilleur Dont dieu ait esté formateur Mais las/ or fault mon cueur gesir. A deloisir Et ma langue ne scet que dire Veu que terrestre doulceur N'est pas ung grain a ta valeur Parquoy il me couvient gemir Trembler fremir De desplaisir de dueil et d'ire Que je ne puis vuyder mon cueur Comme vers toy me prent ardeur Tu seule es de plus honneur digne Vierge benigne Que ne sont toutes les substances Des anges/ les plus glorieux Ne les plus haulx trosnes des cieulx: Et as par la grace divine Que t'enlumine Tant d'honneurs gloires et plaisances. Que le plusparfait de tous eulx Se rompt et aveuglist les yeulx Helas. quant tel haultesse fine Ploie et s'encline Devant toy/ et pert congnoissances Par ton regard tant merveilleux Qui est par sur eulx vigoreux Comment pourray je moy indigne. Plus que vermine Trouver en moy les suffisances Pour louer ton corps precieux Quant le fait est bien grant pour eulx. Mais pource que tu fuz humaine Jadis mortelle creature Subgecte aux euvres de nature Fors a celle qui est villaine Moy comme humain De desir plain Vueil louer ta plaisant figure Selon la vertu corporelle. Car selon que nature amaine Ton corps. et ta grant beauté pure Si est plusaise ta figure A comprendre vierge haultaine A qui a fain Et vouloir sain Vers toy. tresdoulce floriture En cest vie temporelle

Tu es la seule saincte et saine Qui as le criminel injure D'adam. mis a desconfiture Et as l'umanité insaine Par propre main Remise au bain De sa nation et de cure. Malgré sathan et sa querelle Et recouvree la fontaine De vie/ que en forclosure Estoit par noustre grant ordure Maint an/ maint jour/ mainte septmaine Quant en ton sain Portas le pain Qui nous a fait ouverture Par mort de son corps naturelle O glorieuse jouvencelle Tu as restauree la vie Laquelle Eve/ par sa folie Et par sa voulenté rebelle Avoit forfaicte Et soubzstraicte A toute humaine lignie Par le diabolicque enort C'est grant honneur pour toy pucelle Qui es sy tendre et sy dougie D'avoir desrompu la maistrie De l'ennuieux diable felle Dont est deffaicte La mort infecte Et joye a chescun restablie Qui jamais n'esperoit que mort Tout se perdit par la femelle Les cieulx clos/ gloire forbannie Et toy femme de grace emplie As recouvert l'onneur de celle Povre imparfaicte Vers dieu meffaicte La relevant plus la moitié. Que faicte ne s'estoit de tort Parquoy toy riche dame belle Dois bien estre amee et servie En tout honneur et melodie. Car oncques euvre ne fut telle Ne sy parfaicte: Par femme faicte Sy parfaicte ne sy prisie Ne ne sera jamaix au fort Bien te doivent priser louer Harper jouer et advouer Toutes les generations Pour belle et bonne Plus que rien qui soit soubz le tronne Et par especial amer Honnorer servir reclamer Femmes en persuasions Car ta personne Est leur richesse et leur coronne Ta bonté qui n'a point d'amer Lez fait exaulcer et famer Et avoir supportations Raison l'ordonne Car leur nature a toy consonne Et lez a fait plus renommer Que ne font par Eve a blasmer Quant par tes consecrations Rompis la bonne Que plantee avoit la felonne Pour l'onneur qui est deu a toy. Dame/ j'ame tout le conroy Des femmes que sont en ce monde Car m'est advis Que vous honnorer leur soit duis Et je vouldroie par ma foy Que pour ung povre petit doy Que d'honneur sur elles redonde. Ou d'aucun pris Qu'il leur en fust dix tout acquis Mais or ay je grant dueil en moy Et me desplaist bien que je voy Par feu de mainte langue immonde. Leur beau pourpris Estre tout chargié de mespris. Qui nulle part ne m'apparçoy D'homme. qui ait honneur en soy Ne qui aujourd'uy les responde Dont mez escripts Vous font complainte en piteux cris/ Or ay je la querelle emprise Contre la guise De vilain cueur et sa semence Qui violence Et toute injure par faintise Leur a chargié dessus le dos Sy te supply dame incomprise Et bien aprise Qu'il plaise a ta grant excellence Secourir en ce Ma povre et fraisle couardise Qui en tout honneur faire l'os Et me preste de ta franchise La langue esprise De sy vive et belle eloquence Que par science Leur dignité qui est soubmise Puisse lever et sourdre en los: Car pour leur droit et libertise Que moult je prise Et en tout los et reverence Mon corps commence Une forte et dure entreprise Pour me faire toucher les os O vigoreuse batailliere Puissante et fiere Qui le grant sathan reboutas Et le gectas Soubz tes piez. par ta vertu chiere Sans glaive et espee ne baston Porte en ce jour cy ma baniere Te pry ma chiere Donne moy qui puissance en as Pouoir es bras. Vigoreux corps et main legiere Au jourd'uy. a ton champion Soye moy telle deffensiere. Targe et baviere Que mon corps ne se sente las Ne au bas Je te pry vierge tresentiere Plaisante sale de syon Et mon espoir estre avant quiere Que la croupiere Du vilain ne se loue pas De mon pourchas S'yl ne s'en fuyt en sa taniere Comme ung chien devant le lyon

¶ Icy devise l'acteur comment noble cueur frappa de son espee sur l'escu pour trouver bataille/ et Comment Cueur vilain et mallebouche et beaucop de leurs gens saillirent dehors.

Ceste oraison finee et dicte Noble cueur d'ilec se leva Enflé/ comme louve despite Que par fam a sa proie va Et aussi tost qu'il arriva Dessoubz l'arbre ou l'ymage fu Il print l'espee et l'esprouva D'un cop terrible sur l'escu

Le cop estoit sy tresorible Et le son de l'escu sy hault Que ce sembloit tonnoire orible Qui se fait par temps d'esté chault Mon cueur encores s'entressault Quant je pense au son de l'idolle Qui comme enragie autant vault Leur escria ceste parolle

Reveillez voustre garnison Sus compaignons sus reveillez Saillez aux champs hors de prison. Trop estes vous assommeillez Vecy ung errant traveillez Qui a combatre a entrepris Avancez vous et l'assaillez Si pourrez gaignier los et pris

Tantost veist on ouvrir la porte Et descendre le pont levis Et de gens saillir tresgrant sorte Tout armez le corps et le vis Lors tout au dernier je vis Deux grans geans hideux et fors Et bien montez en tous devis O les autres. saillir dehors

Leur arroy faisoit bon veoir Et la fierté qu'ilz maintenoient Mais grant dommage fut pour voir. D'aucunes gens qui la estoient Car a nobles gens moult sembloient. Et a gens partiz de bon lieu Dont pité fut qu'ilz se mectoient O les mauvais maldiz de dieu.

Vous pouez croire et n'en doubtez Qu'il y avoit grant compaignie De nobles et de redoubtez Sy bien que de meschant lignie Puis en bataille bien rengee Vers noble cueur tous s'approucherent Qui d'une chiere desdaignee Par semblans maintz bourdons coucherent

Jauloux et mauvais langagiers Vanteurs trompeurs gens plains de vicez Injurieux faulx mensongiers Brief. toutes gens de malefices Estoient leans en leurs services Avec ces deux vilains puans Et en estat et en offices Dont dieu maldie les truans

Alors cueur vilain commandoit A noble cueur que il luy dist Quelle aventure il demandoit Ne qu'il queroit ne qu'il voulsist Lequel tantost luy respondist Comme sage et bien asseurez De quelque chose que il vist En maniere que vous oirez

Noble cueur

Je suis ung homme d'aventure Treversant bourgs villes passages Qui hay de ma propre nature Tous mauvais et villains usages Armes joustes et vasselages Sont mes esbas et mes deduis Sy veulz suire les bons et saiges En toutes choses se je puis

Icy a forte et grande emprise Et ung pas hardy a deffendre Nonobstant/ tout ce qu'il devise Contre vous. je vueuil entreprendre Pour a jamaix le vous deffendre Que desormais plus ceans tiengne Coustume. sur grant ne sur mendre De quelque part qu'on tourne ou viengne

Je vous ay de long temps cerchié Par maintz pais par mainte marche Sy croy qu'a ung mauvais marchié Serez ennuit se je vous marche Se mon bras voustre sang ne cerche Je ne fuz oncques bon archier Ou le grant diable gist en l'arche Qui ne vous souffrira cachier

Cueur vilain.

Vasal. moult avez fite langage Me semble/ et le cueur bien despit Mais avant que soit nuit/ je gage Vous l'abasserez ung petit Parlez fort a voustre appetit Avant que soit heure et dimie Je ne prens pas trop grant respit L'on verra qui a belle amie

Il sembleroit a voz coustumes Qui s'en vouldroit a vous actendre. Que devez mangier les enclumes Et l'amiral baquin pourfendre Se vous estes tel en defendre Que voustre parler est chargent Il se vouldroit mieulx aler pendre Que soy combatre a tel sergent

Aufort ycelle grant vantise Est de nature des couars Lequelz tousjours en leur hantise Sont les plus eschaudez ou ars Vous benderez ennuyt vous arcz En monstrant voz courages haulx Et lors verray bien par voz arts Se vous mangez lez gens aux aulx

Voustre orgueilleuse oultre cuidance Sera en peu de temps remise Et se vous venez a la dame Qu'establie avons et commise Gaires plus ne fauldra de mise Pour le remanant de voz jours. Ou la riviere de tamise Ira contremont au rebours

Approuchez vous. et vous tirez Icy dessoubz ce pavillon Car la fault il par moiz irez Que l'un l'autre nous resveillon Et que nous entreconseillon C'est la coustume de ceans Lors se par armes vous faillon L'on jugera des plus vaillans

L'acteur.

Lors sont descenduz les geans Si est noble cueur aussy tost Et eulx trois sont entrez leans Sans avoir plus ame en leur ost Baston gaine espee on luy tolt Mais lui qui ne lez craint ne fuit Commença lors en hault son mot En la maniere qui s'ensuit

¶ Icy argue noble cueur a cueur vilain et Male bouche et leur remonstre tressagement leurs grans vices et faultes par plusieurs arguments et raisons bien notables. Et s'oppose a tous lez pointz qu'ilz ont mis ou Romant de la Rose et ailleurs Contre lonneur des Dames/ et les confont par vives raisons.

Noble cueur.

Vous cueur vilain et malebouche Gens oultrageux et inutiles Maldiz de la divine bouche Par voz escriptz et euvres viles Par quel venin. sont maintes ysles Infectes et empoisonnees Et maintes nobles et habiles Dames/ d'honneur dessaisonnees

De vous se plaint dame nature Et aussy la noble substance Des dames/ que de voustre ordure. Crient/ d'une voix par vengance Les cieulx ont prins en desplaisance De leur clarté vous aporter Et la terre grant ennuyance De vous nourrir et supporter

Dieu et diables/ et tout le monde Les cieulx les anges. saints et sainctez Sont contre vous: gens tresimmonde. Et font encontre vous leurs plaintes Doutes pensees sont restraintes Et de plorans douleurs serrees Parquoy leurs joies sont contraintez Tant lez avés vous vergondees

Vous avez ne sçay a quel cause A quel fin. ne a quel prouffit Fait en escript tant mainte clause Et maint injurieux escript Contre la femme. par despit Qui vous esmeut a voustre tort Dont vous serez comme maldit. Par moy mis a amere mort.

Toute vilaine puantise Que cueur pense ou langue peut dire Avez sur la nature mise Des femmes/ qui en meurent dire Encores ne vous peut souffire De blasmer bonnes et mauvaises Mais lez voulez faire despire Des hommes. comme lez punaises

Vous estes pieres que antecrist Qui voulez abuser les ames Pour plus desplaire a jesucrist En diffamant ainsy lez dames Mais luy qui fist hommes et femes Envoyé vous a voustre helie Pour les excuser de voz blasmes Ains que chescun s'y affolie