Part 8
Praesta, Pater piissime, Patrique compar Unice, Cum Spiritu Paraclito Regnans per omne saeculum.
_Per Hebdomadam._
AD COMPLETORIUM.
Te lucis ante terminum Rerum Creator poscimus, Ut pro tua clementia, Sis praesul et custodia.
Procul recedant somnia, Et noctium phantasmata; Hostemque nostrum comprime, Ne polluantur corpora.
Praesta, Pater piissime, Patrique compar Unice, Cum Spiritu Paraclito Regnans per omne saeculum.
FERIA II.
AD MATUTINUM.
Somno refectis artubus, Spreto cubili surgimus; Nobis, Pater, canentibus Adesse te deposcimus.
Te lingua primum concinat, Te mentis ardor ambiat: Ut actuum sequentium Tu, sancte, sis exordium.
Cedant tenebrae lumini: Et nox diurno sideri: Ut culpa, quam nox intulit, Lucis labascat munere.
Precamur iidem supplices, Noxas ut omnes amputes, Et ore te canentium Lauderis omni tempore.
Praesta, Pater piissime, Patrique compar Unice, Cum Spiritu Paraclito Regnans per omne saeculum.
AD LAUDES.
Splendor Paternae gloriae, De luce lucem proferens, Lux lucis, et fons luminis, Diem dies illuminans:
Verusque sol illabere, Micans nitore perpeti; Jubarque sancti Spiritus Infunde nostris sensibus.
Votis vocemus et Patrem, Patrem potentis gratiae, Patrem perennis gloriae, Culpam releget lubricam.
Confirmet actus strenuos, Dentes retundat invidi: Casus secundet asperos: Agenda recte dirigat.
Mentem gubernet, et regat; Sit pura nobis castitas: Fides calore ferveat: Fraudis venena nesciat.
Christusque nobis sit cibus, Potusque noster sit fides, Laeti bibamus sobriam Profusionem Spiritus.
Laetus dies hic transeat: Pudor sit ut diluculum: Fides velut meridies: Crepusculum mens nesciat.
Aurora lucem provehit, Cum luce nobis prodeat, In Patre totus Filius, Et totus in Verbo Pater.
Deo Patri sit gloria, Ejusque soli Filio, Cum Spiritu Paraclito, Nunc, et per omne saeculum.
AD VESPERAS.
Immense coeli Conditor, Qui mixta ne confunderent, Aquae fluenta dividens, Coelum dedisti limitem.
Firmans locum coelestibus, Simulque terrae rivulis, Ut unda flammas temperet, Terrae solum ne dissipent.
Infunde nunc, piissime, Donum perennis gratiae: Fraudis novae ne casibus Nos error atterat vetus.
Lucem Fides adaugeat: Sic luminis jubar ferat: Haec vana cuncta proterat, Hanc falsa nulla comprimant.
Praesta, Pater piissime, Patrique compar Unice, Cum Spiritu Paraclito Regnans per omne saeculum.
FERIA III.
AD MATUTINUM.
Consors Paterni luminis, Lux ipse lucis, et dies, Noctem canendo rumpimus, Assiste postulantibus.
Aufer tenebras mentium: Fuga catervas daemonum; Expelle somnolentiam, Ne pigritantes obruat.
Sic Christe nobis omnibus Indulgeas credentibus, Ut prosit exorantibus, Quod praecinentes psallimus.
Praesta, Pater piissime, Patrique compar Unice, Cum Spiritu Paraclito Regnans per omne saeculum.
AD LAUDES.
Ales diei nuntius Lucem propinquam praecinit, Nos excitator mentium Jam Christus ad vitam vocat.
Auferte, clamat, lectulos, Aegro sopore desides: Castique, recti, ac sobrii Vigilate: jam sum proximus.
Jesum ciamus vocibus, Flentes, precantes, sobrii: Intenta supplicatio Dormire cor mundum vetat.
Tu Christe somnum discute: Tu rumpe noctis vincula: Tu solve peccatum vetus, Novumque lumen ingere.
Deo Patri sit gloria, Ejusque soli Filio, Cum Spiritu Paraclito, Nunc, et per omne saeculum.
AD VESPERAS.
Telluris alme Conditor, Mundi solum qui separans, Pulsis aquae molestiis, Terram dedisti immobilem:
Ut germen aptum proferens, Fulvis decora floribus, Fecunda fructu sisteret, Pastumque gratum redderet.
Mentis perustae vulnera Munda virore gratiae: Ut facta fletu diluat, Motusque pravos atterat.
Jussis tuis obtemperet: Nullis malis approximet: Bonis repleri gaudeat, Et mortis ictum nesciat.
Praesta, Pater piissime, Patrique compar Unice, Cum Spiritu Paraclito Regnans per omne saeculum.
FERIA IV.
AD MATUTINUM.
Rerum Creator optime, Rectorque noster, aspice; Nos a quiete noxia Mersos sopore libera.
Te, sancte Christe, poscimus: Ignosce culpis omnibus: Ad confitendum surgimus, Morasque noctis rumpimus.
Mentes manusque tollimus, Propheta sicut noctibus Nobis gerendum praecipit, Paulusque gestis censuit.
Vides malum quod fecimus: Occulta nostra pandimus: Preces gementes fundimus, Dimitte quod peccavimus.
Praesta, Pater piissime, Patrique compar Unice, Cum Spiritu Paraclito Regnans per omne saeculum.
AD LAUDES.
Nox, et tenebrae, et nubila, Confusa mundi, et turbida: Lux intrat: albescit polus: Christus venit: discedite.
Caligo terrae scinditur Percussa solis spiculo, Rebusque jam color redit, Vultu nitentis sideris.
Te, Christe, solum novimus, Te mente pura, et simplici, Flendo, et canendo, quaesumus, Intende nostris sensibus.
Sunt multa fucis illita, Quae luce purgentur tua: Tu vera lux coelestium Vultu sereno illumina.
Deo Patri sit gloria, Ejusque soli Filio, Cum Spiritu Paraclito, Nunc, et per omne saeculum.
AD VESPERAS.
Coeli Deus sanctissime, Qui lucidas mundi plagas Candore pingis igneo, Augens decoro lumine:
Quarto die qui flammeam Dum solis accendis rotam; Lunae ministras ordinem, Vagosque cursus siderum:
Ut noctibus, vel lumini Diremptionis terminum, Primordiis et mensium Signum dares notissimum.
Expelle noctem cordium: Absterge sordes mentium: Resolve culpae vinculum: Everte moles criminum.
Praesta, Pater piissime, Patrique compar Unice, Cum Spiritu Paraclito Regnans per omne saeculum.
FERIA V.
AD MATUTINUM.
Nox atra rerum contegit Terrae colores omnium; Nos confitentes poscimus Te, juste Judex cordium,
Ut auferas piacula, Sordesque mentis abluas, Donesque, Christe, gratiam, Ut arceantur crimina.
Mens ecce torpet impia, Quam culpa mordet noxia: Obscura gestit tollere, Et te, Redemptor, quaerere.
Repelle tu caliginem Intrinsecus quam maxime; Ut in beato gaudeat Se collocari lumine.
Praesta, Pater piissime, Patrique compar Unice, Cum Spiritu Paraclito Regnans per omne saeculum.
AD LAUDES.
Lux ecce surgit aurea: Pallens facessat caecitas, Quae nosmet in praeceps diu Errore traxit devio.
Haec lux serenum conferat, Purosque nos praestet sibi; Nihil loquamur subdolum: Volvamus obscurum nihil.
Sic tota decurrat dies, Ne lingua mendax, ne manus, Oculive peccent lubrici, Ne noxa corpus inquinet.
Speculator adstat desuper, Qui nos diebus omnibus, Actusque nostros prospicit A luce prima in vesperum.
Deo Patri sit gloria, Ejusque soli Filio, Cum Spiritu Paraclito, Nunc, et per omne saeculum.
AD VESPERAS.
Magnae Deus potentiae, Qui fertili natos aqua Partim relinquis gurgiti, Partim levas in aÎra.
Demersa lymphis imprimens, Subvecta coelis erigens: Ut stirpe ab una prodita, Diversa repleant loca.
Largire cunctis servulis, Quos mundat unda sanguinis, Nescire lapsus criminum, Nec ferre mortis taedium.
Ut culpa nullum deprimat; Nullum efferat jactantia: Elisa mens ne concidat: Elata mens ne corruat.
Praesta, Pater piissime, Patrique compar Unice, Cum Spiritu Paraclito Regnans per omne saeculum.
FERIA VI.
AD MATUTINUM.
Tu Trinitatis Unitas, Orbem potenter quae regis, Attende laudis canticum, Quod excubantes psallimus.
Nam lectulo consurgimus Noctis quieto tempore, Ut flagitemus omnium A te medelam vulnerum.
Quo fraude quidquid daemonum In noctibus deliquimus; Abstergat illud coelitus Tuae potestas gloriae.
Ne corpus adstet sordidum, Nec torpor instet cordium, Nec criminis contagio Tepescat ardor spiritus.
Ob hoc Redemptor, quaesumus, Reple tuo nos lumine, Per quod dierum circulis, Nullis ruamus actibus.
Praesta, Pater piissime, Patrique compar Unice; Cum Spiritu Paraclito Regnans per omne saeculum.
AD LAUDES.
Aeterna coeli gloria, Beata spes mortalium, Summi Tonantis Unice, Castaeque proles Virginis:
Da dexteram surgentibus, Exurgat ut mens sobria, Flagrans et in laudem Dei Grates rependat debitas.
Ortus refulget lucifer, Praeitque solem nuntius: Cadunt tenebrae noctium: Lux sancta nos illuminet:
Manensque nostris sensibus, Noctem repellat saeculi, Omnique fine temporis Purgata servet pectora.
Quaesita jam primum Fides In corde radices agat, Secunda Spes congaudeat, Qua major extat Charitas.
Deo Patri sit gloria, Ejusque soli Filio, Cum Spiritu Paraclito, Nunc, et per omne saeculum.
AD VESPERAS.
Hominis superne Conditor, Qui cuncta solus ordinans, Humum jubes producere Reptantis et ferae genus:
Et magna rerum corpora, Dictu jubentis vivida, Per temporum certas vices Obtemperare servulis;
Repelle, quod cupidinis Ciente vi nos impetit, Aut moribus se suggerit, Aut actibus se interserit.
Da gaudiorum praemia, Da gratiarum munera: Dissolve litis vincula, Adstringe pacis foedera.
Praesta, Pater piissime, Patrique compar Unice, Cum Spiritu Paraclito Regnans per omne saeculum.
SABBATO.
AD MATUTINUM.
Summae Parens clementiae, Mundi regis qui machinam, Unius et substantiae, Trinusque personis Deus.
Nostros pius cum canticis Fletus benigne suscipe; Ut corde puro sordium Te perfruamur largius.
Lumbos, jecurque morbidum Flammis adure congruis; Accincti ut artus excubent Luxu remoto pessimo.
Quicumque ut horas noctium Nunc concinendo rumpimus, Ditemur omnes affatim Donis beatae patriae.
Praesta, Pater piissime, Patrique compar Unice, Cum Spiritu Paraclito Regnans per omne saeculum.
AD LAUDES.
Aurora jam spargit polum. Terris dies illabitur; Lucis resultat spiculum: Discedat omne lubricum.
Phantasma noctis exulet: Mentis reatus corruat: Quidquid tenebris horridum Nox attulit culpae, cadat.
Ut mane, quod nos ultimum Hic deprecamur cernui; Cum luce nobis effluat, Hoc dum canore concrepat.
Deo Patri sit gloria, Ejusque soli Filio, Cum Spiritu Paraclito, Nunc, et per omne saeculum.
AD VESPERAS.
Jam sol recedit igneus, Tu lux perennis Unitas, Nostris, beata Trinitas, Infunde lumen cordibus.
Te mane laudum carmine, Te deprecamur vespere: Digneris, ut te supplices Laudemus inter Coelites.
Patri, simulque Filio, Tibique sancte Spiritus, Sicut fuit, sit jugiter Saeclum per omne gloria.
HYMNI DE TEMPORE.
SABBATO ANTE DOMINICAM I. ETC. ADVENTUS.
AD VESPERAS.
Creator alme siderum, Aeterna lux credentium, Jesu Redemptor omnium, Intende votis supplicum.
Qui, daemonis ne fraudibus Periret orbis, impetu Amoris actus, languidi Mundi medela factus es.
Commune qui mundi nefas Ut expiares, ad crucem E Virginis Sacrario Intacta prodis victima.
Cujus potestas gloriae, Nomenque cum primum sonat. Et Coelites, et inferi Tremente curvantur genu.
Te deprecamur ultimae Magnum diei Judicem; Armis supernae gratiae Defende nos ab hostibus.
Virtus, honor, laus, gloria, Deo Patri, cum Filio, Sancto simul Paraclito, In saeculorum saecula.
PER ADVENTUM.
AD MATUTINUM.
Verbum supernum prodiens E Patris aeterni sinu, Qui natus orbi subvenis, Labente cursu temporis;
Illumina nunc pectora, Tuoque amore concrema; Ut cor caduca deserens Coeli voluptas impleat.
Ut cum tribunal Judicis Damnabit igni noxios, Et vox amica debitum Vocabit ad coelum pios;
Non esca flammarum nigros Volvamur inter turbines, Vultu Dei sed compotes Coeli fruamur gaudiis.
Patri, simulque Filio, Tibique, sancte Spiritus, Sicut fuit, sit jugiter Saeclum per omne gloria.
AD LAUDES.
En clara vox redarguit Obscura quaeque personans: Procul fugentur somnia: Ab alto Jesus promicat.
Mens jam resurgat torpida, Non amplius jacens humi: Sidus refulget jam novum, Ut tollat omne noxium.
En Agnus ad nos mittitur Laxare gratis debitum: Omnes simul cum lacrymis Precemur indulgentiam:
Ut cum secundo fulserit, Metuque mundum cinxerit, Non pro reatu puniat, Sed nos pius tunc protegat.
Virtus, honor, laus, gloria Deo Patri cum Filio, Sancto simul Paraclito, In saeculorum saecula.
IN NATIVITATE DOMINI.
AD VESPERAS.
Jesu Redemptor omnium, Quem lucis ante originem Parem Paternae gloriae Pater supremus edidit.
Tu lumen, et splendor Patris, Tu spes perennis omnium, Intende quas fundunt preces Tui per orbem servuli.
Memento, rerum Conditor, Nostri quod olim corporis, Sacrata ab alvo Virginis Nascendo, formam sumpseris.
Testatur hoc praesens dies Currens per anni circulum, Quod solus e sinu Patris Mundi salus adveneris.
Hunc astra, tellus, aequora, Hunc omne, quod coelo subest, Salutis Auctorem novae Novo salutat cantico.
Et nos, beata quos sacri Rigavit unda sanguinis, Natalis ob diem tui Hymni tributum solvimus.
Jesu, tibi sit gloria, Qui natus es de Virgine, Cum Patre et almo Spiritu, In sempiterna saecula.
AD LAUDES.
A solis ortus cardine Ad usque terrae limitem, Christum canamus Principem, Natum Maria Virgine.
Beatus auctor saeculi Servile corpus induit, Ut carne carnem liberans, Ne perderet quos condidit.
Castae Parentis viscera Coelestis intrat gratia; Venter Puellae bajulat Secreta, quae non noverat.
Domus pudici pectoris Templum repente fit Dei: Intacta nesciens virum, Concepit alvo Filium.
Enititur puerpera, Quem Gabriel praedixerat, Quem ventre matris gestiens, Baptista clausum senserat.
Foeno jacere pertulit: Praesepe non abhorruit: Et lacte modico pastus est, Per quem nec ales esurit.
Gaudet chorus coelestium, Et angeli canunt Deo: Palamque fit pastoribus Pastor, Creator omnium.
Jesu, tibi sit gloria, Qui natus es de Virgine, Cum Patre et almo Spiritu, In sempiterna saecula.
IN FESTO SS. INNOCENTIUM.
AD MATUTINUM.
Audit tyrannus anxius Adesse regum Principem, Qui nomen Israel regat, Teneatque David regiam.
Exclamat amens nuntio: Successor instat, pellimur; Satelles i, ferrum rape; Perfunde cunas sanguine.
Quid proficit tantum nefas? Quid crimen Herodem juvat? Unus tot inter funera Impune Christus tollitur.
Jesu, tibi sit gloria, Qui natus es de Virgine, Cum Patre et almo Spiritu, In sempiterna saecula.
AD LAUDES.
Salvete flores Martyrum, Quos lucis ipso in lumine Christi insecutor sustulit, Ceu turbo nascentes rosas.
Vos prima Christi victima, Grex immolatorum tener, Aram sub ipsam simplices Palma et coronis luditis.
Jesu, tibi sit gloria, Qui natus es de Virgine, Cum Patre et almo Spiritu, In sempiterna saecula.
IN EPIPHANIA DOMINI.
AD VESPERAS.
Crudelis Herodes, Deum Regem venire quid times? Non eripit mortalia, Qui regna dat coelestia.
Ibant Magi, quam viderant, Stellam sequentes praeviam: Lumen requirunt lumine, Deum fatentur munere.
Lavacra puri gurgitis Coelestis Agnus attigit, Peccata, quae non detulit, Nos abluendo sustulit.
Novum genus potentiae: Aquae rubescunt hydriae, Vinumque jussa fundere, Mutavit unda originem.
Jesu, tibi sit gloria, Qui apparuisti gentibus, Cum Patre et almo Spiritu, In sempiterna saecula.
AD LAUDES.
O sola magnarum urbium Major Bethlem, cui contigit Ducem salutis coelitus Incorporatum gignere:
Quem stella, quae solis rotam Vincit decore ac lumine, Venisse terris nuntiat Cum carne terrestri Deum.
Videre postquam illum Magi, Eoa promunt munera; Stratique votis offerunt Thus, myrrham, et aurum regium.
Regem Deumque annuntiant Thesaurus et fragrans odor Thuris Sabaei; ac myrrheus Pulvis sepulchrum praedocet.
Jesu, tibi sit gloria, Qui apparuisti gentibus, Cum Patre et almo Spiritu, In sempiterna saecula.
PER QUADRAGESIMAM.
SABBATO.
AD VESPERAS.
Audi, benigne Conditor, Nostras preces cum fletibus, In hoc sacro jejunio Fusas quadragenario.
Scrutator alme cordium, Infirma tu scis virium: Ad te reversis exhibe Remissionis gratiam.
Multum quidem peccavimus, Sed parce confitentibus: Ad nominis laudem tui Confer medelam languidis.
Concede nostrum conteri Corpus per abstinentiam: Culpae ut relinquant pabulum Jejuna corda criminum.
Praesta beata Trinitas, Concede simplex Unitas, Ut fructuosa sint tuis Jejuniorum munera.
DOMINICA.
AD MATUTINUM.
Ex more docti mystico Servemus hoc jejunium, Deno dierum circulo Ducto quater notissimo.
Lex et Prophetae primitus Hoc praetulerunt, postmodum Christus sacravit, omnium Rex atque Factor temporum.
Utamur ergo parcius Verbis, cibis, et potibus, Somno, jocis, et arctius Perstemus in custodia.
Vitemus autem noxia, Quae subruunt mentes vagas, Nullumque demus callidi Hostis locum tyrannidi.
Flectamus iram vindicem, Ploremus ante Judicem, Clamemus ore supplici, Dicamus omnes cernui:
Nostris malis offendimus Tuam Deus clementiam: Effunde nobis desuper Remissor indulgentiam.
Memento quod sumus tui, Licet caduci, plasmatis: Ne des honorem nominis Tui, precamur, alteri.
Laxa malum quod fecimus, Auge bonum quod poscimus; Placere quo tandem tibi Possimus hic, et perpetim.
Praesta beata Trinitas, Concede simplex Unitas; Ut fructuosa sint tuis jejuniorum munera.
AD LAUDES.
O sol salutis, intimis Jesu refulge mentibus, Dum nocte pulsa gratior Orbi dies renascitur.
Dans tempus acceptabile, Da, lachrymarum rivulis Lavare cordis victimam, Quam laeta adurat Charitas.
Quo fonte manavit nefas, Fluent perennes lacrymae, Si virga poenitentiae Cordis rigorem conterat.
Dies venit, dies tua, In qua reflorent omnia: Laetemur et nos in viam Tua reducti dextera.
Te prona mundi machina Clemens adoret Trinitas, Et nos novi per gratiam Novum canamus canticum.
SABBATO ANTE DOMINICAM PASSIONIS.
AD VESPERAS.
Vexilla regis prodeunt, Fulget crucis mysterium, Qua vita mortem pertulit, Et morte vitam protulit.
Quae vulnerata lanceae Mucrone diro, criminum Ut nos lavaret sordibus, Manavit unda et sanguine.
Impleta sunt, quae concinit David fideli carmine, Dicendo nationibus: Regnavit a ligno Deus.
Arbor decora et fulgida, Ornata regis purpura, Electa digno stipite Tam sancta membra tangere.
Beata, cujus brachiis Pretium pependit saeculi, Statera facta corporis, Tulitque praedam tartani.[1]
Te, fons salutis Trinitas, Collaudet omnis spiritus: Quibus crucis victoriam Largiris, adde praemium.
[1] O crux ave spes unica, Hoc passionis tempore Piis adauge gratiam, Reisque dele crimina.
DOMINICA DE PASSIONE, Et infra Hebdomadam Passionis.
AD MATUTINUM.
Pange lingua gloriosi Lauream certaminis, Et super crucis trophaeo Dic triumphum nobilem: Qualiter Redemptor orbis Immolatus vicerit.
De Parentis protoplasti Fraude Factor condolens, Quando pomi noxialis In necem morsu ruit: Ipse lignum tunc notavit, Damna ligni ut solveret.
Hoc opus nostrae salutis Ordo depoposcerat; Multiformis proditoris Ars ut artem falleret, Et medelam ferret inde, Hostis unde laeserat.
Quando venit ergo sacri Plenitudo temporis, Missus est ab arce Patris Natus, orbis Conditor; Atque ventre Virginali Carne amictus prodiit.
Vagit infans inter arcta Conditus praesepia; Membra pannis involuta Virgo Mater alligat; Et Dei manus, pedesque, Stricta cingit fascia.
Sempiterna sit beatae Trinitati gloria, Aequa Patri, Filioque: Par decus Paraclito: Unius Trinique nomen: Laudet universitas.
AD LAUDES.
Lustra sex qui jam peregit, Tempus implens corporis, Sponte libera Redemptor, Passioni deditus, Agnus in crucis levatur Immolandus stipite.
Felle potus ecce languet: Spina, clavi, lancea Mite corpus perforarunt: Unda manat, et cruor: Terra, pontus, astra, mundus, Quo lavantur flumine!
Crux fidelis, inter omnes Arbor una nobilis: Silva talem nulla profert Fronde, flore, germine: Dulce ferrum, dulce lignum, Dulce pondus sustinent.
Flecte ramos arbor alta, Tensa laxa viscera, Et rigor lentescat ille, Quem dedit nativitas, Et superni membra Regis Tende miti stipite.
Sola digna tu fuisti Ferre mundi victimam: Atque portum praeparare Arca mundo naufrago, Quam sacer cruor perunxit, Fusus Agni corpore.
Sempiterna sit beatae Trinitati gloria, Aequa Patri, Filioque, Par decus Paraclito: Unius Trinique nomen Laudet universitas.
SABBATO IN ALBIS, Et per Tempus Paschale.
AD VESPERAS.
Ad regias Agni dapes Stolis amicti candidis Post transitum maris Rubri Christo canamus Principi:
Divina cujus charitas Sacrum propinat sanguinem, Almique membra corporis Amor Sacerdos immolat.
Sparsum cruorem postibus Vastator horret angelus: Fugitque divisum mare: Merguntur hostes fluctibus.
Jam Pascha nostrum Christus est, Paschalis idem victima, Et pura puris mentibus Sinceritatis azyma.
O vera coeli victima, Subjecta cui sunt tartara, Soluta mortis vincula, Recepta vitae praemia.
Victor subactis inferis Trophaea Christus explicat, Coeloque aperto, subditum Regem tenebrarum trahit.
Ut sis perenne mentibus, Paschale Jesu gaudium: A morte dira criminum Vitae renatos libera.
Deo Patri sit gloria, Et Filio, qui a mortuis Surrexit, ac Paraclito, In sempiterna saecula.
DOMINICA IN ALBIS, Et per Tempus Paschale.
AD MATUTINUM.
Rex sempiterne coelitum, Rerum Creator omnium, Aequalis ante saecula Semper Parenti Filius.
Nascente qui mundo Faber Imaginem vultus tui Tradens Adamo, nobilem Limo jugasti spiritum.
Cum livor et fraus daemonis Foedasset humanum genus: Tu carne amictus, perditam Formam reformas artifex.
Qui natus olim e Virgine, Nunc e sepulchro nasceris, Tecumque nos a mortuis Jubes sepultos surgere.
Qui pastor aeternus gregem Aqua lavas Baptismatis: Haec est lavacrum mentium: Haec est sepulchrum criminum.
Nobis diu qui debitae Redemptor affixus cruci, Nostrae dedisti prodigus Pretium salutis sanguinem.
Ut sis perenne mentibus Paschale Jesu gaudium: A morte dira criminum Vitae renatos libera.
Deo Patri sit gloria, Et Filio, qui a mortuis Surrexit, ac Paraclito, In sempiterna saecula.
AD LAUDES.
Aurora coelum purpurat, Aether resultat laudibus, Mundus triumphans jubilat, Horrens avernus infremit.
Rex ille dum fortissimus De mortis inferno specu Patrum Senatum liberum Educit ad vitae jubar.
Cujus sepulchrum plurimo Custode signabat lapis, Victor triumphat, et suo Mortem sepulchro funerat.
Sat funeri, sat lacrymis, Sat est datum doloribus: Surrexit extinctor necis, Clamat corascans angelus.
Ut sis perenne mentibus Paschale Jesu gaudium; A morte dira criminum Vitae renatos libera.
Deo Patri sit gloria, Et Filio, qui a mortuis Surrexit, ac Paraclito, In sempiterna saecula.
IN ASCENSIONE DOMINI.
AD VESPERAS.
Salutis humanae Sator, Jesu voluptas cordium, Orbis redempti Conditor, Et casta lux amantium.
Qua victus es clementia, Ut nostra ferres crimina? Mortem subires innocens, A morte nos ut tolleres?
Perrumpis infernum chaos, Vinctis catenas detrahis; Victor triumpho nobili Ad dexteram Patris sedes.
Te cogat indulgentia, Ut damna nostra sarcias, Tuique vultus compotes Dites beato lumine.
Tu dux ad astra, et semita, Sis meta nostris cordibus, Sis lacrymarum gaudium, Sis dulce vitae praemium.
Jesu, tibi sit gloria, Qui victor in coelum redis, Cum Patre et almo Spiritu, In sempiterna saecula.
AD MATUTINUM.
Aeternae Rex altissime, Redemptor et fidelium, Cui mors perempta detulit Summae triumphum gloriae;
Ascendis orbes siderum, Quo te vocabat coelitus Collata, non humanitus Rerum potestas omnium.
Ut trina rerum machina, Coelestium, terrestrium, Et inferorum condita, Flectat genu jam subdita.