Part 9
Tremunt videntes angeli Versam vicem mortalium: Peccat caro, mundat caro, Regnat Deus Dei caro.
Sis ipse nostrum gaudium, Manens olympo praemium; Mundi regis qui fabricam, Mundana vincens gaudia.
Hinc te precantes quaesumus, Ignosce culpis omnibus, Et corda sursum subleva Ad te superna gratia:
Ut cum repente coeperis Clarere nube Judicis, Poenas repellas debitas, Reddas coronas perditas.
Jesu, tibi sit gloria, Qui victor in coelum redis, Cum Patre et almo Spiritu, In sempiterna saecula.
IN FESTO PENTECOSTES.
AD VESPERAS.
Veni, Creator Spiritus, Mentes tuorum visita, Imple superna gratia, Quae tu creasti, pectora.
Qui diceris Paraclitus, Altissimi donum Dei, Fons vivus, ignis, charitas, Et spiritalis unctio.
Tu septiformis munere, Digitus Paternae dexterae, Tu rite promissum Patris, Sermone ditans guttura.
Accende lumen sensibus, Infunde amorem cordibus, Infirma nostri corporis Virtute firmans perpeti.
Hostem repellas longius, Pacemque dones protinus; Ductore sic te praevio Vitemus omne noxium.
Per te sciamus da Patrem, Noscamus atque Filium; Teque utriusque Spiritum Credamus omni tempore.
Deo Patri sit gloria, Et Filio, qui a mortuis Surrexit, ac Paraclito, In saeculorum saecula.
DOMINICA PENTECOSTES.
AD MATUTINUM.
Jam Christus astra ascenderat, Reversus unde venerat, Patris fruendum munere Sanctum daturus Spiritum.
Solemnis urgebat dies, Quo mystico septemplici Orbis volutus septies Signat beata tempora.
Cum lucis hora tertia Repente mundus intonat, Apostolis orantibus Deum venire nuntiat.
De Patris ergo lumme Decorus ignis almus est, Qui fida Christi pectora Calore Verbi compleat.
Impleta gaudent viscera, Afflata sancto Spiritu, Vocesque diversas sonant, Fantur Dei magnalia.
Notique cunctis Gentibus, Graecis, Latinis, Barbaris, Simulque demirantibus, Linguis loquuntur omnium.
Judea tunc incredula, Vesana torvo spiritu, Madere musto sobrios Christi fideles increpat.
Sed editis miraculis, Occurrit, et docet Petrus, Falsum profari perfidos, Joele teste comprobans.
Deo Patri sit gloria, Et Filio, qui a mortuis Surrexit, ac Paraclito, In saeculorum saecula.
AD LAUDES.
Beata nobis gaudia Anni reduxit orbita, Cum Spiritus Paraclitus Illapsus est Apostolis.
Ignis vibrante lumine Linguae figuram detulit, Verbis ut essent proflui, Et charitate fervidi.
Linguis loquuntur omnium: Turbae pavent Gentilium: Musto madere deputant, Quos Spiritus repleverat.
Patrata sunt haec mystice, Paschae peracto tempore, Sacro dierum circulo, Quo lege fit remissio.
Te nunc Deus piissime, Vultu precamur cernuo, Illapsa nobis coelitus Largire dona Spiritus.
Dudum sacrata pectora Tua replesti gratia: Dimitte nostra crimina, Et da quieta tempora.
Deo Patri sit gloria, Et Filio, qui a mortuis Surrexit, ac Paraclito, In saeculorum saecula.
IN FESTO SS. TRINITATIS.
AD MATUTINUM.
Summe Parens clementiae, Mundi regis qui machinam, Unius et substantiae, Trinusque personis Deus.
Da dexteram surgentibus, Exurgat ut mens sobria, Flagrans et in laudem Dei Grates rependat debitas.
Deo Patri sit gloria, Natoque Patris Unico, Cum Spiritu Paraclito In sempiterna saecula.
AD LAUDES.
Tu Trinitatis Unitas, Orbem potenter quae regis, Attende laudis canticum, Quod excubantes psallimus.
Ortus refulget lucifer, Praeitque solem nuntius: Cadunt tenebrae noctium: Lux sancta nos illuminet.
Deo Patri sit gloria, Ejusque soli Filio, Cum Spiritu Paraclito, Nunc, et per omne saeculum.
IN FESTO CORPORIS CHRISTI.
AD VESPERAS.
Pange lingua gloriosi Corporis mysterium, Sanguinisque pretiosi, Quem in mundi pretium Fructus ventris generosi Rex effudit gentium.
Nobis datus, nobis natus Ex intacta Virgine, Et in mundo conversatus, Sparso verbi semine, Sui moras incolatus Miro clausit ordine.
In supremae nocte coenae Recumbens cum fratribus, Observata lege plene Cibis in legalibus, Cibum turbae duodenae Se dat suis manibus.
Verbum caro, panem verum Verbo carnem efficit: Fitque sanguis Christi merum: Et si sensus deficit: Ad firmandum cor sincerum Sola fides sufficit.
Tantum ergo Sacramentum Veneremur cernui: Et antiquum documentum Novo cedat ritui: Praestet fides supplementum Sensuum defectui.
Genitori, Genitoque Laus et jubilatio, Salus, honor, virtus quoque Sit et benedictio; Procedenti ab utroque Compar sit laudatio.
AD MATUTINUM.
Sacris solemniis juncta sint gaudia, Et ex praecordiis sonent praeconia; Recedant vetera, nova sint omnia, Corda, voces, et opera.
Noctis recolitur coena novissima, Qua Christus creditur agnum et azyma Dedisse fratribus, juxta legitima Priscis indulta patribus.
Post agnum typicum, expletis epulis, Corpus Dominicum datum discipulis, Sic totum omnibus, quod totum singulis, Ejus fatemur manibus.
Dedit fragilibus corporis ferculum, Dedit et tristibus sanguinis poculum, Dicens, Accipite quod trado vasculum, Omnes ex eo bibite.
Sic sacrificium istud instituit, Cujus officium committi voluit Solis presbyteris, quibus sic congruit, Ut sumant, et dent ceteris.
Panis angelicus fit panis hominum: Dat panis coelicus figuris terminum: O res mirabilis, manducat Dominum Pauper, servus, et humilis.
Te trina Deitas unaque poscimus, Sic nos tu visita, sicut te colimus: Per tuas semitas duc nos quo tendimus, Ad lucem, quam inhabitas.
AD LAUDES.
Verbum supernum prodiens, Nec Patris linquens dexteram, Ad opus suum exiens, Venit ad vitae vesperam.
In mortem a discipulo Suis tradendus aemulis, Prius in vitae ferculo Se tradidit discipulis.
Quibus sub bina specie Carnem dedit et sanguinem; Ut duplicis substantiae Totum cibaret hominem.
Se nascens dedit socium, Convescens in edulium, Se moriens in pretium, Se regnans dat in praemium.
O salutaris Hostia, Quae coeli pandis ostium: Bella premunt hostilia, Da robur, fer auxilium.
Uni trinoque Domino Sit sempiterna gloria: Qui vitam sine termino Nobis donet in patria.
PROPRIUM SANCTORUM.
IN FESTO SANCTISSIMI NOMINIS JESU.
AD VESPERAS.
Jesu dulcis memoria, Dans vera cordi gaudia: Sed super mel, et omnia, Ejus dulcis praesentia.
Nil canitur suavius, Nil auditor jucundius, Nil cogitatur dulcius Quam Jesus Dei Filius.
Jesu spes poenitentibus, Quam pius es petentibus! Quam bonus te quaerentibus! Sed quid invenientibus?
Nec lingua valet dicere, Nec littera exprimere: Expertus potest credere, Quid sit Jesum diligere.
Sis Jesu nostrum gaudium, Qui es futurus praemium: Sit nostra in te gloria, Per cuncta semper saecula.
AD MATUTINUM.
Jesu Rex admirabilis, Et triumphator nobilis, Dulcedo ineffabilis, Totus desiderabilis.
Quando cor nostrum visitas, Tunc lucet ei veritas, Mundi vilescit vanitas, Et intus fervet charitas.
Jesu dulcedo cordium, Fons vivus, lumen mentium, Excedens omne gaudium, Et omne desiderium.
Jesum omnes agnoscite, Amorem ejus poscite; Jesum ardenter quaerite, Quaerendo inardescite.
Te nostra Jesu vox sonet, Nostri te mores exprimant; Te corda nostra diligant, Et nunc, et in perpetuum.
AD LAUDES.
Jesu, decus angelicum, In aure dulce canticum, In ore mel mirificum, In corde nectar coelicum.
Qui te gustant, esuriunt, Qui bibunt, adhuc sitiunt, Desiderare nesciunt, Nisi Jesum, quem diligunt.
O Jesu mi dulcissime, Spes suspirantis animae! Te quaerunt piae lacrymae, Te clamor mentis intimae.
Mane nobiscum Domine, Et nos illustra lumine, Pulsa mentis caligine, Mundum reple dulcedine.
Jesu, flos Matris Virginis, Amor nostrae dulcedinis, Tibi laus, honor nominis, Regnum beatitudinis.
IN FESTO CATHEDRAE S. PETRI.
AD VESPERAS.
Quodcumque in orbe nexibus revinxeris, Erit revinctum, Petre, in arce siderum: Et quod resolvit hic potestas tradita, Erit solutum coeli in alto vertice: In fine mundi judicabis saeculum.
Patri perenne sit per aevum gloria, Tibique laudes concinamus inclytas, Aeterne Nate: sit superne Spiritus Honor tibi decusque: sancta jugiter Laudetur omne Trinitas per saeculum.
IN CONVERSIONE S. PAULI APOSTOLI.
AD VESPERAS.
Egregie Doctor Paule mores instrue, Et nostra tecum pectora in coelum trahe: Velata dum meridiem cernat Fides, Et solis instar sola regnet Charitas.
Sit Trinitati sempiterna gloria, Honor, potestas, atque jubilatio, In unitate quae gubernat omnia, Per universa aeternitatis saecula.
IN FESTO S. JOSEPH CONFESSORIS.
IN UTRISQUE VESPERIS.
Te, Joseph, celebrent agmina coelitum, Te cuncti resonent Christiadum chori, Qui clarus meritis, junctus es inclytae Casto foedere Virgini.
Almo cum tumidam germine conjugem Admirans, dubio tangeris anxius, Afflatu superi Flaminis Angelus Conceptum puerum docet.
Tu natum Dominum stringis, ad exteras Aegypti profugum tu sequeris plagas; Amissum Solymis quaeris, et invenis, Miscens gaudia fletibus.
Post mortem reliquos mors pia consecrat, Palmamque emeritos gloria suscipit: Tu vivens, superis par, frueris Deo, Mira sorte beatior.[2]
[2] Nobis, summa Trias, parce precantibus, Da Joseph meritis sidera scandere: Ut tandem liceat nos tibi perpetim Gratum promere canticum.
IN NATIVITATE S. JOANNIS BAPTISTAE.
AD VESPERAS.
* * *[3]
Nuntius celso veniens olympo, Te patri magnum fore nasciturum; Nomen, et vitae seriem gerendae Omine promit.
Ille promissi dubius superni, Perdidit promptae modulos loquelae: Sed reformasti genitus peremptae Organa vocis.
Ventris obstruso recubans cubili, Senseras Regem thalamo manentem: Hinc parens, nati meritis, uterque Abdita pandit.
Sit decus Patri, genitaeque Proli, Et tibi compar utriusque virtus Spiritus semper, Deus unus omni Temporis aevo.
[3] Ut queant laxis resonare fibris Mira gestorum famuli tuorum, Solve polluti labii reatum, Sancte Joannes.
AD MATUTINUM.
Antra deserti teneris sub annis, Civium turmas fugiens, petisti, Ne levi posses maculare vitam Crimine linguae.
Praebuit durum tegumen camelus Artubus sacris, strophium bidentes; Cui latex haustum, sociata pastum Mella locustis.
Ceteri tantum cecinere Vatum Corde praesago jubar affuturum; Tu quidem mundi scelus auferentem Indice prodis.
Non fuit vasti spatium per orbis Sanctior quisquam genitus Joanne, Qui nefas saecli meruit lavantem Tingere lymphis.
Sit decus Patri, genitaeque Proli, Et tibi compar utriusque virtus Spiritus semper, Deus unus omni Temporis aevo.
AD LAUDES.
O nimis felix, meritique celsi, Nesciens labem nivei pudoris, Praepotens martyr, nemorumque cultor, Maxime vatum.
Serta ter denis alios coronant Aucta crementis, duplicata quosdam, Trina te fructu cumulata centum Nexibus ornant.[4]
Laudibus cives celebrent superni, Te Deus simplex, pariterque trine, Supplices et nos veniam precamur: Parce redemptis.
[4] Nunc potens nostri meritis opimis Pectoris duros lapides revelle, Asperum planans iter, et reflexos Dirige calles.
Ut pius mundi Sator et Redemptor, Mentibus culpae sine labe puris, Rite dignetur veniens beatos Ponere gressus.
IN FESTO SS. APOSTOLORUM PETRI ET PAULI.
AD VESPERAS.
Decora lux Aeternitatis, auream Diem beatis irrigavit ignibus, Apostolorum quae coronat principes, Reisque in astra liberam pandit viam.
Mundi magister, atque coeli janitor, Romae parentes, arbitrique gentium, Per ensis ille, hic per crucis victor necem Vitae senatum laureati possident.
O Roma felix, quae duorum principum Es consecrata glorioso sanguine. Horum cruore purpurata ceteras Excellis orbis una pulchritudines.
Sit Trinitati sempiterna gloria, Honor, potestas, atque jubilatio, In unitate quae gubernat omnia, Per universa saeculorum saecula.
IN FESTO S. MARIAE MAGDALENAE.
AD VESPERAS.
Pater superni luminis, Cum Magdalenam respicis, Flammas amoris excitas, Geluque solvis pectoris.
Amore currit saucia, Pedes beatos ungere, Lavare fletu, tergere Comis, et ore lambere.
Adstare non timet cruci, Sepulchro inhaeret anxia: Truces nec horret milites: Pellit timorem charitas.
O vera, Christe, charitas, Tu nostra purga crimina, Tu corda reple gratia, Tu redde coeli praemia.
Patri, simulque Filio, Tibique sancte Spiritus, Sicut fuit, sit jugiter Saeclum per omne gloria.
AD MATUTINUM.
Maria castis osculis Lambit Dei vestigia: Fletu rigat, tergit comis, Detersa nardo perlinit.
Deo Patri sit gloria, Ejusque soli Filio, Cum Spiritu Paraclito Nunc, et per omne saeculum.
IN FESTO S. PETRI AD VINCULA.
AD VESPERAS.
Miris modis repente liber, ferrea Christo jubente vincla Petrus exuit; Ovilis ille pastor, et rector gregis, Vitae recludit pascua, et fontes sacros, Ovesque servat creditas, arcet lupos.
Patri perenne sit per aevum gloria, Tibique laudes concinamus inclytas, Aeterne Nate; sit superne Spiritus Honor tibi decusque: sancta jugiter Laudetur omne Trinitas per saeculum.
IN FESTO TRANSFIGURATIONIS DOMINI.
AD VESPERAS.
Quicumque Christum quaeritis, Oculos in altum tollite: Illic licebit visere Signum perennis gloriae.
Illustre quiddam cernimus, Quod nesciat finem pati, Sublime, celsum, interminum, Antiquius coelo et chao.
Hic ille Rex est Gentium, Populique Rex Judaici, Promissus Abrahae Patri, Ejusque in aevum semini.
Hunc et Prophetis testibus, Iisdemque signatoribus, Testatur et Pater jubet Audire nos et credere.
Jesu tibi sit gloria, Qui te revelas parvulis, Cum Patre et almo Spiritu, In sempiterna saecula.
AD LAUDES.
Lux alma Jesu mentium Dum corda nostra recreas, Culpae fugas caliginem, Et nos reples dulcedine.
Quam laetus est quem visitas! Consors Paternae dexterae, Tu dulce lumen patriae, Carnis negatum sensibus.
Splendor Paternae gloriae, Incomprehensa charitas, Nobis amoris copiam Largire per praesentiam.
Jesu tibi sit gloria, Qui te revelas parvulis, Cum Patre et almo Spiritu, In sempiterna saecula.
IN DEDICATIONE S. MICHAELIS ARCHANGELI.
AD VESPERAS.
Te splendor et virtus Patris, Te vita, Jesu, cordium, Ab ore qui pendent tuo, Laudamus inter angelos.
Tibi mille densa millium Ducum corona militat: Sed explicat Victor crucem Michael salutis signifer.
Draconis hic dirum caput In ima pellit tartara, Ducemque cum rebellibus Coelesti ab arce fulminat.
Contra ducem superbiae Sequamur hunc nos principem, Ut detur ex Agni throno Nobis corona gloriae.
Patri, simulque Filio, Tibique sancte Spiritus; Sicut fuit, sit jugiter Saeclum per omne gloria.
AD LAUDES.
Christe, sanctorum decus angelorum, Gentis humanae Sator et Redemptor, Coelitum nobis tribuas beatas Scandere sedes.
Angelus pacis MichaÎl in aedes Coelitus nostras veniat: serenae Auctor ut pacis lacrymosa in orcum Bella releget.
Angelus fortis Gabriel, ut hostes Pellat antiquos, et amica coelo, Quae triumphator statuit per orbem, Templa revisat.
Angelus nostrae medicus salutis Adsit e coelo RaphaÎl, ut omnes Sanet aegrotos, dubiosque vitae Dirigat actus.
Virgo dux pacis, genitrixque lucis, Et sacer nobis chorus angelorum Semper assistat, simul et micantis Regia coeli.
Praestet hoc nobis Deitas beata Patris, ac Nati, pariterque sancti Spiritus, cujus resonat per omnem Gloria mundum.
COMMUNE SANCTORUM.
COMMUNE APOSTOLORUM ET EVANGELISTARUM.
AD MATUTINUM.
Aeterna Christi munera, Apostolorum gloriam, Palmas, et hymnos debitos Laetis canamus mentibus.
Ecclesiarum principes, Belli triumphales duces, Coelestis aulae milites, Et vera mundi lumina.
Devota Sanctorum Fides, Invicta Spes credentium, Perfecta Christi Charitas Mundi tyrannum conterit.
In his Paterna gloria, In his triumphat Filius, In his voluntas Spiritus, Coelum repletur gaudio.
Patri, simulque Filio, Tibique sancte Spiritus, Sicut fuit, sit jugiter Saeclum per omne gloria.
_Tempore Paschali._
AD VESPERAS.
Tristes erant apostoli De Christi acerbo funere, Quem morte crudelissima Servi necarant impii.
Sermone verax angelus Mulieribus praedixerat: Mox ore Christus gaudium Gregi feret fidelium.
Ad anxios apostolos Currunt statim dum nuntiae, Illae micantis obvia Christi tenent vestigia.
Galilaeae ad alta montium Se conferunt apostoli; Jesuque, voti compotes, Almo beantur lumine.
Ut sis perenne mentibus Paschale Jesu gaudium; A morte dira criminum Vitae renatos libera.
Deo Patri sit gloria, Et Filio, qui a mortuis Surrexit, ac Paraclito, In sempiterna saecula.
AD LAUDES, ET PER HORAS.
Paschale mundo gaudium Sol nuntiat formosior, Cum luce fulgentem nova Jesum vident apostoli.
In carne Christi vulnera Micare tanquam sidera Mirantur, et quidquid vident Testes fideles praedicant.
Rex Christe clementissime, Tu corda nostra posside; Ut lingua grates debitas Tuo rependat nomini.
Ut sis perenne mentibus Paschale Jesu gaudium: A morte dira criminum Vitae renatos libera.
Deo Patri sit gloria, Et Filio, qui a mortuis Surrexit, ac Paraclito, In sempiterna saecula.
COMMUNE UNIUS MARTYRIS.
_Extra tempus Paschale._
AD VESPERAS.
Deus, tuorum militum Sors, et corona, praemium; Laudes canentes Martyris Absolve nexu criminis.
Hic nempe mundi gaudia, Et blanda fraudum pabula, Imbuta felle deputans Pervenit ad coelestia.
Poenas cucurrit fortiter, Et sustulit viriliter, Fundensque pro te sanguinem, Aeterna dona possidet.
Ob hoc precatu supplici Te poscimus piissime; In hoc triumpho Martyris Dimitte noxam servulis.
Laus et perennis gloria Patri sit atque Filio, Sancto simul Paraclito, In sempiterna saecula.
COMMUNE MARTYRUM.
_Tempore Paschali._
AD VESPERAS.
Pro pluribus Martyribus.
Rex gloriose martyrum, Corona confitentium, Qui respuentes terrea Perducis ad coelestia:
Aurem benignam protinus Intende nostris vocibus; Trophaea sacra pangimus, Ignosce quod deliquimus.
Tu vincis inter martyres, Parcisque confessoribus: Tu vince nostra crimina Largitor indulgentiae.
Deo Patri sit gloria, Et Filio, qui a mortuis Surrexit, ac Paraclito, In sempiterno saecula.
AD MATUTINUM.
Christo profusum sanguinem, Et martyrum victorias, Dignamque coelo lauream Laetis sequamur vocibus.
Terrore victo saeculi, Poenisque spretis corporis, Mortis sacrae compendio Vitam beatam possident.
Traduntur igni martyres, Et bestiarum dentibus; Armata saevit ungulis Tortoris insani manus.
Nudata pendent viscera, Sanguis sacratus funditur: Sed permanent immobiles Vitae perennis gratia.
Te nunc Redemptor quaesumus, Ut martyrum consortio Jungas precantes servulos In sempiterna saecula.
COMMUNE PLURIMORUM MARTYRUM.
Extra Tempus Paschale.
AD VESPERAS.
Sanctorum meritis inclyta gaudia Pangamus socii, gestaque fortia: Gliscens fert animus promere cantibus Victorum genus optimum.
Hi sunt quos fatue mundus abhorruit; Hunc fructu vacuum, floribus aridum Contempsere tui nominis asseclae, Jesu rex bone coelitum.
Hi pro te furias atque minas truces Calcarunt hominum, saevaque verbera; His cessit lacerans fortiter ungula, Nec carpsit penetralia.
Caeduntur gladiis more bidentium: Non murmur resonat, non querimonia: Sed corde impavido mens bene conscia Conservat patientiam.
Quae vox, quae poterit lingua retexere, Quae tu martyribus munera praeparas? Rubri nam fluido sanguine fulgidis Cingunt tempora laureis.
Te summa o Deitas, unaque poscimus, Ut culpas abigas, noxia subtrahas, Des pacem famulis, ut tibi gloriam Annorum in seriem canant.
COMMUNE CONFESSORUM.
AD VESPERAS.
Iste Confessor Domini, colentes Quem pie laudant populi per orbem, Hac die laetus meruit beatas Scandere sedes.
Qui pius, prudens, humilis, pudicus, Sobriam duxit sine labe vitam, Donec humanos animavit aurae Spiritus artus.
Cujus ob praestans meritum frequenter Aegra quae pa sim jacuere membra, Viribus morbi domitis, saluti Restituuntur.
Noster hinc illi chorus obsequentem Concinit laudem, celebresque palmas; Ut piis ejus precibus juvemur Omne per aevum.
Sit salus illi, decus, atque virtus, Qui super coeli solio coruscans, Totius mundi seriem gubernat Trinus, et unus.
_Confessoris Pontificis._
AD LAUDES.
Jesu Redemptor omnium, Perpes corona praesulum, In hac die clementius Indulgeas precantibus:
Tui sacri qua nominis Confessor almus claruit; Hujus celebrat annua Devota plebs solemnia.
Qui rite mundi gaudia Hujus caduca respuens, Aeternitatis praemio Potitur inter angelos.
Hujus benignus annue Nobis sequi vestigia: Hujus precatu servulis Dimitte noxam criminis.
Sit, Christe Rex piissime, Tibi, Patrique gloria, Cum Spiritu Paraclito, Nunc, et per omne saeculum.
_Confessoris non Pontificis._
AD LAUDES.
Jesu corona celsior, Et veritas sublimior, Qui confitenti servulo Reddis perenne praemium:
Da supplicanti coetui, Hujus rogatu, noxii Remissionem criminis, Rumpendo nexum vinculi.
Anni reverso tempore Dies refulsit lumine, Quo sanctus hic de corpore, Migravit inter sidera.
Hic vana terrae gaudia, Et luculenta praedia, Polluta sorde deputans, Ovans tenet coelestia.
Te christe Rex piissime Hic confitendo jugiter, Calcavit artes daemonum, Saevumque averni principem.
Virtute clarus et fide, Confessione sedulus, Jejuna membra deferens Dapes supernas obtinet.
Proinde te piissime Precamur omnes supplices, Nobis ut hujus gratia Poenas remittas debitas.
Patri perennis gloria, Natoque Patris unico, Sanctoque sit Paraclito, Per omne semper saeculum.
COMMUNE VIRGINUM.
AD VESPERAS ET AD LAUDES.
Jesu, corona Virginum, Quem mater illa concipit, Quae sola Virgo parturit, Haec vota clemens accipe.
Qui pergis inter lilia, Septus choreis Virginum, Sponsus decorus gloria, Sponsisque reddens praemia.
Quocumque tendis, Virgines Sequuntur, atque laudibus Post te canentes cursitant, Hymnosque dulces personant.
Te deprecamur supplices, Nostris ut addas sensibus, Nescire prorsus omnia Corruptionis vulnera.
Virtus, honor, laus, gloria, Deo Patri, cum Filio, Sancto simul Paraclito, In saeculorum saecula.
COMMUNE SANCTAE MARTYRIS TANTUM, ET _Nec Virginis nec Martyris._
AD VESPERAS.
Fortem virili pectore Laudemus omnes feminam, Quae sanctitatis gloria Ubique fulget inclyta.
Haec sancto amore saucia, Dum mundi amorem noxium Horrescit, ad coelestia Iter peregit arduum.
Carnem domans jejuniis, Dulcique mentem pabulo Orationis nutriens, Coeli potitur gaudiis.
Rex Christe virtus fortium, Qui magna solus efficis, Hujus precatu quaesumus, Audi benignos supplices.
Deo Patri sit gloria, Ejusque soli Filio, Cum Spiritu Paraclito, Nunc, et per omne saeculum.
COMMUNE DEDICATIONIS ECCLESIAE.
AD VESPERAS.
Coelestis urbs Jerusalem, Beata pacis visio, Quae celsa de viventibus Saxis ad astra tolleris. Sponsaeque ritu cingeris Mille angelorum millibus.
O sorte nupta prospera, Dotata Patris gloria, Respersa sponsi gratia, Regina formosissima, Christo jugata principi, Coeli corusca civitas.
Hic margaritis emicant, Patentque cunctis ostia; Virtute namque praevia Mortalis illuc ducitur, Amore Christi percitus Tormenta quisquis sustinet.
Scalpri salubris ictibus, Et tunsione plurima; Fabri polita malleo Hanc saxa molem construunt, Aptisque juncta nexibus Locantur in fastigio.