Chapter 2

A table tout trouvoye amer Et ainsy en lieu de menger Lors entroie en haulte mer Et ne savoye que forger Mon esbat estoit de songer Ou de froter mes paupieres Et puis pour mon mal alleger Faisoye des croix aux sallieres

Damp prieur

N'aviés vous ailleurs ou jouer Ne prendre vostre esbatement Jectiés vous vostre trenchouer Point par despit ou vengement Mengiés vous tost ou bellement Je croy que n'y preniés point garde Ou quelle viande nullement Goust n'aviés tant estiés malade

L'amant

Illec point je ne demouroye Car les napes cy me soulloient Et la mort souvent desiroye Les gens m'ennuyoient qui parloient Les oyseaux mesmes qui voloient Sy me faisoient mal en la teste Jeux ny esbas rien n'y valoient Car tout me tournoit a tempeste

Damp prieur

C'est a vous trop fait d'exés Pour une plaisance mondaine Car de la viennent les assés De double fievre traversaine L'en court l'en fuit l'en se demaine Puys on a froit puis on a chault Brief les amans ont assez peine Et sy a personne n'en chault

L'amant

Helas monseigneur le prieur Il ne vous couste gueres a dire Mais ceulx qui ont sentu la doleur S'en scevent bien tenir de rire Au monde n'en est point de pire Ne de sy terrible tourment Car c'est ung fer et ung martire Qui n'a fin ne commencement

Damp prieur

Il y a ceans religieux Qui a autant de mal essayé Que vous avés et cent foys mielx Sans ce qu'il ait gueres crié Autres que vous y ont froié Et enduré plus forte chose Faire n'en fault tant l'effraié Car telz douleurs ne sont que rose

L'amant

Rose sire bon gré saint george Il n'y a point comparaison Car qui auroit boce en la gorge L'en auroit plus tost guerison Que d'une telle traison Qui perce les os jusque aux anches Il n'y a rime ne raison Quant on a telles fievres blanches

Damp prieur

La fievre cy grant ne puet estre Que cy d'aventure la belle Cy vient de nuyt a la fenestre Voit le povre gallant qui veille Et qui a la puce en l'oreille Qu'il ne soit sur piés guery D'un brin de girofle vermeille Celle luy jecte tant soit marry

L'amant

Je croy bien que le mal apaise Ung petit quant le bien luy vient Mais ceste joye cy tourne en noise Sy le lendemain il advient Q'un autre compaignon survient A qui l'en face belle venue Et que de la fievre revient Qui double en fievre continue

Damp prieur

Il n'y a remede soudain Que faire bouter les destriers Et mener tart sur le serain Tabourins herpes menesteriés Pour esveiller leur arglentier Et les esperis de dormir Illec se monstrent cueurs entiers L'en a point telz biens pour gemir

L'amant

Dormir sire las l'on a garde Mais d'aller ainsy aveuglectes L'on chiet qu'on ne s'en donne garde Sus ung seul plain de perrettes Ou l'en rond la ses esguillettes Prenés qu'il y ait grant dangier Pour les limons de ses charettes Et les tronches des boulengiers

Damp prieur

Quant on va de nuyt par les rues Et l'on n'ose clarté porter Il se fault garder par les nues Qu'on voit au ciel courre et troter Et les estaux qu'on deust tater En tenant la main a l'esguet Sans l'uys de la dame hurter Car il y a dangier pour le guet

L'amant

A monseigneur vous appliqués Le mal en autre entendement Et me semble que vous moqués Ou que ce soit esbatement Qu'on passe ainsi legierement Mais quant a moy point ne m'en loue Car l'en treuve assez largement D'autres esbas ou mieulx l'en se joue

Damp prieur

Vous vous plainiés de saine teste Et avés pensees trop legieres Quelx troux avés vous en la teste De porter harnoys et banieres Couchates vous onc aux goutieres En caves ou en souppiraux En eschellant huys et verrieres Car de la viennent les grans maulx

L'amant

En plus grant dangier la moytié Me suis trouvé et dur passaige Sans ce que on ait eu pitié Ne fait ung seul bien d'avantaige Brief se eusse sceu le pellerinaige Dont remede me fust venu Pour obvier a telle raige Je y eusse esté avant tout nu

Damp prieur

Gueres n'y sere le pelleriner ains tousjours les doleurs s'entretiennent L'on puet tant qu'on veult cheminer Ceulx qui s'en vont après reviennent Car il fault que secours obtiennent De celle qui navré les a Ce sont canes qui vont et viennent A qui en prend bien il en a

L'amant

J'en ay esté a tel destroit Que ne savoye ma contenance Ne se estoit court large ou estroit Autant mestoit dueil que plaisance Je mectoye du vin en ma pance En gratant souvent mes cheveux Et puis escripvoye esperance Contre ung mur en dueil angoisseux

Damp prieur

Ne reposiés vous grain ne goute Je croy que non sy m'aist dieux Ains renunsiés draps lis coute A terre le plus et le mieulx Car ne trouviés place ne lieux Pour dormir endroit ou envers Ne qui eust gardé vos yeux D'estre toute la nuyt ouvers

L'amant

Les heures de la nuyt comptoye Sans reposer ne sommeiller Et aux guerres tant me boutoye Que me trouvoye chevalier Et tençoye a mon orillier Et faisoye chasteaux en espaigne Puys avoye a mon resveillier Belles estuves d'alemaigne

Damp prieur

Se vostre dame eust sceu ou veu De vos aspres maulx la moitié Je croy moy qu'elle y eust pourveu Tout empeschement rejecté Car il n'est cueur qui n'eust pitié De veoir endurer tel tourment A vous n'ay couroux n'amoitié Mais sy m'en fait il mal vrayement

L'amant

Helas d'elle ne me plain mye Ains m'en loueray a tousjors mais La tien ma dame et m'amye Sans ce que je l'oublie jamais Aussy de mon mal ne puet mais Se fait male bouche et dangier Qui m'ont par ung dur entremais De sa grace fait estrangier

Damp prieur

En vous est failly esperance Et vous tiens de lache couraige Car se brief faisiés diligence Vers amours qui est doulx et large Il vous eust rendu d'avantaige Cent foys plus que n'avés perdu Et pource se faictes que saige Yrés a elle a bras tendu

L'amant

J'en ay fait tout ce qui fault faire Mais tout ce n'y a riens valu Car ces gens la pour me deffaire Ont mon bien et honneur tolu En faisant comme ilz ont voulu Tourner a leur poste le vent Encore quant m'en suis dolu L'on m'a fait pis que par devant

Damp prieur

Toutesfoys sy a il justice Bien gardee sur le fait d'amours Et y regne bonne police Comme vous sçavez tous les jours Je croy bien qu'il vient des doulours Ou l'en n'y puet remedier Mais venus qui oit les clamours Y pourvoit qui l'en veult prier

L'amant

Jamais n'en vueil nul requerir De cela soyés tout conclus Ains mon entente est de mourir Ceans cordelier et reclus Tout espoir est de moy exclus Vienne la mort quant elle vouldra Du temps passé ne m'en chault plus Je suis prest quant a dieu plaira

Damp prieur

Heelas povre malheureux Tu perdras icy ta jeunesse Et tous les biens adventureux Dont amans viennent a richesse L'ostel est fondé de tristesse Regarde ou tu te veux bouter Se le fais dy adieu leesse Et sy ne t'en pourras oster

L'amant

Ja pour vostre dure responce Mon cueur ne s'en esbahira Quant aux biens d'amours je y renonce Prenne chascun ce qu'il vouldra Ma vie en desert finera Car il m'ennuye ja au monde Ne mon vouloir n'en changera Pour quelque personne qui gronde

Damp prieur

Le fort n'est pas la voulenté Ainçois a la vertu que aurés Et sachés que serés tempté Par mains assaux que recevrés Peine et misere trouverés En lieu de joye et de plaisance Quand vouldrés menger junerés Qui est tresdure penitance

L'amant

S'il plaist a dieu il m'aidera A endurer et supporter La peine ja ne desmouvera Mon cueur de son vouloir oster Et pour la verité compter Je fait veu des long temps d'y estre Et avoye fain de my bouter Des l'aage que me puys congnoistre

Damp prieur

C'est grant chose que de promesse Et d'y avoir devocion Mais se vous saviés la detresse Qu'on y seuffre et l'afliction Vous mueriés vostre intention Qui est sy ferme a demourer Aussy vostre complection Sy ne le pourroit endurer

L'amant

Vous le dictes pour m'esprouver Veu que assés savés le contraire Et sy sauriés reprouver Tant l'ordre qu'on m'en peust retraire L'on m'en a beau crier et braire Ce qu'ay promis je vueil tenir Ne n'entens prendre autre repaire Vienne qui en pourra venir

Damp prieur

Comment vous qui avés gouté Tant d'onneur au monde et de gloire Prendriés vous yver pour esté Et en lieu de bon temps misere Il vous fauldra porter la haire Aller nudz piez sur les espines Juner plourer veiller et braire Sans faillir nul jour a matines

L'amant

Tort avés ung petit beau sire De vous en chagriner sy fort Attendu qu'il n'y a ceans frere Qu'il gueres soit de moy plus fort Pas n'y viens par joyeux confort Ains pour mener vie solitaire Pour quoy sy ne vient plus auffort Je sçay bien ou me dois retraire

Damp prieur

La difficulté n'est point la Ains a ce que vos gens diront Qui ont port faveur ça et la Croiés que malcontens seront Ne que a grant peine feront Vous rendre sy a tousjours mais Et sy contre nous murmuroient Jaçoit ce que n'en povons mais

L'amant

Qui en religion se boute Parens ne amis ne doibt croire N'au contraire les ouyr goute S'il ne se veult perdre et deffaire A veux premier fault satisfaire Leurs cas pas ne me sauveront Chascun doit pencer de bien faire S'ilz en crient ilz s'appaiseront

Damp prieur

Or voige bien que pour parolle Ne pour rien qu'on vous sceust prescher Ne vous osteriés de la cole Ou vostre cueur se vuet ficher De quoy je vous ayme plus chier Beaucoup de vraye amour formant Et tant que pour vous despecher Je m'en voys parler au couvent

Damp prieur

Ainsi damp prieur s'en alla Le tymbre et les freres sonner Puis bien avant sy leur parla Comment venoit de sermonner Cest amant qui vouloit donner Leans cueur corps et tout le sien Pour ses derniers jours finer En leur en disant mout de bien

Damp prieur

Si que par son tresgrant raport Les freres estans en chapitre En furent contrains et d'acord Et le commencerent a benistre Et a dire pour son bon tiltre Des biens une grant legion Esperant grand prouffit en ystre Pour toute la religion

Ce fait damp prieur retourna Pour les nouvelles tost luy dire Et en l'appellant s'enclina En commençant a luy souzrire J'ay bien besongnié pour vous sire Le couvent sy vous recevera A l'ordre sans y contredire Venés y quant il vous plaira

Quant m'a esté enchargié De vous exposer et compter Que nostre hostel est tant chargié De gens qu'il n'en peult plus porter L'en ne saura mais ou bouter Tout est plain de freres dieu grace Mais s'on en devoit hors jecter Sy aurés vous logis et place

Aussy plus pour estre certain De ce que a besongner aurés Vecy damp dueil le secretain A qui vous en conseillerés Aussy souvent vous esbatrés A lire en ce petit livret Ou nostre rigle treuverés Et comment l'en doit sieans vivre

L'amant

Voulentiers dist il monseigneur Se dieu plaist j'en feroy devoir Et vous remercie de lonneur Que vous a pleu me faire avoir A moy n'a pas tant de savoir Que je le sceusse bien comprendre Mais dieu qui chascun fait pourvoir le vous vueille en sa gloire rendre

Ainsy cest amant fut logié Et faisoit liberallement Ce qui luy estoit enchargié Dont tous l'amoient entierement Cy endura lors grand tourment Car a l'entree paye on la disme Mais tout portoit paciamment Sans en faire semblant ne sisme

Toutesfoys a une journee Du prin temps qu'on dit sur l'erbette Damp prieur vers l'après disnee Sy trouva a sa saincturette iii ou iiii brins de violette qu'il portoit pour seignier ses heures Dont grant cririe fut lors faicte En le ramenant bien des mures

Cy fut le povre homme effrité Je vous assure et bien esprins Combien qu'a dire verité Il n'avoit pas trop fort mesprins Car pensés qu'il avoit aprins A porter boucqués et sentir La les plus rouges y sont prins Ne ne puet bonne amour mentir

Quant a ung soir bien sur le tart On faisoit visitacion En allant fut prins a l'escart Au pré de recreation Ou la pour consolacion Sy faisoit bien les espernades En lisant par devocion Ung livre tout plain de ballades

Cella sceu la cloche en sonna Pour tous les freres assembler Dont en soy bien l'imagina Commençant tresfort a trembler Mais il ne se povoit embler Par quoy vint prendre discipline En confessant sans soy troubler Estre de pugnicion digne

Oncques puis au train ne tourna Ains fist merveilles de bien vivre Et brief sy belle vie mena Que nul ne le pourroit consuivre Et qu'après ce qu'il fut delivre Du temps qu'on doit porter le fais L'en le vint prier et poursuivre De vestir et d'estre proffais

De ce fut content et joyeux Comme sil qui le desiroit Mais pour faire la chose mielx Il dist bien que il rescriproit A ses parens et manderoit Le jour prins a faire la feste Affin d'y venir qui vouldroit Sans leur en faire autre requeste

Quant ilz en sceurent les nouvelles Chascun d'entre eux fut tost monté Et y eut dames damoiselles Estranges et de parenté Qui par euvre de charité Et pour lonneur de sa personne Vindrent a la feste a planté Car c'estoit une belle aumosne

Entre icelles en congneuz une Dont me prins a ymaginer Quelle maleureuse fortune Avoit l'amant la fait donner Et qui m'en fist souspeçonner Fut qu'elle estoit vestue de dueil Et que sans partir ne tourner Elle avoit sur luy tousjours l'ueil

Helas elle eust beaucoup mielx fait Se durant la prosperité Elle eust de quelque bien parfait Le povre homme reconforté Car lors avoit perdu santé Et le veu de l'ordre entrepris Rien n'y valloit la voulenté Le conseil en estoit ja prins

Plusieurs de ces dames la vis Qui de l'ordre cy caquetoient Bien a leur aise et a devis Et des religieux qui y estoient Disant que telz gens sy mettoient Povres amoureux aux a patis Et que se plus mes caquetoient Ilz en feroient grant abatis

Les unes mauvais cordeliers Les appelloient par desplaisance En disant d'eulx maulx a milliers Par dieu se j'avoye puissance Se disoit une et habondance D'enfans sy ung n'en auroit pas Brief elle perdoit pacience De l'amant qui passoit le pas

Chascun et chascune disoit Des biens de luy moult largement N'a nulles des dames plaisoit Qui se rendist aucunement Ains maudissoient tresaprement ceulx qui l'avoient mis en ces termes Et en veis une soudainement Plourer des yeux a grosses larmes

Ceste la souvent lamentot En ramentevant la grant chiere Ou autresfoys trouvee s'estoit Son maintien sa doulce maniere Et comme des bons la baniere Par ses biens fais devoye porter Dont l'en avoit du mal arriere Tant que l'on povoit supporter

Las il estoit sy amiable Se disoit l'autre ma cousine Tant doux tant humble tant amiable Et de trop plus grant bien digne Quant il m'en souvient je m'en signe Je n'eusse sceu veoir son party Que cueur ou tant de bien l'on fine Eust esté sy tost amorty

Or est il du monde aboly Ne sçay ou le mal luy tenoit Mais son sens avoit trop failly Car quant le bien sy luy venoit Et qu'amours se determinoit Le compencer du temps passé Dont aux dames bien souvenoit Il a a leur service faulcé

Las il advient communement Que telz gens qui sont ordonnés A faire des biens largement Aux dames a qui sont donnés Se sont les premiers obstinez A eux rendre a ung hermitaige Mais ceulx par qui la sont menés En deveroient porter le dommaige

Ainsi l'un a l'autre en passant Sy en disoit sa ratelee Voire d'un langaige perçant Aussy agu q'une galee Dont l'ordre estoit bien ravalee En la blasmant en mainte sorte Le long du chemin et alee Et y furent jusques a la porte

Or le jeu fut a la ouvrer Car a l'entree doibt on savoir Que femmes ne s'osent trouver En la religion pour veoir Fors pour leurs parens recevoir Et sy en fault c'est chose vraye Du souz prieur congié avoir Que l'on appelle rabat joye

Si que les parens et amis Pour les femmes licence obtindrent Que n'eusse leans le pié mis Que vi cordeliers qui vindrent Tost au devant d'eux et les prindrent Deux a d'eux chascun par les mains Et au monstier grant temps les tindrent En parlant de dieu et des sains

Après quant ilz furent las d'estre En l'eglise et au parlouer Ils les menerent veoir le cloistre Et de la aussy au dortouer Puis ilz vindrent au refretouer Plain d'imaiges en pourtraiture Ou avoit sur le dreçouer Une grande mort en painture

Sy en a en la compaignie Qui leurs parens vous demanderent Ce qu'on ne leur octroya mye Ains les freres leur refuserent Mais pour eulx sauver remonstrerent Qu'ilz estoient lors en oraison Et a tant la nuyt s'en allerent Chascun gesir en sa maison

Lendemain qu'il estoit dimenche Que l'en devoit faire la feste Dont chascun de voulenté franche A l'eglise venir s'apreste Sy eussiés ouy grant tempeste Et veu tant de gens pourmener Qui rompoient au prestre la teste A peine s'y povoit on tourner

Assez tost la messe chanter Fist l'en ou il eut grant mistere En laquelle devés noter Que l'amant en ung oratoire Estoit la tendu de soye noire Ouvré aparans fleurs d'acolies Puis sur luy avoit ung suaire Tout couvert de merencolies

Après ceste grant messe dicte Damp prieur sy le vint querir Portant en sa main l'eaue beniste Comme pour le mener mourir Et gens au devant de courir Pour veoir la maniere du fait Mais il sembloit qu'il deust perir Tant estoit ja mort et deffait

Tout le nez blanc comme salpestre Avoit et le vis deschiré N'ame si ne l'eust sceu congnoistre Qui ne s'en fust bien près tiré Brief estoit bien fort empiré Car n'avoit membre sur le corps Qui ne fust tout desfiguré Et les yeux tous batus et mors

De la fut mené en chapitre Habillié tressauvagement D'une fraquonne a façon de mistre Et le surplus du vestement Estoit de blanc entierement A grandes manches a goutieres Bien saint et cueilly proprement Devant coqueluchon derriere

Puis au chapitre le suivirent Tous les gens de sa parenté Ou deux cordeliers les assirent Chascun selon sa dignité Les freres estoient d'un costé Les parens et parentes d'autre Voire en sy grande quantité Que l'en ne veoit l'un pour l'autre

La fut le povre amant assis Tout seul apart sus une selle Ou moins regart fut lors assis Des ungs et d'autres a merveille Dont y eut a l'assemblee telle Qui sans faire grant mouvement En gratant souvent son oreille Et en plourant mout tendrement

Quant damp prieur fut en sa chaire Devant tous se print a prescher Des grans biens du monde et de l'aise Qui y fait les gens trebucher Et comment la mort sans huchier Vient acoup sans heure certaine Que après lever il fault coucher Pour monstrer que tout vient a peine

En oultre prescha des doulours Qui vient de joye transitoire Mais il ne parla point d'amours Aumoins dont j'en aye memoire Aussi n'en avoit l'en que faire Consideré l'adversité Ains valloit mielx beaucop se taire Car peut estre qu'on eust tout gasté

Assez le sermon sy dura Pendant lequel une foys loyel De la main vers celle tira Qui pour luy sy menoit grant dueil Puis fist semblant d'avoir sommeil Baissant la teste pas a pas Toutesfoys en devint vermeil Et sy croys qu'il n'y pençoit pas

Après ce service finé Damp prieur la fist apporter Ung vueil habit de gris tanné Qu'on doibt selon l'ordre porter D'autre part fist l'abit bouter Que l'amant au monde vestoit En commençant a l'ennorter De dire auquel il s'arrestoit

Vous avés dist il liberté Aage parfait et congnoissance Vecy l'abit de vanité Vecy celluy de penitance L'un tire a dueil l'autre a plaisance D'un bien de l'autre mal aurés Se tandis qu'avés la puissance Prenés lequel que vous vouldrés

Lors dist par sa dure responce Je vueil la vie du cordelier A cestuy du monde je y renonce Sans jamais plus m'en habiller Sique on le fist desabiller Tout nud et la devant tant dieux Pour le vestir en cordelier Et ainsy fut religieux

Quant tous les hommes et les femmes Le veirent tout nud despouiller Des yeux jecterent grosses larmes Assés pour ung jardin mouiller Esvanouyr et petiller En eussiés veu qui est grant chose Et tant que pour les resveiller Il couvint troys sextiers d'eau roze

Ne a peine croiré je jamais Que se cordelier fust rendu Eust veu le piteux entremés Ou l'oeil sur l'une est estandu Que son cueur ne luy fust fendu En plus de deux mille parties Et qu'il n'eust cy prins cy pendu Jeté la son froc aux orties

Sa dame sy faisoit semblant D'assés tost le dueil en passer Mais lors une fievre tremblant La vint de sy près embrasser Que a terre la fist renverser Tant fut la fievre forte et aigre Par quoy la fallut deslasser Chauffer et froter de vin aigre

Tout le monde après se leva Pour a la rescousse venir Et sy remede on y trouva Fors qu'on fist a elle venir Le cordelier pour luy tenir La teste et bailler du triacle Qui luy fist son cueur revenir Et dist on que ce fut miracle

Mais ainsi qu'on la delaissoit Illec tumba de son secours Ou des manches de son corset Ung cueur d'or esmaillé de plours A elle baillié par amours Du temps qu'avoit le vent au popre Dont l'amant sy eut grant douleur Et l'en veit l'en batre sa couppe

Les autres pour leur mal couvrir A force leur cueur retenoient Passans temps a clorre et l'ouvrir Les heures qu'en leurs mains tenoient Dont souvent les fueilles tournoient En signe de devocion Mais les deulz et pleurs que menoient Monstroient bien leur affection

Or après ses misteres fais Se povre amoureux vint requerre A damp prieur d'estre profais Soy jectant a ses piés a terre Sy que damp prieur envoye querre Le livre des veux qui fault lire En luy commençant de cest erre Telz motz et parolles luy dire

Tout le premier veu ordinaire De ceans est obedience L'autre povreté voluntaire Dont viennent junes et penitance Pour vertus avons pacience Et chasteté qui est la plus haulte Sy jurés a vostre consience De les garder sans point de faulte

Aussy vous faites veu a dieu Que a l'ordre vivrés et mourrés Sans jamais partir de ce lieu Sinon quant le bissac porterés Et quant pour le couvent yrés Querir l'aumosne et pourveance Ne q'un pas oultre passerés Se n'avés congié et licence