Part 1

Anmerkungen zur Transkription

Das Original ist in Fraktur gesetzt. Im Original in Antiqua gesetzter Text ist ~so ausgezeichnet~.

Weitere Anmerkungen zur Transkription befinden sich am Ende des Buches.

Pfaffernüsseln.

Allerlei Erzgebirgisches

von

Max Wenzel.

H. Thümmlers Verlag, Chemnitz. 1922.

Dr Kanaritzvugel.

Net bei jeden Menschen gilts als Schmeichelei, wenn's häßt »'r hoot en Vugel«, oder bein Beier-Wilhelm seiner Fraa war dos ewos annersch, die wollt garn en hobn, un ihre größte Sehnsucht war e Kanaritzvugel. 's is doch esu: 's ka aner erngd ewos racht nutwendig gebraung, oder 'r möchts garn hobn un 'r hoot aah 's Gald drzu -- do werd gewart bis Weihnachten is, dann kriegt 'rsch oder kaaft sichs salber. Dä dann hoot die Sach erscht en richting Wart. Un bei manning Zeig, wu sich sinsten de Leit waang dan grußen Galdausgobn aufhalten täten, do häßts: »Dos hoo iech ze Weihnachten kriegt«, un geleich sei de Mäuler gestoppt.

Wie gesaht: De Beier-Ella wollt garn en Vugel hoobn un dr Wilhelm -- oder vielmehr de Kinner -- wollten aah en kaafen. Wenn de Kinner ihre Sparbüchsen ausräumeten un dr Wilhelm noch ewos draufleget, do konnts Gald gerod lange. Nu freget sichs när, wu dar Kanaritzvugel gekaaft wür?! Do hatt nu bal jeden Toog vir Weihnachten in Wochenblatt e Azeich gestanden.

~Kanarienvögel von 6.-- Mk. an empfiehlt Ludwig Kohl.~

Dadraufhie warn de Kinner alle dreie schie lang vir Weihnachten emol nunner zun Kohl gerückt un hattn sich die Vögele alle aagesah. Se warn aah of en setten gaalen Schperlich zugekomme, wu dr Kohl saht, dos wär sei bester Roller.

Jeden Ohmd nu, dan Gott warn ließ, wenns Wochenblatt kam, un de Ugelicker viergelasn wurn, do konnt mer Gift drauf nahme, daß ens die Azeich vierlasen tat: »Kanarienvögel von 6 Mark an empfiehlt Ludwig Kohl«. Der Wilhelm konnt sich net soot wunnern, daß seine Ella net aufstützig wur. Na endlich, an Tog virn heiling Ohmd, machet 'r salber nunner ben Kohl. Bal e Stund hatt'r zugehorcht, öbs net epper noch en bessern gäb, wie dan, dar'n Kinnern esu gefalln hatt. Zeletzt wur 'r vu darer ganzen Rollerei ganz drehet, un 'r hätt e Brummeisen net mehr vu en Harzer Kanaritzroller unnerscheiden könne. Do ließ er sich dan En eipacken un machet mit sen Bauerle ehem.

Nu war när die ene Verlaanghät: Wu schpert mer derweile en setten Vugel hie, daß de Ella nischt merken sollt?! Wie sich dr Wilhelm e paarmal ümgesah hatt, stellet 'r dan klen Holzkäfig unten nei in Klederschrank in dr Stub. 'r ließ oder de Tür e Fünkel auf, daß dos Vögele a Luft krieget. De Ella hatt vu darer Geschichte nischt gemerkt. Die decket ne Tisch zun Ohmdassen wie alle Toog. Ueber ewos konnt se sich argern: Allemol wenn se an Klederschrank verbei machet, war de Tür auf. Se saht bluß noch ewos von Motten neikomme un von zuschließen. Do hoot dr Wilhelm geleich ne Schlüssel oogezung, daß dos net ging. Se soßen nu alle üm Tisch rüm, un de Ella mit'n Buckel nooch dan Klederschrank. Se tat ne Wilhelm un ne Kinnern erscht e paar Ardeppeln schäln, do höret se of emol in dr Gengd vu dan Klederschrank ewas rascheln. Do stutzet se erscht, dann saht se: »Mir missen e Maus in der Stub hobn!« Der Wilhelm tat se beruhing: »Wu solln dä de Mäus harkomme. Meitwaang kast de aah de Fall emol aufstelln«. De Ella wollt dos oder net machen, se mänet, mer tät sich allemol de Finger esu dermiet zerschmeißen. Dos Vögele in Schrank huppet nu oder doch in senn Holzkäfig rüber un nüber, un de Ella dacht schie, dos könnt net bluß ene Maus sei. Se grauet sich schie, wenn se dra dacht, wu die Mäus könnten überall gewasen sei, un in jeden uschulding Kimmelkörnel soog se ewos annersch.

De Kinner konnten bal vir Lachen net, oder se ließen sich nischt marken. Do höret mer mit enmol aus dan Klederschrank en Piepertz. Alles horchet auf, un de Ella wollt gerod soong: »Nu dos hört sich doch oder -- --«. Do bläket of emol dr Wilhelm in dr Richting nach dr Schranktür zu: »Ruhig bist de!« 'r hatt net bedacht, daß in darsalben Richting sei Ella soß. Die wur en Schein dunkler un saaht e finkel verwunert: »Was soll dä dos häßen?« Do piepset dar Vugel noch emol -- un geleich bläket dr Wilhelm: »Ruhig sollst de sei!« De Ella wur in Gesicht kitzeblaa vir Arger un wie se nu noch soog, daß aah de Kinner ganz lacherliche Gesichter machen taten, schrier se: »Nu, dos is mr oder doch außern Spaß, en aah noch vir de Kinner lacherlich ze machen --«. Do piepset dar Vugel noch sehrner, un dr Wilhelm bläket mit aller Lungekraft: »Ruhig sollst de sei! sinst dreh ich drsch Genick üm!« Do warsch mit dr Ella ihrer Gemietlichkeet verbei. 's Wasser sterzet 'r aus de Aang, un se heilet gerod naus: »Dos hoo ich net üm eich verdient, daß 'r en wie en alten Ochs aabläkt, un ihr Kinner sitzt do, als wollt 'r en auslachen. Nä, ich gieh fort, ich bin net eier Krautstrunk. -- -- --«. Dar Kanaritzvugel schien när of die gruße Red gewart ze hoobn, dä of emol schlug 'r en Roller auf, erscht dreßig Tön nauf, dann tat 'r erscht e vertel Stund lang trillern, dann machet 'r sei Letter wieder runner. De Ella sperret Maul un Nos auf, de Kinner schriern gerod naus, un ne Wilhelm blieb nischt annersch übrig, als dan Vugel aus'n Klederschrank rauszehuln. Un dar trillret un jublet fort, un in dan fein Gesang wur aah dar ganze Familienzwist begrobn.

De Bähmische.

Daß de kläne Mahd ze Weihnachten ene ganz feine Pupp krieng sollt, war bein Meinertfritz un seiner Paula ausgemachte Sach. 's war noch zu darer Zeit, wu mer noch mit Zohln rachne tat, die e halbwager Mensch ahören kaa, uhne daß'r erscht en Schnaps genießen muß, daß mer net ümfällt. Wos heitzetog e sette Pupp kost, do hätt mer vir zah Gahrn en leidling Kläderschrank drfür kriegt. Oder wie gesaht, dr Fritz un seine Paula wollten sich's ewos kosten lossen, se wollten abn ene racht feine Pupp kaafen. De Paula war e paarmol noch Chamtz gefahrn un hatt sich ümgesah, un endlich hatt se doch in en Loden Puppen gesah, die halbwags noch ihrn Geschmack warn. Aah dr Fritz hatt jed's Schaufenster dodraufhie gestudiert, un er trauet sich aah zu, daß'r bei dan Geschäft miet neireden konnt. Se hatten sich aah Katelog schicken lossen -- korzgesaht, e Pfaarhanler kaa üm en neue Pfaar aah net mehr rümlaafen, wie dr Fritz un seine Paula um darer Puppengeschicht. De kläne Mahd war erscht drei Gahr un 's log ewos in ihrn Wasen, wos de Eltern bestimme tat, e Pupp ze wähln, die en Puff vertroong konnt. Se hatt schie e Pupp, die hatt e setts rut un blaa karrierts Röckel aa, un do hatt emol äs gesaht, se sög aus wie aus Bähme. Dodervu hatt de Pupp en Name kriegt: se hieß bei dr klän Mahd un aah bei de Grußen när »die Bähmische«. Schie soog se merklich net aus! E Gesicht hatt se bal gar net mehr, un wenn net de Arm un de Baa gewasen wärn, hätt mer net gewußt, wos ubn un unten war; wos hinten un vorne war, konnt aah e Dokter bei darer Pupp net mehr unerscheiden. Se hatt aah an racht verschiedene Stelln ihrn Aufenthalt. Emol schlief se in Kuhlnkasten, emol in Karnickelstall, dronnernei hatt se de kläne Mahd aah emol in Wasserschaffel neigetunkt, weil die kläne Mahd für Reendlichkät war. Dos wachselvolle Labn hatt natürlich allerlä Spurn zerückgelossen, su doß dr Fritz un seine Paula werklich Racht hatten, wie sie dachten, e neue Pupp wär ewos Nutwenigs. Wie's Harbest wur un de kläne Mahd draußenrüm aafing ze friern, hatt de Bähmische e bessere Behandling, ja se wur sugar ohmds miet nei ins Bett genomme. Kläne Kinner graue sich, Gott sei's gedankt, vir nischt; oder de Großen dachten doch, daß hächste Zeit wär, daß dr Ruprich dar klän Mahd e neue Pupp brächt.

Un en Sonnohmd vir Weihnachten fuhrn dr Fritz un sei Paula wuhlgemut nei noch Chamtz. Der Fritz hatt noch soot Gald eigesteckt un de Paula hatt 's gruße Marktnetz miet -- vielleicht konnt se's doch gebraung. Erscht hoobn se in Automatenrestaurant e Brutel gassen, dann ging's in de Geschäfter. Puppen gob's soot un genung. Käpp vu Porzella, Wachs, Pappje un aah sinst net uracht. Oder die Eltern dachten alle bäde: Dos is nischt fir unnere kläne Mahd, e setter Kopp werd kaum ne heiling Ohmd überstiehe. Nu ging's in en anern Loden nei, do warn nu aah Puppen aus Stoff, mit richting Gesichtern, -- die warn drauf berachent, daß se aah emol an de Wand gewichst warn konnten. Un schiene Klaadle hatten die Puppen aa, -- alles war racht, när dos Gald! Dar Dingerich in dan Loden hiel ne Fritz e gruße Red, daß mer endlich aah derhinnerkomme sollt, daß ne klän Kinnern net vu klä auf dr Geschmack verdurben wür. E sette Pupp wär künstlerisch un de Kinner hätten en natürling Kunstinstinkt, die griffen när nooch dan, wos natirlich un gut wär. Ne Fritz tot des e finkel eilechten. Sei kläne Mahd griff werklich noch alln. De Paula saht sich odr in Stilln: Unere greift werklich noch alln, wos natirlich is, oder dos is net allemol gut.

Un wie dar Maa noch e Vertelstund geredt hatt, do wärn sich dr Fritz un de Paula fei halb tottend virgekomme, wenn se net die Pupp fir 25 Mark kaaft hätten. Dar freindliche Maa saht aah noch, se kännten die Pupp doch net esu frei hiestellen, do gäb's geleich noch sette feine Rohrstühl drzu; de Kinner wärn wie verwerrt drauf un der Preis wär esu niedrig, -- 'r schamet sich bal, ne laut ze soong. Der Fritz un de Paula dachten zwar, 's wär noch Gald genung, oder weil se dan Harrn net betrüben wollten, hobn se dos Korbstühle noch gekaaft. Se sollten aah noch en kleen Puppenkläderschrank mietnahme, oder dr Fritz saht, 's müßt doch net alles of emol sei, de kläne Mahd hätt aah emol en Geburtstoog. Der Maa saht noch: »Na, die Kleine wird sich riesig freuen, Sie werden sehen, alles andere sieht sie gar nicht an«.

Die bäden warn richtig stolz, wie se aus'n Loden nauswarn. Un wie se ohmds ehämkame, do wur de Pupp noch emol ausgepackt un nei in dan Stühle gesetzt, dos mußt när esu sei.

Daß vir Weihnachten de Grußen oft schlachter sei wie de Kinner, is e alte Sach. Der Fritz wollt alle Toog virn Zebettgiehe dr klän Mahd de Pupp emol hietue, oder weil de Paula net mietmachen wollt, ließ 'rsch sei. Oder de leere Schachtel hootr doch emol hiegelegt, oder esuweit war dr klän Mahd ihr guter Geschmack noch net, daß se do mehr drmiet gemacht hätt, als ihre Bähmische nei ze Bett ze legen. Un se bläket gerodnaus, wie de Bähmische ihr Bettel wieder räume mußt. Der Fritz machet sich noch emol en Spaß, 'r machet emol ohmds de Tür e finkel auf un stecket fix die neue Pupp emol rei un zog se schnell wieder naus. De Paula saht: »Du bist e finkel olber!« De kläne Mahd schie oder net genau hiegesahe ze hobn, die saht: »De Bähmische!« Esu zärtlich war se in ganzen Gahr net mit ihrer Pupp gewasn wie gerod itze. Se gob se gar net mehr aus dr Hand. Alles, wos de kläne Mahd machet, mußt de Bähmische aah mietmachen: Kaffeetrinken, Supp assen, boden, schlofen un esu weter. Daß die Pupp hinnrhar net schenner wur, ka sich wuhl e jeds denken, un de Paula un dr Fritz warn sich enig, daß de höchste Zeit wur, daß dr heilge Ohmd käm, un dr klän Mahd ihr ageburner guter Geschmack endlich emol dorchbrachen tät.

Un dr heilge Ohmd kam! De Beschering war aufgebaut, de Peremett lief ümering, dr Christbaam strahlet, dr Lechter brannt -- un in dr Mitten drinne stand dos Korbstühle mit dar teuren Pupp. Der Fritz hatt dr Klän de Bähmische ogewässert un hatt se nei in Kommodenkasten geta. Odr de kläne Mahd, die ellä in dr Küch bleibn mußt, bis alles hargerichtet war, bläket esulang, bis se ihre Bähmische wiederkrieget.

Endlich ging nu de Tür auf un de kläne Mahd machet nei. Wenn die beeden Alten eper gedacht hatten, se wür sich geleich of de neue Pupp sterzen, do hatten se sich verrachnet. Erscht stand das kläne Wasen wie betöppert, wie's die vielen Lichteln soog. Dann machet se hie zur Peremett, weil die doch ümering ging. Se wollt gleich e paar Mannle aus'n Christgartn wagnahme, se konnt oder zun Gelück net drzu. Dann machet se zun Christbaam hie. Se tats ne Alten gar net ze Gefalln, die neue Pupp aazegucken. Un immer schleppet se ihre Bähmische an en Bänel hinner sich har. Endlich wursch ne Fritz ze olber, 'r nahm de kläne Mahd bei dr Hand un zerret se an dos Hauptgeschenk hie. Do blieb de Kläne traten. Se machet gruße Aang un gucket sich die Pupp aa. Dann -- of emol -- en Griff -- un se feiret die teure neie Pupp unners Kanepee nunner, un in dos Stühle nei setzet se stolz -- ihre Bähmische.

De beeden Alten standen drbei un brachten 's Maul net wieder zu. Ja, 's hoot sen Teifel mit dan berühmten natürling Geschmack vu de Kinner!

Dr letzte Haller.

Ein Watter war draußen, wie lang kä's gewasen war. Dr Sturm heulet un schmiß Aest un Sand in dr Luft rüm. Un drzu regnet's, als wenn's Kühgunge wärn, wie mer spricht. Der Wald krachet un stöhnet, un de Wag warn de ren'n Schlammbäch. Dar gunge Maa war werklich racht ze bedauern, dar gerod dorch'n Wald of'n Schottenbarg machet. 's war ne schie emol gewasen, als wenn'r de Lichter von Annebarg gesah hätt, oder 'r schien sich doch geerrt ze hobn, dä of dan Wag fuhl kä Licht. Bal wär'r mit dr Nos' an en Felsen nagerannt, un do merket'r an besten, daß'r von Wag abkomme war. Mer konnts 'n werklich net verdenken, daß'r aa ze fluchen fing wie e Landsknacht. Un 'r soog a bal esu aus. E geschlitzts Wammes hatt'r aa un an dr Mütz hing e lange Fader, die oder bei dan Watter aussoog wie e Sterl. 'r hätt net esu laut fluchen solln, dä dodermiet hatt'r jemanden agelockt, dan 'r an hallen Toog gewieß aus'n Wag gange wär. Trotz dan Krawall, dan dr Sturm machet, höret mei Karl of emol e Gebrumm, als wär e rachts gruß Hummelnast gesprengt wurn, un 's dauret aah net lang, do merket'r, trotz dr Finstrigkät, e paar klane flimmrige Lichtle, wie e paar Aang, un of emol warsch'n, als hätt'n wos racht grußes Pelziges gesträft. »Dunner noch emol«, dacht mei Wanerschmaa, »dos kimmt mer vir, als wenn dos e Baar wär«, un 'r machet geleich en Satz, dar ne e wink aus dar gefahrling Näh brenge sollt. 'r war oder noch dr falschen Seit gehuppt, dä 'r war an ener rutscherigen Stell geroten un 's leiret ne geleich e paar Meter ne Hang nonner. In letzten Aangblick krieget 'r aah noch äs mit en paar racht grußen Pfuten an Arm naagewichst. Oder dorch dan Rutsch war 'r of ener Weil in Sicherhät. Wie 'r sich e wing vu sen Schrack erhult hat, do warsch'n werklich, als wär 'r of en Wag gefalln, un er machet sich, esu fix, wie's ging, in dr Höh un lief, wos'r när laafen konnt, fort. »Wu ich hiekomm, dos is mir egal, när dohierde wag!« Esu warn seine Gedanken. E Gelück blebt selten ellä, dä wie 'r e paar Minuten geloffen war, soog 'r of emol e werkliches Lichtel schimmern, dos vu en Fanster harkam. Net lang dauret's, do war'r naa, un ne ganzen Aussahe nooch warsch e Waldschänk, an die 'r geroten war. Er stieß en Freudenbläkerts aus un machet sich zor Haustür nei. Als wenn'r aus dr Höll in Himmel komme wär, esu kams 'n vir. Die kläne Wertsstub mit ihrn armsaling Spaalichtel kam ne schönner vir we der harrlichste Rothaussaal.

Die Wirtsleut warn net garschtig derschrocken, wie of emol in der Nacht noch e setter Gast neigekracht kam, oder se taten dan Maa noch allen Kräften bedauern, dar bei en setten Mordswatter draußen hatt rümsappen müssen. Se wollten nu geleich sei Gack trocken hänge, do kriegeten se weis, daß sei Arm bluten tat. Die alte Werten hoot geleich e Tranel vergossen un geleich häß Säfenwasser gemacht. Un wie's mit Bluten net aufhörn wollt, hoot se's geleich versprochen, un dos tat halfen. Net lang tats dauern, do saß dr fremde Maa in eener Hus von Wert un in en Wammes vu dr Werten an warme Ufen, un nu kam 'r endlich derzu, daß 'r dan Wertsleiten aah derzähln konnt, wie oder wenn. 'r saht, 'r wär e Student, dar of dr huchen Schul in Wittenbarg gewasen wär un nu noch Prag gewollt hätt. Außer en paar Löchern in Schuh'n wär bishar alles gut gange, un heut wär ne nu doch noch das Mallär gepassiert. 's Watter wär schie schlimm genung gewasen, un dann hätt'n aah bal dar Baar noch äs ausgewischt.

Do machet dar Wert e racht schlaues Gesicht, als wenn 'r dos besser wüßt, wos dos gewasen wär. Er gucket sich erscht e paarmol üm, daß aah ja niemand höret, dan's nischt aaging, un dann brocket'r esu noch un noch raus, daß die ganze Sach net mit rachten Dinge zuging. In dan Felsen, an dan dar Student mit dr Nos' nagerannt war, wuhnet dr leibhaftige Biese! Un dar ließ an manning Togn niemand an dr Schenk naa. Die Fuhrleut führet'r in der Irr. Wenn ener geloffen käm, tät'r e gruß Watter aufrührn, oder scheuchet ne als Baar oder sinst ewos Urachts. Un dos alles waang en grußen Schatz, dar dort in dan Felsen begrobn läg. När e gunger, kecker, lustiger Maa könnt'n hebn; un wenn emol e setter dan Felsen ze nah käm, do wär dr Teufel allemol an mesten lus. Dos stimmet doch nu alles ofs Haar; un dos trof aah zu: esubald dar Student nei in dr Schänk war, ließ aah dos garschtige Watter noch. Dan Student hatt dos mit dan Schatz an besten gefallen, un 'r prubieret e fünket aus, öb ar net dr Rachte sei könnt. Gung war 'r, dos soog mer ne geleich aa. Daß 'r aah lustig war, dos bewies 'r dan Wertsleiten geleich, wie 'r en Schnorken noch'n anern derzehln tat. Un die alten Leut hobn bal Träne gelacht über dan lusting gunge Maa. Keck war 'r oder aah, dä 'r bestellet en Krug Wei nochn annern, un wie's um zwölfe war, do griff 'r of emol in dr Tasch, bracht en enzing ogeschabten Haller raus un saht: »Dos is mei letzter. Oder ich war mich itze naus an dan Felsen machen un dan Schatz huln; dann war ich alles bezohln, wos ich schullig bi.« Der Wert un de Wertin schlung e Kreuz noch'n anern; oder se konnten gar nischt machen, mei Student hatt sich's fest virgenomme, in dar Nacht noch dan Schatz ze hebn. 'r saht när noch, üm die alten Leit ze beruhing, 'r wär in Wittenbarg of dr huchen Schul aah ben Doktor Faust gewasen, un dar hätt's sen Studenten gelarnt, mit'n Teufel ümzegiehe. 's gäb oder natirlich allerhand ze bedenken. Dr Student brannt zeerscht e Rächerkerzel aa, dann tat 'r noch e Flasch ungerschen Wei trinken. Dar mußt oder alle sei, bis dos Rächerkerzel nieder war. Dann nahm 'r sen Stacken, tat dreimol draufspucken, setzet de Mütz verkehrt auf un ging zor Schänk naus, mit'n Buckel zeerscht. Drei Schriet tat 'r laafen, drei tat 'r springe, esu machet 'r an dan Felsen naa. 's Regne hatt aufgehört, när dr Wind tat de Wolken hie un har gächen un dr Monden konnt gar net racht zor Perfektiu komme. Kaum war mei Student bis an dan Felsen naa, do kam of emol ne Wag rauf e schwarze Gestalt of dan gunge Karl zu. Dan wur virn Aangblick -- trotz dan vieln Wei, dan 'r getrunken hatt -- 's Maul e fünkel treich. Oder 'r dacht, hierde kaa när Kurasch halfen, un machet of dos schwarze Ding nei. Der Teifel war voller Ruß un stank wie 's halle Höllnfeuer. Kralle hatt'r, un en Stacken hatt'r mit en grußen Pensel dra. Dr Student ließ sich net warfen, dr Teifel oder aah net, un esu sei se nu esu an Buden rümgewergt. Der Student merket schie ne häßen Oden von Biesen über sich, do finge aah seine Kräft aa nochzelossen, un 'r saht bluß noch: »Dar verfluchte, damische Schatz«. Do kam of emol dr Mondenschei hiner ener Wolk vir un tat die ganze Sach belechten. Die bäden Karle sprange mit enanner auf un gucketen enanner aah. Do schlug dar Teufel e Gelachter auf, un mei Student konnt aah net anerschter, dä vir ne stand -- dr Buchhölzer Feieressenkehrer, der aus Grühah zerückgekomme war, wu 'r in Kloster de Essen ausgeputzt hatt.

Unere alten Wertsleut hatten mit Angst un Baten die ganze Zeit zugebracht. Se warn dan gunge Berschel gut gewurn, un nu dachten se doch net annerschter, als daß se dan Student an anern Morng mit ümgedrehten Genick bei dan Felsen finden täten. Do tat sich of emol de Tür auf, un Arm in Arm mit'n leibhafting Teufel trat uner Student über dr Schwell. De Wertsleit hätten sich an liebsten verkrochen, 's dauret oder net lang, do warn se aufgeklärt. Daß de Fräd gruß war, ka mer sich da wuhl denken, un e mannigs Kannel Wei is noch ausgeloffen. Die alten Leut wurn dan Studentel immer guter, un wie 'r noch drzu bein Zesammerachne sei ganze Zech dan Feieressenkehrer miet naarachne tat, do warn sich de Wertsleit enig, daß dar racht gut zun Wert passen tät. Un esu wursch aah. Dr Student blieb dorten als Wert, un de Alten zugn in dr Oeberstub in Auszug. Un wie dar gunge Wert e rachte Werten brauchet, do bracht 'r dan schwarzen Teufel sei Schwaster ins Haus, un se hobn mitenanner viele Gahr in guten Uemständen gelabt.

Seit darer Zeit häßt oder die Schänk »Der letzte Haller«. En höllischen Schatz gabs oder net mehr ze hebn, dan hatt dar Student doch gefunden; un desderwaang hoot sich aah dr Teifel dorten nimmer sahe lossen.

De umusikalische Ratt.

Der kläne Fritzsch-Gung in dr Mittelsayd' sollt emol ofn Semenar komme un do gehörets doch frieher drzu, daß 'r aa geing larne mußt. Mit darer Geingstund dos war nu in Mittelsayda gar net esu efach. 's gob en guten Geiger, ne Generalmusikdirekter vu dr Tanzmusik, ne Haug-Karl, un zu dan wur schließlich dar Gung in dr Stund geschickt. Gar esu garn machet dos ne Fritzsch-Gung sei Mutter net, dä se hatt an Haug-Karl dos un jens auszesetzen. Doß'r fei wink hinner de Weibsen har war, hatt in dan Fall net viel ze bedeiten, oder aah esu. 'r lief egal barbeß un när in Hem un Hus rim, mit seiner Rendlichkät warsch aah net zun besten bestellt. Oder in dr Nut frißt dr Teufel Flieng -- un dr kläne Fritzsch-Gung machet nu jede Woch zwämol mitn Geingkasten nauf zun Haug-Karl. Dan sei klä Häusel stand über dr Stroß an Barghang dra. E Fraa hattr zu darer Zeit net, ich gelaab, die war vu ne waggezung.

Nu kimmt dos Gungel an en schien Nochmittig wieder emol zun Haug-Karl. Dar schien oder gerod käne Lust ze hobn, sei Konservatorium aufzemachen, zewingst hattr ewos Wichtigersch vir. »Weßt de«, saht dr, »ich hoo in mein Kaller e Ratt, die warn mer emol fange, un du tust mir halfen!« Dan Gungel war de Rattengagd natirlich zahmol lieber als dos Rümgerafel of dar alten Geig, un mer soong ne an de Aang aa, wie sichs freie tat.