SCENE II.--_A Plain Chamber in First Grooves.

_Enter DERRIC VAN SLAUS, L. H._

_Derr._ Wann mer des ding now net glickt don bin ich g’ruineert. So gaits ame wann mer ’n sohn hut os tzu feel sowft! Ich hob ’m ols g’hulfa mit geld bis ich selwer tzu sawga ous g’shpeelt war, un ich hob so gor geld g’used os net my eagas war, un wann ich sell net tzurick con du on si plotz, don bin ich hinna wedder. ’S is wohr, my sohn hut ’n gooty larnung, un ar is ’n lawyer, un ar hut ’n office in Nei Yorrick, un wann ar yusht aucht gebt un net tzu feel sowft, ei don con om end noch olles recht cooma.

_Herman._ [_Without L. H._] My dawdy, sawgsht, is arryats doh um der waig?

_Derr._ Horrich! Sell is ’n--ich ken ’n on der shtimm! Now, wass der bettle bringt ’n don so unferhuft doh har? Ich farrich ’s is ebbas letz!

_Enter HERMAN, L. H._

_Derr._ Ei Herman, was bringt dich don widder doh tzurick? Husht now my gooter roat widder net g’nooma?

_Herm._ Ich blame dich net os du unruich bisht. Awer eb os du groomelsht derweiga horrich wass ich tzu sawga hob. Ich bin desmohl uf bisness ous--bisness os uns all tzwæ aw gait.

_Derr._ Oh, of course, du husht widder ’n waig ous g’shtuddied for noch manner geld shpenda----

_Herm._ Nay, sell is net so--ich bin uf nix-a-so ous. Awer ich hob ’n plan for uns ous der noat helfa.

_Derr._ Well, don, sawg mer amohl di plan--wass is ’s?

_Herm._ Ich will der ’s sawga, Du kennsht der Rip Van Winkle--net so?

_Derr._ Of course ken ich ’n. Olly leit kenna een un wissa exactly wass ar is--’n nix-nootzicher loodle. Awer ea ding is wohr--ar is ’n olter ding os gooter shpunk hut, for ar hut amohl di lava g’safed we’d in a meel dom g’falla bisht--sellamohls wærsht sure fersuffa wann ’s net for een g’west wær--

_Herm._ Un ar hut ’n duchter os arsht sivva yohr olt is, un my plan os ich hob is now weaga era--

_Derr._ Well, go ahead. Geb mer now amohl di plan.

_Herm._ Ei, du waisht, ich hob my Nei Yorricker office in der same shtoob mit ’m ’a onnera lawyer, un doh for a pawr dawg hut seller lawyer ’n willa g’shrivva for sellam same klæ sivva yairich maidly si olty aunt. Se is down up der olt Rip Van Winkle, un se hut der willa so g’fixed os ’s maidly olles grickt--der olt aunt era gons fermaiga. Un se is orrick reich, un wann now sell maidly yusht lava bleibt don gebt se de reichsht fraw im gonsa County.

_Derr._ Well, suppose sell is all so, wass con sell uns botta?

_Herm._ Ferleicht ordlich feel--suppose ich mauch mich now ’a wennich aw beim Rip un secure si nawma tzu ’m ’a shreivas os ’s maidle mich hira mus wann se uf eld coomd, un don, uf selly arbshaft con ich d’no ’n ordlich grossy sum geld raisa uf forna nous. Un now, dawdy, wass denksht fum plan?

_Derr._ Well now, ich wase net--’s kent ferleicht gadu wærra. Anyhow, der Rip is now widder si rent shuldich, un des is de besht tzeit for amohl mit ’m tzu shwetza derwaga un ous finna eb ar ’s agreea date so ’n shreivas tzu signa--of course, mer mist a wennich ebbas du for ’n.

_Herm._ Un ’s bobbeer is shun ready--’s fail’d nix os yusht ’m Rip si nawma. [_Presents the paper._]

_Derr._ Well, don, gæ ich aw grawd amohl tzu’m un proweer wass ich du con mit ’m.

[_Exit R. H._

_Herm._ [_Solus._] Des is now der waig for bisness du. My dawdy is anyhow g’satisfied os ich aw wase we mer so dinga mannetsh’d. Of course, ’n lawyer darraf sich net feel boddera mit seim g’wissa. Wann des ding now recht shafft ei don bin ich ordlich goot ob g’fixd.