# In gondoleta Barcarole e Rime Veneziane ## Part 3 Book page: https://www.cyberlibrary.org/it/books/in-gondoleta-barcarole-e-rime-veneziane-19894/index.md Semo a metà de otobre, el mese classico De le fogie[1] da i álbari cascae; El mese dei poeti malinconici, De l'anime da amor mistificae. Beato sia l'otobre! Canta in estasi El mio zovene cuor tuto contento.... Da la campagna xe tornà el mio idolo.... Urla che 'l cuor no ti me giazzi, o vento! [1] _fogie_ = foglie. RELOGIO FERMO[1] Se ga fermà el relogio là in saleta; A le sete e tre quarti el s'à fermà; A l'alegro _tic-tac_ no dava reta: Desso, tasendo, che tristezza el fa! Quel sôn pareva farme compagnia: Quanta, senza de lu, malinconia! Quel sôn me dava vita e bon umor, _Tic_ e _tac_ el bateva col mio cuor. 'Desso, co sto silenzio, me par squasi D'essar solo, soleto, abandonà; E me par sia sta i ultimi quei basi Che za tempo, Nineta, ti m'à dà. Su i to' lavri ghe gera, sa, Nineta, Quel tristo fredo che ghe xe in saleta! Pareva el fogo del to amor stuà....[2] Come el relogio, in peto el cuor fermà!... [1] _relogio fermo_ = orologio fermo. [2] _stuà_ = spento. NEVE 'Sta neve che vien zo xe un'ironia: 'Sta pase cossa val Se son in guera co la Nina mia, Se sempre più lontan va l'idëal? 'Sta bianca neve xe, sul serio, un luto, Un luto del mio amor.... Ela vien zo, la sepelisse tuto, Fin le speranze che go qua in tel cuor! NEVE E AMOR Quela neve dei copi[1], per sgiazzarse[2], Quanto tempo, Madona, che ghe vol!... Se la vede adasieto ritirarse Dopo le longhe ociae[3] che ghe dà el sol. Par che a ogni tristo dì de nebie o vento, De sgiazzarse ghe vegna el pentimento; Par che la diga: «Resto ancora qua.... Palido sol, xe assae lontan l'istà!...» * * * Per tornar a sperar, quanto che speta El mio zovene cuor za sconfortà!... Ghe xe nòve ilusion, ghè 'na segreta Speranza, ma el mio cuor resta serà. Se le speranze de dorade e care, Le disilusïon xe tanto amare!... No fidarte: sta atento, sa, mio cuor: Ocio ai fantasmi.... xe lontan l'amor!... [1] _dei copi _= delle tegole, dei tetti. [2] _s_giazzarse_ = sciogliersi. [3] l_onghe ociae_ = lunghe occhiate. MISTICA La gera bionda, bionda come 'l mar Soto un tramonto d'oro; Se sentiva nel canto suo scherzar De rusignoli un coro. Splendeva ne i so' oci el senso arcan, Dolçe del firmamento, Ghe portava dei basi da lontan De l'orïente el vento. El mar ninava[1] el so' sogno d'amor Co un'intima dolçezza: El sol scaldava el so' zovene cuor Co un'infantil carezza. Le stele che sluseva su nel çiel, In alto l'atirava; La luna, col nebioso e bianco vel A l'anema parlava. * * * ....In una note nera, malinconica, El vento ga ruzà[2], E el mar, el queto mar, fato teribile, Orendo, el s'à inrabià[3]. El sol, el zorno dopo, nel çiel limpido Sul mar s'à levà su.... Da quela note in çiel 'na fulgidissima Stela ghe xe de più!... [1] _ninava_ = cullava. [2] _ruzà_ = ruggito. [3] _el s'à inrabià_ = montò in collera. A VENEZIA Quanto bela ti xe, Venezia mia! Mi no posso finir mai d'amirarte.... Paradiso sul mar, cuna[1] de l'arte, Viver sempre e morir qua mi voria. Co' ti xe tuta piena de alegria Ti ti me scaldi 'l cuor solo a vardarte; Co' 'l çiel xe bruto e par che 'l vogia odiarte, Sento in tel cuor 'na gran malinconia. Venezia cara, silenziosa e quieta, Xe la belezza tua che à sugerio Versi al zovene cuor mio de poeta; Venezia, logo che no ga 'l secondo, Te vogio ben come a 'na mare el fio: Lontan da ti mi son fora del mondo. [1] _cuna_ = culla. ADIO! Adio, povari versi, abandonai Come liziere piume in brazzo al vento....[1] Adio! 'ndè via.... no podarò dir mai La tristezza che in cuor desso me sento. Vu se' mio sangue; vu se' destacai[2] Tochi del mio cuor[3] zovene e contento; Vu se' intimi amici afezionai Che de lassar, purtropo xe 'l momento.... Vardè el bianco cocal: sicuro, atento, Su la laguna queta voltegiando, Tanto tempo el se mostra a l'ocio mio; Fe come lu! Mi nel lassarve, al vento De la laguna mia ve racomando.... Libréve in alto tanto tempo!... Adio!... [1] _come liziere piume in brazo al vento_ = come leggere piume in braccio al vento. [2] _destacai_ = staccati. [3] _lochi del mio cuor_ = brani del mio cuore. INDICE Prefazione.................... Pag. 9 Avvertenza.......................» 11 Monta, Nineta, in gondola........» 13 Amar, amar, amar.................» 15 Parcossa?........................» 17 Tra barcarioi....................» 19 El scaldin.......................» 20 Su l'aqua limpida................» 23 Dal molo.........................» 24 Su la laguna.....................» 25 Go dito che......................» 26 Antitesi ........................» 27 Ne la quiete.....................» 29 Tradimenti.......................» 31 Primavera........................» 32 A chi dà e tol...................» 33 Samarco..........................» 34 Ricordi..........................» 35 Quando...........................» 37 Rondinele........................» 39 Soto el felze....................» 41 Amor.............................» 43 Filosofia........................» 44 La petégola......................» 45 Perché?..........................» 46 Incanto..........................» 47 E tò vardà?......................» 48 Bela crudel......................» 49 Co' ti ridi......................» 50 Smara............................» 51 Drio la tendina..................» 53 Vustu montar?....................» 55 I sogni..........................» 57 Stornei..........................» 58 Redentor antico..................» 59 Xe 'l to balcon serà!............» 61 Tre terni........................» 62 Vien in gondola..................» 63 Marina...........................» 65 No e Sì..........................» 66 Ah! povareta mi!.................» 67 Nell'album.......................» 68 Gondola nera.....................» 69 La vèntola...................... » 71 Tempesta.........................» 73 Xe passà el tempo................» 74 In gondoleta.....................» 76 Strigà!......................... » 77 El gondolier.....................» 78 Otobrada.........................» 79 Relogio fermo....................» 80 Neve............................ » 81 Neve e amor......................» 82 Mistica..........................» 83 A Venezia........................» 85 Adio!............................» 86