Part 3

Era na vota lo Rrè de Verde-colle, lo quale aveva tre ffiglie femmene, ch’erano tre gioje; pe le quale erano cuotte d’Ammore tre ffiglie de lo Rrè de Bello-prato, ch’essenno pe na mmardizzejone de na Fata tutte tre anemale, sdegnaje lo Rrè de Verde-colle de darecella pe mmogliere, pe la quale cosa lo primmo, ch’era no bello Farcone, avenno la fatazione, chiammaje tutte l’Aucielle a parlamiento, a dove venettero Froncille, Reille, Golane, lecore, pappamosche, cestarelle, paposce, covarelle, cucule, cajazze, e alia genera pennatorum, li quale essenno venute a la chiammata soja, le mmannaje tutte a rroinare li sciure dell’arvole de Verdecolle, che non ce lassaro ne sciure, nè ffrunne. Lo secunno, ch’era no Ciervo, chiammanno tutte li Crapie, li coniglie, li liepare, li puorce spine, e tutte l’autre anemale de chillo pajese, face dare lo guasto a li semmenate, che non ce restaje manco no filo d’erva. Lo terzo, ch’era no Darfino confarfatose co ciento mostre de lo mare, fece venire tanta tempesta a chella marina, che non ce restaje varca sana. Pe la quale cosa lo Rrè vedenno ca le ccose jevano a la peo, e ca non poteva remmediare a li danne, che le facevano sti trè Nnammorate sarvateche, se resorvette scire da sti ’mmarazze, e se contentaje de darele pe mmogliere le ffiglie; li quale senza volere nè ffeste, nè ssuono, se le pportaro fore de chillo regno, e a lo partire de le Zite, Grazolla la Regina dette tre anella simmele uno ped’una a le ffiglie decennele, che accorrenno spartirese, e dapò quarche tiempo de nuovo retrovarese, o vedere quarcuno autro de lo sango lloro, pe mmiezo de st’anielle se sarriano reconosciute. Cossì pigliato lecienzia, e partutose, lo Farcone portaje Fabiella, ch’era la primma de le Ssore, ncoppa na montagna cossì llonga-ciavana, che passato li confine de le nnuvole, arrivava co la capo asciutta dove maje non chiove, e llà fattole trovare no bellissimo palazzo, la teneva comm’a Rregina. Lo Ciervo carriaje Vasta, ch’era la seconna drinto no vosco cossì ’ntricato, che l’ombre chiammate da la notte, non sapevano da dove scire a corteggiarela; dove drinto na casa de spante co giardino, che non vedive autra bellezza, la faceva stare da paro sujo. Lo Darfino nataje co Rrita, ch’era la terza, sopra le spalle ’n miezo maro, dove sopra no bello scuoglio le fece trovare na casa, che nce averriano potuto stare tre Rrì de corona. Fra chisto tiempo Grazolla fece no bello figlio mascolo, a lo quale mettette nomme Tittone, lo quale comme fu de quinnece anne, sentenno sempre gualiare la mamma de tre ffiglie mmaritate a tre anemale, che non se n’era saputo maje nova, le venne crapiccio de cammenare tanto lo munno, ficchè n’avesse quarche ssentore, e dapò no luongo stimmolo, che fece a lo Patre, ed a la Mamma, la Regina datole n’autro aniello simmele a chillo, ch’aveva dato a le ffiglie, le dettero lecienzia, facennole portare tutta la commodetà, e compagnia, ch’era de necessità, e de repotazione a no Prencepe comm’ad isso; lo quale non ce lassaje pertuso a la Talia, no caracuoncolo a la Franza, nè parte a la Spagna, che non cercasse, e passato l’Angrise, e scorza la Schiavonia, e bisto la Polonia, e ’n somma cammenato lo Levante, e lo Ponente, all’utemo avenno lassato tutte li Serveture parte a le Ttaverne, parte a li Spetale, e rrestato senza na maglia, se trovaje ncoppa la montagna abitata da lo Farcone, e da Fabiella, dove stanno comme fora de se stisso a contemprare la bellezza de chillo palazzo, ch’aveva, le ccantonere de porfeto, le mmura d’alavastro, le ffinestre d’oro, e l’irmece d’argiento, fu bisto da la sore, che fattolo chiammare, le demmannaje chi era, da dove veneva, e che ffortuna l’aveva portato a chille paise; Tittone dittole lo Pajese, lo Patre, e la Mamma, e lo nomme sujo, Fabiella lo recanoscette pe Ffrate, tanto cchiù confrontanno l’aniello, che portava a lo dito co cchillo, che le deze la mamma, e abbracciatolo co no priejo granne, perchè dubetava, che lo marito non sentesse desgusto de la venuta soja, lo fece nasconnere. E benuto lo Sproviero da fore, Fabiella commenzaje a dicere: ca l’era venuto sfiolo de li pariente suoje; e lo Sproviero le respose, lassatillo passare, mogliere mia, ca chesto non pò essere, nfi ttanto che non me venga d’omore. A lo mmanco, disse Fabiella, mannammo a chiammare quarche parente mio pe cconzolareme; e lo Sproviero leprecaje; e chi vo venire tanto lontano a bederete? E si nce venesse quarcuno, tornaje a dire Fabiella, l’averrisse a desgusto? E perchè vorria averne desgusto, respose lo Sproviero, vasta che fosse de lo sango tujo pe mme lo mettere drinto all’uocchie. La quale cosa sentuto Fabiella, e pigliato core, fece scire lo Frate, e lo fece vedere a lo Sproviero; lo quale disse cinco e ccinco a dece, l’ammore passa lo guanto, e l’acqua lo stivale: singhe lo ben venuto; tu si lo padrone de sta casa; commanna, e fa tu stisso. E cossì dette ordene, che fosse nnorato, e sservuto comme la perzona soja stessa. Ma stato a chella montagna quinnece juorne, le venne penziero de ire cercanno l’autre ssorelle, e ccercata lecienzia a la sore, ed a lo cainato, lo Sproviero le deze na penna de le soje, decennole: portate chesta Tittone mio, ed aggela cara, perchè a tale besuogno te puoje trovare, che la stimmaraje no tresoro: vasta, conservala buono, e si t’accorre cosa necessaria, jettala ’n terra, e di vienela, vienela, ca mme ne laudarraje. Tittone arravogliata la penna a na carta, e postasela a no vorzillo, dapò fatto mille zeremonie, se partette; e dapò no sfonnerio de cammino arrivaje a chillo vuosco, dove lo Ciervo se ne steva co Vasta, e mmentre allancato da la famme era trasuto a chillo ciardino a ccogliere quatto frutte, fu bisto da la sore, e rreconosciutolo de la stessa manera, ch’aveva fatto Fabiella, lo fece canoscere a lo marito che le fece accoglienza assaje, trattannolo veramente da Prencepe, e bolenno dapò quinnece autre juorne partire pe ccercare l’autra sore, lo Ciervo le detto no pilo de li suoje co le stesse parole, ch’aveva fatto lo Sproviero de la penna; e puostose ’n cammino co na mano de scute, che l’aveva dato lo Sproviero, e co autre ttante, ch’appe da lo Ciervo, tanto cammenaje, che ghionze a l’estrema de la terra, dove non potenno passare cchiù nnante pe lo maro pigliaje na nave co ddesigno de cercare pe tutte l’Isole si n’avesse nova, e dato le bele a lo viento, tanto geraje, che fu portato all’isola, dove steva lo Darfino co Rrita; lo quale a ppena smontato ’n terra, fu bisto da la Sore, e rrecanosciuto a lo medesimo muodo, ch’era socciesso coll’autre, e rrecevuto mille carizze da lo Cainato, comme voze partire pe rrevedere dapò tanto tiempo la Mamma, e lo Patre, lo Darfino le dette na scarda de le ssoje, parlannole de la stessa forma, dove pigliato no cavallo accommenzaje a cammenare; ma non se fu scostato miezo miglio da la marina, che trasuto drinto no vuosco, ch’era scala franca de la paura, e dell’ombre, dove se faceva na continua sera de scoretà, e de spaviento, trovaje na gran torre ’n miezo a no lago, che basava li piede dell’arvole, azzò non facessero vedere a lo Sole le bruttezze soje, a na fenestra de la quale vedde na bellissima Giovane a li piede de no brutto Dragone, che dormeva; la quale vedenno Tittone co na voce sotto lengua pietosa disse: O bello Giovane mio, mannato fuorze da lo Cielo pe cconfuorto de le mmiserie meje a sto luoco, dove non se vedde maje facce de Cristejano, levame da mano de sto serpe tiranno, lo quale m’ha levato da lo Rrè de Chiara-Valle, che m’era Patre, e portatame confinata a sta negra torre, dove nce sò pperuta, e pigliata de granceto. Oimè, disse Tittone, che pozzo fare pe sservirete, bella femmena mia, chi pò passare sto lago? chi pò saglire sta torre? chi pò accostarese a sto brutto Dragone, che t’atterrisce co la vista, che ssemmena paura, e fa sguigliare cacavesse? Ma chiano, aspetta no poco, ca vedarrimmo de cacciare sto serpe co la maneca d’autro: a passo a passo, deceva Gradasso: mò mò vedarrimmo s’è cucco, o viento; e ditto chesto, jettaje a no tiempo la penna, lo pilo, e la scarda, che l’avevano dato li Cajenate, decenno: Vienela, viene, che date ’n terra comme stizze d’acqua de state, che fa nascere le Ranonchie, se veddero comparere lo Farcone, lo Ciervo, e lo Darfino, che tutte ’nsiemme gridaro: eccoce, che commanne? Tittone, che bedde chesto, co n’allegrezza granne, disse: Autro non borria, che llevare chella povera Giovane da le granfe de chillo Dragone, cacciarela da sta torre, sfravecare ogne cosa, e portareme sta bella mogliere a la casa. Zitto, respose lo Sproviero, ca dove manco te cride nasce la fava: mò te lo farrimmo votare ncoppa a no carrino, e bolimmo ch’aggia carestia de terreno: non perdimmo tiempo, leprecaje lo Ciervo, guaje, e mmaccarune se magnano caude, e cossì decenno, lo Sproviero fece venire na mano d’Aucielle Grifune, che bolanno a la fenestra de la torre, nne zeppoliaro la Giovane, portannola fore de lo lago, dove steva Tittone co li Cainate, che si da lontano le parze na Luna, da vicino la stimmaje no Sole, tanto era bella, ma ’ntanto, che isso l’abbracciava, e faceva belle parole, se scetaje lo Drago, e lanzatose da la fenestra, se nne veneva a nnatune pe devorare Tittone, quanno lo Ciervo fece comparere na squatra de Liune, de tigre, de Pantere, d’Urze, e de Gatte maimune, li quale dato adduosso a lo Drago, nne fecero mesesca co l’ogne. La quale cosa fatta, mentre Tittone voleva partire, disse lo Darfino, e io puro voglio fare quarcosa pe te servire; ed azzò non restasse mammoria de no luogo cossì mmarditto, e nnegrecato, fece crescere tanto lo maro, che sciuto da li termene suoje, venne a ttozzare co ttanta furia la torre, che la spedamentaje da lo fonnamiento: le quale cose visto Tittone, rengraziaje quanto potte, e seppe li Cainate, decenno a la zita, che facesse lo mmedesemo, mentre pe ccausa lloro era sciuta da tanto pericolo. Ma l’anemale resposero, anze nuje devimmo rengraziare sta bella Segnora, pocca essa è ccausa de farece tornare all’essere nuostro; perchè avenno avuto na mmardezzione da che nascettemo pe no desgusto dato da la mamma nostra a na Fata, che fossemo state sempre a sta forma d’anemale, nfi a ttanto, che non avessemo liberato na figlia de no Rrè da no gran travaglio, ecco arrevato lo tiempo da nuje desederato; ecco maturato sto spognile de sorva, e già sentimmo a sto pietto nuovo spireto, a ste bene nuovo sango. Accossì decenno, deventaro tre bellisseme Giuvene, che l’uno dapò l’autro abbracciaro strettamente lo Cajenato, e ttoccaro la mano a la Parente, che pe allegrezza era juta ’nn estrece. La quale cosa vedenno Tittone, co no gran sospiro, che s’appe a scevolire, decette: O Signore Dio, e perchè non ne ha parte de sto gusto la Mammarella, e lo Tata mio? che se ne jarriano ’mbrodetto, si se vedessero ’nnante Jennere cossì graziuse, e cossì belle. Ancora non è nnotte resposero, e dissero li Cainate, ca la vregogna de vederece cossì straformate nce aveva arreddutte de foire la vista dell’uommene; ma mò che potimmo pe grazia de lo Cielo comparire fra le Gente, volimmo reterarece tutte sotto a no titto co le mmoglierelle nostre, e ccampare allegramente, perzò cammenammo priesto, ca nnante, che lo Sole crajemmatino sballe la mercanzia de li ragge a la Doana de l’Oriente, saranno nsieme co buje le mmogliere nostre. Ditto chesto, perchè non ghiessero a pede, già che non c’era autro, che na Jolla scortecata, che aveva portato Tittone, fecero comparere na bellissema carrozza tirata da seje liune, drinto la quale se posero tutte cinco, e ccammenato tutto lo juorno, se trovaro la sera a na taverna, dove mentre s’apparecchiava da ’ngorfire, passattero lo tiempo, lejenno tante testemmonie de la ’ngnoranza de l’uommene che s’erano firmate pe le mmura. All’utemo magnato, e ccorcatese li tre Giuvane, facenno fenta de ire a lietto, trafecaro tutta la notte, de manera, che la matina quanno le stelle vregognose comm’a Zitelle zite non vonno essere viste da lo Sole, se trovaro a la stessa taverna co le mmogliere lloro, dove fattose n’abbracciatorio granne, e na prejezza fore de li fore, puostese tutte otto drinto la medesema carrozza, dapò luongo cammino arrivaro a Berde Colle, dove da lo Rrè, e da la Regina appero carizze ’ncredibele, avenno guadagnato lo capitale de quatto figlie, che le tteneva perdute, e lo scuto de tre ghiennere, e na nora ch’erano quatto Colonne de lo tempio de la bellezza, e fatto ’ntennere a li Rrè de Bel-prato, e de Chiara-valle lo socciesso de li figlie, vennero tutte duje a le ffeste, che se fecero, refonnenno grasso d’allegrezza a lo pignato mmaritato de le contentizze loro, scompetanno tutte l’affanne passate,

_Che n’ora de contiento_ _Fa scordare mill’anne de tormiente._

LE SSETTE COTENELLE.

TRATTENEMIENTO IV De la Jornata IV.

_Na vecchia pezzente mazzeja la Figlia cannaruta, che s’ha manciato sette cotene, e danno a rrentennere a no mercante, ca lo ffaceva, perchè aveva fatecato sopierchio a nchire sette fuse, chillo se la piglia pe mmogliere, ma non volenno fatecare, pe beneficio de na Fata trova lo marito venenno da fora fatta la tela, e co nnova rasa de la mogliere se resorve de non farela cchiù ffatecare, azzò non cada malata._

_Benedecettero tutte la vocca de Meneca, la quale co ttanto gusto contaje sto cunto, che portaje nnanze all’uocchie de chi senteva, le ccose, ch’erano soccesse tanto lontano; de manera, che mmoppero ’nvidia a Tolla, e le fecero venire la voglia dall’ossa pezzella de passare a ppiede chiuppe Meneca; pe la quale cosa sporgato primmo la voce, cossì decette._

Non se dice mutto, che non sia miezo, o tutto, e perzò chi disse; faccie storta, e bentura deritta, sapeva de le ccose de lo munno; o fuorze aveva lietto la storia de Antuono, e Parmiero; ventura Antuono, e non avè parpetole, ca senza visco piglie le ffocetole; vedennose pe sperienzia, ca sto munno è no retratto spiccecato de coccagna, dove chi cchiù fatica manco guadagna: dove chillo n’ave la meglio, che se piglia lo tiempo comme vene, ed è no maccarone cascame ’n canna; toccannose veramente co mmano, ca le pprede, e le spoglie de la fortuna se guadagnano co le ppermonare, e non co le galere sparmate, comme ve farraggio sentire.

Era na vota na vecchia pezzente, che co na conocchia ’n mano, sputazzianno le gente pe la via, jeva de porta ’n porta cercanno lemmosena, e perchè con arte, e co ’nganno se vive miezo l’anno, dette a rrentennere a ccerte femmenelle tennere de pormone, e ffacile de credenza, ca voleva fare non saccio, che grassa pe na figliola secca, s’abboscaje sette cotenelle de lardo, le quale portate a la casa, co na bona mappata de sproccole, che ghieze adonanno pe terra, le dette a la figlia, decennole, che l’avesse poste a ccocenare, mentre essa tornava a pezzire no poco de foglia a ccierte ortolane pe fare na menestrella saporita; la figlia pigliate le ccotene, e abbroscatone li pile, le mmese a na pignatella, e commenzaje a ffarele ccocere. Ma non tanto vollevano drinto a lo pignato, quanto le vollevano ’n canna, perchè l’addore, che ne sceva l’era na desfida mortale a lo campo de l’appetito, e na zitazione ad informanno a la banca de la gola, tanto, che resiste e rresiste, all’utemo provocata da lo sciauro de lo pignato, tirata da na famma, che la rosecava, se lassaje correre a pprovarene no pocorillo, la quale le sappe tanto bona, che disse fra se stessa, chi ha paura se faccia sbirro: mme nne trovo sta vota: magnammo, e benga de creta, e chiova, è autro, che na cotena? che sarà maje? aggio cuoiro de spalle da pagare ste ccotene; e cossì decenno, nne scese la primma, e sentennose granciare co cchiù fforza lo stommaco, dette de mano a la seconna; appriesso nne pezolejaje la terza, e cossì de mano ’n mano l’una appriesso l’autra ne le vrocioliaje tutte sette. Ma dopò fatto lo male servizio, penzanno a l’arrore, e nzonnannose che le ccutene l’avevano da ntorzare ’n canna, penzaje de cecare la mamma, e pigliato na scarpa vecchia, fellejaje ’n sette parte la sola, e la pose drinto a lo pignato. Fra sto miezo venne la mamma co no fascetiello de torza, e mmenozzatele co ttutte li streppune, pe non ne perdere mollica, comme vedde che lo pignato volleva a tutto revuoto, nce sciaffaje le foglia, e puostoce no pocorillo de nzogna, che l’avea dato pe llemmosena no cocchiero, avanzato dall’onzione de na carrozza, fece stennere no cannavaccio ’n coppa na cascetella de chiuppo viecchio, e cacciato da na vertola doje tozze de pane sedeticcio, e pigliato da na rastellera no nappo de ligno, nce menozzaje lo ppane, e nce menestraje sopra le ffoglie co li taccune, e commenzanno a mmagnare, s’addonaje subeto, ca li diente suoje non erano de cauzolare, e ca le cutene de puorco co nova trasformazione d’Avidio erano deventate ventresche de vufaro. Pe la quale cosa votatase a la figlia le disse: Me l’aje fatta, scrofa mmardetta, e che schefienzia aje puosto drinto sta menestra, e che era fatto scarpone viecchio la panza mia, che m’aje provisto de taccune? Priesto confessa mò comme passa sto fatto, o meglio non ce fusse schiusa, ca non te voglio lassare piezzo d’uosso sano. Saporita ccommenzaje a nnegare, ma ncauzannole le ddoglie de la vecchia; dette la corpa a lo fummo de lo pignato, che l’aveva cecato l’uocchie a fare sto male scuoppo. La vecchia, che se vedde ntossecato lo mmagnare, dato de mano a na mazza de scopa, accommenzaje de manera a llavorare de tuorno, che cchiù de sette vote la lassaje, e pigliaje, zollanno dove coglieva coglieva. A li strille de la quale trasette no mercante, che se trovaje passanno, e bisto la canetate de la vecchia, levatale la mazza da mano, le disse: Che ha fatto sta povera figliola, che la vuoje accidere? è mmuodo de castecare chisto, o de levare li juorne? l’aje fuorze trovato a ccorrere lanze, o a rrompere carosielle? non te vreguogne a trattare de sta manera na scura peccerella? non saje tu, che m’ha fatto, respose la vecchia: la sbregognata mme vede pezzente, e non me conzidera, volennome vedere arroinata co mmiedece, e co speziale, pocca avennole ordenato mò, che face caudo, che lasse de fatecare tanto, pe non cadere malata, ca n’aggio comme covernarela, la presentosa a despietto mio ha voluto stammatina nchire sette fusa, a rriseco de le venire quarche rosala a lo core, e stare no paro de mise nfunno a no lietto. Lo mercante, che ssentette sta cosa, penzaje ca la massaria de sta fegliola poteva essere la fata de la casa soja, e disse a la vecchia, lassa la collera da na banna, ca io te voglio levare sto pericolo da la casa, pigliannome sta figlia toja pe mmogliere, e portarela a la casa mia, dove la farraggio stare da prencepessa, ca pe grazia de lo cielo mme allevo le galline, me cresco lo puorco, aggio li palumma, no mme pozzo votare pe la casa, tanto sto cchino; lo cielo mme benedica, e li mal’uocchie non me pozzano, ca mme trovo le butte de grano, le ccasce de farina; le llancelle d’uoglio, le ppignate, e le bessiche de nzogna, l’appese de lardo, le rrastellere de roagne, le ccataste de legna, li montune de cravune, no scrigno de jancaria, no lietto de zito, e sopratutto de pesune, e de cienze pozzo campare da signore: otra, che mme nnustrio quarche decina de docate pe ste ffere, che si mme vene ’n chino mme faccio ricco. La vecchia, che se vedde chiovere sta bona fortuna quanno manco lo ppenzava, pigliata Saporita pe la mano nce la conzegnaje ad uso, e ccostumanza de Napole, decenno: eccotella, sia la toja da ccà a biell’anne co ssanetate, e bella rede. Lo mercante puostele le braccia sopra lo cuollo, se la portaje a la casa, e non vedde maje l’ora, che fosse juorno de fare spesa; venuto lo lunedì se auzaje ben-matino da lo lietto, e ghiuto dove venevano le fforetane, accattaje vinte decine de lino, e portatele a Saporita, le disse: Or agge voglia de filare, ca n’aje paura de trovare n’autra pazza arraggiata comm’a mmammata, che te rompeva ll’ossa, perchè nchive lo fuso, ca io ped’ogne decina de fuse te voglio dare na decina de vase, e ped’ogne corinola, che mme farraje, te darraggio sto core; lavora addonca de bona voglia, e comme torno da la fera, che sarrà fra vinte juorne, famme trovare ste binte decine de lino filato, ca te voglio fare no bello paro de maneche de panno russo fasciate de velluto verde: và ca staje lesto, respose sotto lengua Saporita, mo aje chino lo fuso, si, quanto curre, e mpizze. Si aspiette cammisa da le mmano meje, da mò te puoje provedere de carta straccia; ajela trovata, e ch’era latte de crapa negra a ffilare ’n vinte juorne vinte decine de lino? che malannaggia la varca, che te portaje a sto pajese. Va ch’aje tiempo, e trovarraje filato lo llino quanno lo fecato ha pile, e la scigna coda. Fra tanto partuto lo marito, essa ch’era cossì cannaruta, comme potrona, non attese ad autro, ch’a pigliare mappate de farina, ed agliare d’uoglio, ed a ffare zeppole, e pizze fritte, che da la matina a la sera rosecava comm’a ssorece, e delloviava comm’a puorco. Ma arrivato lo termene, che lo marito doveva tornare, commenzaje a ffilare sottile, conzideranno lo remmore, e lo fracasso, ch’aveva da soccedere, quanno lo mercante avesse trovato lo llino sano, e le ccasce, e le llancelle vacante; e perzò pigliato na perteca longa, nce arravogliaje na decina de lino co tutta la stoppa, e le rreste, e ’mpizzato a na grossa forcina na cocozza d’innia, commenzaje a ccalare sto patre-abbate de le ffusa pe l’astreco a bascio, tenenno na gran caudara de vruodo de maccarune pe ssauzariello d’acqua, e mentre filava sottile comm’a nzarte de nave, e ad ogn’nfosa de dito jocava a ccarnevale co cchille, che ppassavano: Vennero passanno certe Ffate, le quale appero tanto gusto de sta brutta visione, ch’appero a crepare de riso: pe la quale cosa le dezero fatazione, che quanto lino aveva a la casa se fosse trovato subeto, non sulo filato, ma fatto tela, e ghianchiato, la quale cosa fu fatto ped’ajero, tanto che Saporita natava drinto a lo grasso de la prejezza, vedennose chioppeta da lo Cielo sta bona ventura. Ma perchè non l’avesse a ssoccedere cchiù sto frosciamiento de lo marito, se fece trovare a lo lietto, e ’n miezo na mesura de nocelle; e arrivato lo Mercante commenzaje a gualiarese, e botannose mo da na parte, e mo da n’autra faceva scoccolare le nnocelle, che pareva che se scatenassero l’ossa; e demmannata da lo marito comme se senteva, respose co na vocella affritta affritta: Non pozzo stare peo de chello, che stongo, marito mio, che non m’è remasto uosso sano; e che te pare no poco d’erva pe lo piecoro a ffilare vinte decine de lino ’n vinte juorne, e ffare la tela perzì. Va marito mio ca non n’aje pagato la mammana, e la descrezzione se l’ha manciata l’aseno: comme io so mmorta, non ne fa cchiù mamma mia, e perzò non me ce cuoglie cchiù a ste ffatiche de cane, ca non voglio pe nchire tante fusa, devacare lo fuso de la vita mia. Lo marito facennole carezzielle, le disse stamme sana mogliere mia, ca voglio cchiù pe sto bello Telaro ammoruso, che pe tutte le ttele de sto munno; e mmo canosco, ch’aveva raggione mammata de te castecare pe ttanta fatica, mentre nce pierde la sanetate. Ma fa buon anemo, ca nce voglio spennere n’uocchio a ssanarete, ed aspetta ca vao mo pe lo miedeco; e cossì decenno jette a la ncorza a chiammare messere Catruppolo. Fra tanto Saporita, se cannarejaje le nnocelle, e ghiettaje pe la fenestra le scorze, e benuto lo Miedeco, toccato lo puzo, osservata la facce, visto l’aurinale, e addorato lo cantaro, concrose co Ippocrate, e Galeno, ca lo mmale sujo era de sopierchio sango, e de poca fatica; lo mercante che le parze de sentire no sproposeto granne, puostole no carrino ’n mano nne lo mannaje caudo, e ffetente, e bolenno ire pe n’autro Gerugeco, Saporita le disse che non faceva abbesuogno, perchè la vista soja schitto l’aveva sanata; e cossì lo marito abbracciannola, le disse, che se fosse dall’ora nne nante covernata senza fatica, perchè non era possibele ad avere grieco, e ccappuccie,

_La votte chiena, e la schiava mbriaca._

LO DRAGONE.