Part 23

Ne demoura pas après moult longuement que celluy Hue, combien qu'il eust fait le serment nouvellement, pour la longue prison où il avoit esté entra en grant ire, ainsi comme le chien qui longuement a esté enchainé. Et la forcennerie qu'il avoit conceue béoit bien à descouvrir et mettre à euvre sa desloyaulté accoutumée. Car il fist paix et aliances aux ennemis le roy; c'est assavoir: au conte Thibaut qui son ennemy estoit et au roy Henry d'Angleterre. Et tantost comme il sceut que le roy devoit aller en Flandres pour aucunes besongnes, assembla tant de gens comme il put avoir pour refermer le Puisat. Et tantost comme il sceut que le roy fu meu là où il devoit aller, il mut d'aultre part à sa gent qu'il avoit privéement assemblée et vint un samedi matin par devant le chastel abattu où il avoit un marchié que le roy y avoit establi, par l'ottroy, et par l'assentement d'icelluy Huon. Mais il ne l'avoit fait que par traïson si comme il apparut après: car tous ceulx qu'il povoit illec trouver, entre ceulx qu'il scavoit qui plus riches estoient prenoit et mettoit, en estroicte prison et soudainement comme forcenné tolloit et roboit quanqu'il encontroit. D'illec s'en alla vers le chasteau de Thoury, une ville qui est de Saint-Denys, qui bien estoit jà garnie, entre luy et le conte Thibaut, pour tout abattre et destruire. Mais deux jours ou trois avant qu'il y vint, avoit prié humblement Sugier qui ce chasteau tenoit (et qui ceste histoire escript,) qu'il allast au roy prier pour luy. Et ce faisoit il par traïson, car il pensoit bien qu'il péust assez légèrement entrer dedens sé celluy qui en estoit garde n'estoit présent. Et celluy qui cuida qu'il le priast de bonne volenté s'i accorda et partit à aller au roy. Devant ce chasteau vint Hue et le conte Thibaut à moult grans gens. Mais ceulx qui pour la partie Dieu et Saint-Denys défendre estoient jà venus en la ville, avoient bien garni les creniaux et leur deffence et leur deffendoient hardiement l'entrée. Et celluy Sugier qui au roy s'en alloit rencontra en Corbeillois qui jà savoit bien celle nouvelle de Normandie où elle luy avoit esté comptée. Et si tost comme il sceut pour quoy celluy y alloit, si s'en rist moult et gaba de sa simplesse[515] et luy descouvri lors par grant desdain la desloyaulté de celluy Huon, et l'envoya tantost arrière pour la ville secourir, tandis comme il assembleroit ses osts au chemin Estampois. Sugier qui retouinoit estoit en moult grant paour que la ville ne fust prise avant qu'il y venist et regardoit souvent à une bretesche qui en la tour estoit par quoy il eust bien sceu la prise de la ville; et estoit celle bretesche veue de moult loing. Et pour ce que les ennemis du roy avoient tout le pays d'entour robé et roboient encore chascun jour, ne put Sugier mener avec luy nul de ceulx qui encontre luy[516] venoient; dont il avint que de tant comme il estoient moins, de tant estoient il plus seurement et moins tost eussent esté apperceus. Ainsi chevauchièrent jusques vers le soleil couchant qu'il approchièrent de Thoury. Si avoient forment ce jour assailli la ville les ennemis du roy. Mais, là Dieu mercy, n'y avoient riens meffait fors que eulx lasser. Et s'estoient trais en sus de la ville un petit, et ceulx[517] se tirèrent vers la ville comme s'il fussent de leurs gens, et quant il virent lieu et point, si se férirent parmy eulx: et ceulx du chasteau qui bien les avoient apperceus leur ouvrirent une porte et ceulx se férirent dedens par l'ayde de Dieu et de saint Denys.

Note 515: Suger dit: _Simplicitatem nostram derisit_.

Note 516: _Encontre lui._ Vers lui.

Note 517: Suger ici ne parle que de lui seul.

Lors furent moult alégés et réconfortés ceulx dedens de leur venue, et gaboient le séjour et le repos de ceulx de dehors et leur disoient de grans hontes et de grans reproches par quoy il les rappelloient à l'assault, contre la volenté de Sugier qui moult les en blasmoit et reprenoit. Peu de ceulx dedens et mains de ceulx dehors y eut de navrés à celluy assault, dont les uns se pasmoient et deffailloient pour la douleur de leurs playes et estoient emportés en litière; et les aultres estoient mis à une part jusques au tiers jour à mourir et à habandonner aux morseures des loups et des chiens. Et n'estoient pas bien encore retournés au Puisat quant Guillaume le Gallendois vint à tout une partie des plus nobles de la mesnie le voy, à riches armeures et à destriers courans, qui moult désiroient qu'il les trouvassent au siége de la ville, pour monstrer leur prouesse. Et le roy les suivit par matin: lié et désirant s'appareilla, ainsi comme seur de victoire. Si se merveillèrent durement ses ennemis quant il sceurent la nouvelle de sa venue et coment il avoit sceue leur emprise et leur traïson qu'il cuidoient si bien avoir cellée, et coment il avoit entrelaissée la voye de Flandres et estoit acouru si tost au secours de la ville. Et pour ce qu'il n'en osoient aultre chose faire, si entendirent au chasteau de Puisat fermer et restorer. Et le roy assembloit tandis son ost, si comme il povoit, et attendoit comme celluy que guerres destraignoient en pluseurs lieux. Et quant ce vint à un mardi matin qu'il eut ses osts amenés, si ordenna ses batailles et mist en chascune chevetains et connestables, et ordenna archiers et arbalestriers et mist chascun en son lieu. Ainsi approucha du chasteau pié à pié qui encores n'estoit pas parfait. Et pour ce vint ainsi à batailles ordonnées, que il avoit oï dire que le conte Thibaut s'estoit vanté qu'il se combatroit à luy en champ. Et par sa grant hardiesse descendit à pié, armé de toutes pièces, et commanda à ses chevaliers à oster les chevaulx. Et ceulx qu'il avoit fait descendre admonestoit et semonnoit chascun de bien faire, et disoit à chascun: «Or y parra[518] qui chevalier sera au jour d'huy.»

Note 518: _Or y parra._ «Or va paroître.» On retrouve cette phrase d'encouragement dans toutes les anciennes _chansons de geste_.

X.

ANNEE: 1112.

_Coment le roy assailli le chastel de Puisat, et coment les gens le roy furent desconfis par leur folie. Des merveilleuses proesses le roy, et coment il les secouru tout seul et rescoust assez de sa gent, et coment il rassembla son ost._

Quant ses ennemis virent le roy ainsi venir, si le redoubtèrent moult né n'osèrent contre luy yssir hors de l'açaincte du chastel, ains devisèrent leur batailles par sens, jasoit qu'il le fissent moult couardement, et les mirent dedens un vieux fossé d'un chastel abattu et les firent illec attendre, pour ce que quant les batailles le roy s'efforceraient de monter le fossé qu'il les fissent légèrement reuser, et les conroys ordonnés percer, et après, légièrement branler et ressortir. Si leur en advint presque ainsi comme il avoient devisé. Car à la première assemblée que les chevaliers du roy les eurent gettés du fossé par merveilleuse hardiesse, dont il en y eut assez de blessés et d'occis, si les commencèrent à suivre confusément et sans conroy et çà et là, et trop laidement à laidir et à demener. Lors advint que Raoul de Baugency, merveilleux chevalier et saige, eust mussé en une partie du chasteau la plus grant partie de leur ost que les royaulx ne povoient appercevoir, pour une haulte églyse et pour l'oscureté des maisons où il s'estoient mussés. Et quant il vit ces gens fouyr et yssir parmy la porte du chasteau tous desconfis (si escria son ensaingne: _Baugency, Baugency!_ deux mos moult hault), et se mist droictement en son agait tout frès contre les chevaliers du roy et leur courut sus moult efforcément. Et les royaulx qui les desconfis chacoient tous à pié, chargés d'armeures, ne peurent pas de léger souffrir les conroys ordonnés de leur ennemis qui leur couroient tous sus, mais tournèrent les dos parmy le fossé et le roy après, tout à pié. Mais avant eurent féru mains grans coups sur leur ennemis. Si apperceurent bien, mais ce fut trop tart, combien vault mieulx sens et pourvéance que folle hardiesse; car s'il les eussent attendus au champ ordonné il les eussent sousmis à leur volenté. Et si comme il s'en fuioient ainsi confusément, si furent tous esbahis comme ceulx qui ne povoient avoir leur destriers né ne sçavoient qu'il devoient faire. Mais le roy sur lequel tout l'affaire pendoit retourna premier et fu monté sur un destrier non mie le sien propre, mais sur un aultre que on luy avoit amené. Lors commença fièrement à donner estal[519] à ceulx qui le chaçoient, et rappelloit ses chevaliers qui fuioient et semonnoit chascun par son nom, ceulx mesmement qu'il sentoit les plus hardis, et leur crioit qu'il retournassent à la bataille. Et luy qui estoit entre les conroys de ses ennemis le brant d'acier tout nu au poing dont il férit celluy jour mains roides coups et pesans, aidoit et secouroit de toute sa vertu à ceulx qu'il povoit, et ceulx qui fuioient se pénoit de faire retourner sur leur ennemis. Et plus qu'il n'appartient à haultesse de roy se combatoit tout seul contre ses ennemis comme chevalier preux et esleu et non mie comme roy qui doit estre avironné de grans routes de chevaliers, mais tout seul sans ayde de nulluy fors de Dieu. Tant comme le cheval rendre povoit se plungeoit ès grans flos de ses ennemis, né de ce ne doubtoit nul que il fust ainsi, car ses gens estoient si tournés à desconfiture que nul n'i prenoit garde de soy. Et si comme il estoit en celle angoisse et en celle paine de son ost faire retourner dont il ne povoit à chief venir, comme celluy qui seul estoit et sans ayde, si luy recreut[520] son destrier soubs luy. Mais à ce besoing luy vint son escuier qui luy amena le sien propre et il saillit sus isnellement ainsi comme s'il fust frès, et retourna à peu de gens qui luy furent demourés, et s'adressa vers ses ennemis, son enseigne devant luy, que un chevalier portoit[521].

Note 519: _Donner estal._ Proprement _accorder le champ_, soutenir l'attaque.

Note 520: _Recreut._ Manqua, défaillit.

Note 521: Suger dit qu'il la portoit lui-même: _Vexillum præferens_.

Lors se férirent entre eulx, tout fussent-il peu de gens et par merveilleuse prouesse. Et si arrestèrent et prisrent des plus cointes de leur adversaires et firent leur ennemis ressortir, si qu'il ne peurent né n'osèrent avant aller, ainsi come s'il eussent trouvées les bones Artu[522] ou la grant mer qui leur fust au devant venue. Tout ainsi les firent-il ressortir pour la venue du roy et pour sa fière vertu. Et ainçois qu'il fussent retournés au Puisat leur furent venus au secours plus de cinq cens chevaliers de Normandie; et s'il fussent plus tost venus, bien péust estre qu'il eussent fait plus grant dommaige à l'ost de France.

Note 522: _es bones Artu._ Suger: _Ac si Gades Herculis offendant_. Les bones Arlu, sont les colonnes d'Hercule, et l'on peut trouver ici la preuve de ce que j'ai avancé ailleurs (Histoire des Manuscrits François, tome Ier), que le personnage d'_Artus_ avoit été souvent confondu avec celui d'Hercule.

En telle manière fu l'ost du roy desconfit en celle journée. Dont l'une partie s'enfouy à Orléans et l'autre à Estampes et l'autre à Peviers[523]. Et le roy qui moult estoit las et débattu de celle journée s'en vint à Thoury à tant peu de gens comme il luy estoit demouré. Si ne fu de rien esperdu de sa perte, mais en fu plus fier, à la guise du thoreau qui se est combattu, à qui sa fièreté double quant il a esté deffoullé et dégetté du fouc[524] aux vaches par les aultres thoreaux. Ainsi prist-il force et vigueur de soy-mesmes, et moult désiroit à courre sus ses ennemis aux fers de lances tranchans, tout seur d'avoir victoire. Adont manda et rassembla ses gens et moult les reconforta pour les ramener à prouesse par parolles et par promesses; et leur disoit que leur desconfiture avoit esté par follie et par mauvaise pourvéance, né ne povoit estre, si comme il leur disoit, que aucunes fois ne meschéist aux preudommes qui guerre maintenoient. Et de tant comme il avoient esté plus défoullés par leur orgueil de leur ennemis, de tant se devoient-il plus travailler de leur honte vengier, en lieu et en tems, aux roules lances et aux espieus trenchans.

Note 523: _Peviers._ Pithiviers.

Note 524: _Fouc._ Troupeau.

XI.

ANNEE: 1112.

_Coment le conte Thibaut referma le Puisat par l'aide des Normans, et coment le conte issi hors à bataille contre le roy et coment il fu desconfi; et coment le conte cria merci au roy et fit fin de la guerre._

Endementres que les François et les Normans entendoient à refermer le chasteau de Puisat, assembla le roy ses osts. Si estoit avec le conte Thibaut et avec l'ost des Normans, Miles de Montlehéry et Hue de Crecy et Guy de Rochefort ses frères qui bien estoient treize cens chevaliers à belles armes. Si mirent presque toute la semaine à refermer le Puisat et moult menaçoient le roy de mettre le siège devant Thoury. Pour ce le roy ne se fléchissoit, né pour leurs menaces ne laissoit de leur faire en toutes manières du pis que il povoit et s'efforçoil de leur nuire et par nuit et par jour et de les destourber, que il ne quéissent[525] loing vitailles.

Note 525: _Quéissent._ Cherchassent.

Et quant le chasteau fu presque refait où il avoient mis toute la semaine, et une partie des Normans s'en fu rallée en son pays, si demoura le conte Thibaut à moult grant ost. Et le roy qui toutes ses gens avoit assemblés chevaucha à grant force vers le Puisat. Ses ennemis encontra qui lors furent issus contre luy à bataille; et le roy et ses gens s'assemblèrent à eulx et en vengeance de la laidure qu'il leur avoient devant faicte les menèrent battant jusques au chasteau. Par vive force les firent flatir ens la porte. Et le roy les enclouyt dedens et mist autour bonne garnison de chevaliers esleus afin qu'il ne peussent issir; et prist une ancienne motte qui estoit près du chasteau ainsi comme à un ject de pierre, si avoit esté à ses ancesseurs; et dressa en assez peu de temps un chasteau dessus à grant paine et à grant travail que il leur convint souffrir pour les archiers et les arbalestriers et les fondeurs de ceulx dedens qui tiroient et fondoient seurement. Moult y avoit périlleux estrif et aux uns et aux aultres, car l'une partie et l'autre mettoit grant cure et grant contens à avoir l'honneur et la victoire. Et les chevaliers du roy qui moult estoient en esmay d'eulx vengier des griefs que ceulx dedens leur avoient fais aucuneffois ne finèrent oneques jusques à tant qu'il eurent bien garnye leur forteresse de riches armeures et fière chevalerie: seurs et certains que tantost comme le roy s'en seroit parti il leur convendroit deffendre hardiment, où il seroient tous occis par les cruelles armes de leurs ennemis.

Après ce, retourna le roy à Thoury, pour recouvrer illec sa force. Et d'illec amenoit et conduisoit la vitaille à ceulx qui estoient demourés en la garnison de la motte; une fois à peu de gens et privéement, et aucunes fois appertement et à force, parmy tous ses ennemis: si n'estoit mie sans grant péril, et pour ce que ceux du chasteau les destraignoient, car le lieu estoit près, et les menaçoient à mettre le siège entour. Et le roy esmeut ses herberges et les amena plus près. Ce fut à Janville[526] qui est ainsi comme à une petite lieue du Puisat. Et fist la tour clorre et ceindre de fors pieus agus. Et si comme l'ost se fu logié par dehors, le conte Thibaut qui de partout avoit ses gens semons et assemblés vint sur eux à grant force de gens, que des siens que des Normans, et leur courut sus soudainement; et les trouva auques[527] désarmés et désappareillés, tout entallentés d'eux découper ou faire lever du siège. Et le roy leur saillit sus tout armé, luy et ses gens. Lors commença la bataille aux champs et le poignéis fier et aigre des lances et des espées d'une part et d'autre. Si entendoient plus à avoir victoire que à leur vies sauver, comme ceulx qui de riens ne s'espargnoient et qui mieulx amoient à mourir en chump que faillir à victoire. Nul ne vous pourroit compter la fierté des uns et des aultres qui bien fu celluy jour veue en l'estour où l'en povoit véoir grans prouesses et merveilleuses hardiesses. Si n'estoit pas le jeu à droit parti, car le conte Thibaut avoit bien trois tans que le roy; dont il avoit assis les chevaliers du roy dedens la ville. Et le roy qui à moult petite compaignie estoit issu ne daigna fouir né ressortir pour paour de ses gens. Si n'avoit avec luy fors que Raoul le conte de Vermendois son cousin, et Droon de Mons[528] et ne scay quels autres trois nobles hommes; ains ama mieux souffrir les durs assaux de ses ennemis qu'il véoit venir à grans flotes, que rentrer en la ille pour paour et pour couardise. Et si comme le conte Thibaut fu venu jusques devant les tentes du conte de Vermendois en espérance de le détrenchier s'il éust pu, si luy saillit au devant le conte Raoul moult hardiment, et par ramposnes commença à dire que oncques mais les Briois, jusques à ce jour, n'avoient osé emprendre hardiesse contre les Vermendois, (et que mieux leur venist à faire leur fromages qui sont de grant los). Lors luy courut sus de si grant vertu comme il put trouver au destrier, entalenté de soy vengier du tort et de la honte qu'il luy avoit faicte. Si commença si haut à crier son enseingne que les chevaliers de la bataille le roy l'oïrent. Lors reprindrent cuer et se rallièrent ensemble et leur coururent sus et tant les destraignirent au brant d'acier et aux roides lances qu'il les firent tous tourner en fuite. Et ainsi les menèrent fuiant et chassant jusques au Puisat, et moult en occirent et prisrent. Et les aultres qui eschapper purent que il avoient travaillés et demenés par les boues enfermèrent en leur chasteau. Et ainsi avint, selon la doubteuse fortune de bataille, que ceux qui cuidoient estre vainqueurs furent vaincus, doulans et mats de leur occis et de leur prisons[529] et de leurs aultres dommaiges.

Note 526: _Janville._ Aujourd'hui petite ville à onze lieues de Chartres, entre Toury et le Puiset.

Note 527: _Auquel._ Presque.

Note 528: _Mons._ Le latin dit: _Montiacensis; Monchy_.

Note 529: _Prisons._ Prisonniers.

Quant le roy eut du tout eue la victoire de ses ennemis, le conte Thibaut qui du tout deffailloit et tournoit à declin ainsi comme celuy qui commence à chéoir de la roe de fortune, pour ce qu'il véoit de jour en jour croistre la force du roy, et les barons du royaume prendre en grief et en desdaing ce que il avoit prins guerre contre le roy son seigneur, si eut occasion de laisser la guerre après les grans pertes que luy et les siens avoient receues, et mesmement de celle qu'il avoit receue le jour devant.

Adont envoya ses messages au roy et si luy pria moult humblement qu'il l'asseurast et que il l'en laissast aller seurement jusques à Chartres sa cité. Et le roy qui trop estoit doux et débonnaire receut ses prières oultre ce que nul n'eust osé cuider, et si luy desconseilloient le plus de ses gens et luy disoient qu'il ne laissast pas ainsi aller né eschapper son ennemy qu'il tenoit jà ainsi comme prins, et mais n'avoit nulle viande; que il ne luy fist une aultre fois tel domage. Ainsi s'en alla le conte Thibaut, et laissa le chasteau et Hue en la volenté le roy. Et ce qu'il avoit commencé par bon commencement fina par mauvais définement. Et le roy vint du tout au desore,[530] par la volenté de Nostre-Seigneur et ne déshérita pas tant seullement celluy Hue, mais abatti le chasteau du Puisat et tous les murs; et tout le lieu rasa comme sé la divine malédiction l'eust interdit et asorbi[531].

Note 530: _Au desore._ Au-dessus.

Note 531: _Asorbi._ Absorbé.

XII.

ANNEES: 1113/1114.

_Coment ceus qui se tenoient au roy d'Angleterre et au conte Thibaut furent déshérités. Et coment le roy mut sur Thomas de Malle. Et coment il restora les villes aus églyses. Et coment fist pendre les traictres. De Haimon de Germegni qu'il fist venir à merci._

Long-temps après ce que celuy Hue fu revenu en l'amour et en la grace le roy, par moult d'ostaiges et de sermens qu'il luy eut fais, il se rebella contre luy de rechief et, pour ce, fu-il du roy de rechief assiégé et de rechief deshérité. Mais avant eut-il les costés tresperciés d'une roide lance, par la main Anseau le Gallendois[532] un merveilleux chevalier et séneschal de France. Né oncques ne voulut désaprendre son acoustumée traïson; tant que la voye d'oultre-mer où il mourut mist fin en sa vie.

Note 532: C'est un contre-sens. Suger, au contraire, dit que ce fut Anseau de Garlande qui fut percé de la lance du Hue du Puiset.

Après ces guerres et ces contens qui tant avoient duré, mains barons et mains hommes de religion misrent grant paine à mettre paix entre le conte Thibaut et le roy d'Angleterre d'une part, et le roy de France de l'autre. Si avint que par le jugement de Dieu, ceux qui contre leur seigneur et contre le royaulme de France s'estoient tournés et aliés au roy d'Angleterre et au conte Thibaut furent tous destruis par la guerre et perdirent leurs querelles qu'il cuidoient recouvrer; comme Lancelin, le conte de Dampmartin, perdit la querelle qu'il clamoit sur la cité de Beauvais[533], et pour ne scay quelles raisons; Payen de Montjay sur le chasteau de Livry[534] que le roy d'Angleterre luy avoit fermé à ses deniers, dont il fu tout esragié de duel; et Milles de Montlehéry le mariage de luy et de la seur Raoul le conte de Vermendois, dont il fu tout esragié de duel, par la raison de ne scay quel lignage qui trouvé y fu. Né oncques n'eut tant d'onneur né de joye de l'assemblement comme il eut de la honte et de l'ire du dessevrement. Si fu fait celluy jugement par preudes hommes et discrès; et fu pris ès loix et ès décrès qui dient que les obligacions et les aliemens qui sont fais contre paix soient du tout ramenés à néant.

Note 533: _Sur la cité de Beauvais._ Suger dit: Sur la _conduite_ de Beauvais. «Querelam Belvacensis conductûs.» C'étoit ou le droit de conduire dans l'armée du roi les communes, ou celui de délivrer les sauf-conduits dont avoient besoin les personnes qui voyageoient dans le Beauvoisis. On sait que _conduire_ quelqu'un signifioit autrefois lui _servir de sauf-conduit_.

Note 534: _Livry_ est un petit village sur la route de Meaux et à égale distance de Paris et de Ville-Parisis. Près de Livry sont les ruines d'un vieux château, sans doute celui que réclamoit Payen de Montjay. Quant à _Montjay_, aujourd'hui surnommé _La Tour_, il est situé au-dessous de Ville-Parisis.