Part 11

[237]Quant Omons, le maistre de l'enfant, eut oy les dures paroles et la cruelle sentence du roy, il pensa bien en son cuer ce qu'il en pouvoit avenir. Moult fu dolant et manda aux Normans, par un message, que le roy avoit mis leur seigneur en estroite prison. Quant il oyrent ce, si firent crier par tout Normandie que chascun jeunast trois jours et que sainte Eglyse féist continuel oroison à Dieu, que il leur sauvast leur seigneur.

Note 237: _Willelmi Gemet. hist., lib. 4, c. 4._

Tandis, parlèrent ensemble Omons, le maistre de l'enfant, et Yvons, le père Guillaume de Bellesme, et conseillèrent à l'enfant Richart qu'il se couchast en son list comme s'il fust forment malade et si durement que l'on cuidast qu'il deust mourir. L'enfant, qui fu sage, le fist ainsi et faignist que il fust si malade comme jusques à la mort. Les gardes qui ce virent ne firent pas grant force de luy garder, mais s'en alèrent l'un çà, l'autre là où il avoient à faire. Si avint ainsi que en my la mayson où l'enfant gisoit avoit un faiscel d'herbe; et Omons prist l'enfant et le lia dedens, et puis troussa sus son col comme s'il portast l'herbe à l'ostel pour les chevaux: ainsi s'en ala hors des murs, jusques à son ostel et luy avint si bien que le roy mangeoit à celle heure, et la gent de la cité communément. Si que il paroit trop pou de gens parmy les voies. Tantost prist l'enfant et monta sur un cheval et s'enfuy jusques à Coucy. L'enfant livra en garde au chastelain. Toute nuit chevaucha jusques au matin qu'il vint à Senlis. Moult s'émerveilla le conte Bernart, quant il le vist si matin, et luy demanda coment son nepveu Richart le faisoit. Moult fu lié quant Omons luy eut la besoingne comptée. Tantost s'en alèrent à Hues-le-Grant; la besoingne luy discovrirent et prinstrent de luy le serement que il l'ayderoit à délivrer l'enfant. Grant gent assemblèrent et s'en alèrent à Coucy et en ramenèrent l'enfant à Senlis, à grant joie.

V.

ANNEE: 944.

_Coment le roy, par l'enortement le conte Arnoul, guerroya Normandie, et coment Bernart le Danois l'apaisa, et obligea la bonne cité de Rouen à sa volonté._

[238]Lors fu le roy moult dolent quant il sceut que l'enfant fu ainsi soustrait. A Hues-le-Grant manda par ses messages et luy amonesta par sa foy que il luy rendist l'enfant; et il luy manda que il ne le tenoit mie, ains estoit en la garde de Bernart, son oncle, le conte de Senlis. Bien sceut le roy que il ne luy seroit point rendu. Tantost manda Arnoul, le conte de Flandres, qu'il venist à luy. De ceste besoingne parlèrent, et quant il furent ensemble au darrenier, dist le conte Arnoul: «Nous savons bien que le conte Hues-le-Grant a longuement esté de la partie aux Normans et pour ce le convient attraire et aveugler par promesse. Ottroies luy doncques la duchée de Normandie, dès le fleuve de Seine jusques à la mer, et retiens à toy la cité de Rouen, si que celle perverse gent vuident France par force quant il n'aront où fuyr né où il puissent habiter né il n'aront de luy né secours né ayde.»

Note 238: _Willelmi Gemet. hist., lib. IV, cap. 5._

Le roy crut Arnoul le trayteur et manda Hugues-le-Grant qu'il venist à luy parler à la Croix delez-Compiègne[239]; et quant Hues-le-Grant oy parler et disputer de donner cités et contrées, sy fu tantost aveuglé, et volt miex mentir son serement pour la convoitise de terre et de richesce que garder sa foy et sa loiauté vers l'enfant Richart son ami. Avant qu'il se départissent, jurèrent l'un et l'autre d'une part et d'autre la guerre contre les Normans et assemblèrent leur ost. Le roy entra en Caux et Hues-le-Grant en la cité de Baieux et commencèrent à desgaster la contrée par embrasement et par rapines. Quant Bernart le Danois vit ce, tantost envoya au roy message par le conseil Bernart le conte de Senlis, en telles paroles: «Très-puissant roy, pourquoy desgate-tu ainsy le pays, quant la cité de Rouen est en ta volenté? Prends débonnairement le service des Normans, pour ce que tu puisses eschiver en lieu et en temps le péril de tes ennemis, par leur ayde.»

Note 239: _A la croix deles Compiègne._ «Ad villam quæ dicitur _Crux_, juxtà Compendium.» Beneoit de Sainte-More nomme ce lieu _La Croix sus Getiezmer_. (Vers 14,416.)

[240]De cette parole que les messaiges luy apportèrent fu le roy moult lié; à sa gent manda qu'il se tenissent de la terre dommagier, et puis s'en ala à Rouen au plutost qu'il peust. Jusques aux portes alèrent à l'encontre le clergié et le peuple, chantant: «Bien viengne cil qui vient au nom de Nostre-Seigneur.» Au mangier s'assist le roy et le servoit Bernart le Danois, et quant il vit que le roy estoit aucques lié, si commença à parler en telle manière: «Très-noble roy, moult nous est grand honneur creue au jour duy, car nous avons esté jusques cy soubs la seigneurie au duc et nous sommes orendroit royal. Or tiengne Bernart le conte de Senlis son nepveu Richart, et nous soyons soubs toy longuement et te servons comme seigneur. Mauvais conseil te donna qui te loa à esmouvoir contre la noble chevalerie des Normans; où fu si fors et si puissans hommes que tu ne peusse espouventer par leur vertu? Saches que sont tous en ton commandement et qu'il désirent tous à chevauchier avecques toy en tes besoingnes de bon cuer et de bonne volenté. Si s'émerveillent moult, comment tu as armé Hugues-le-Grant ton ennemy, de vingt mille hommes, celui meisme qui tousjours eut à toy contens et guerre.»

Note 240: _Willelm. Gemet. hist., lib. IV, cap. 6._

Par ces parolles et par autres semblables fu le roy apaié; et manda à Hues-le-Grant que il issist tantost de Normandie; et luy manda telles parolles, que foie chose estoit de donner si grant povoir à aucuns sur la gent dont il se peust aydier à son besoing et dont il peust user par droit sans contredit. Moult fu Hues-le-Grant couroucié de ce mandement, mais toutesfois s'en issi-il tantost de Normandie et commanda à sa gent qu'il se tenissent de rapines. Après un pou, se parti le roy de Rouen et fist un prévost en la cité, qui avoit nom Raoul et du seurnom la Torte, qui de par luy receut les rentes et détermina les causes et les besoingnes. Si mauvaisement se contint qu'il estoit plus cruel que les paiens. Tous les moustiers et les églyses qui avoient esté arses au temps de persécucion abattoit jusques aux fondemens et faisoit porter la pierre pour rappareiller les murs de Rouen. Le moustier de Nostre-Dame de Jumèges abatty, et l'eust tout abattu sé ne fust un clerc, Climent avoit nom, qui en racheta deulx tours par déniers qu'il donna aux ouvriers. Les deux tours demourèrent en estat jusques au temps l'archevesque Robert, qui celle abbaye restora. Et quant le roy eut ainsi faite sa volenté si s'en retourna à Loon.

VI.

ANNEES: 944/945.

_Coment le conte Bernart le Danois et le roy Agrolde de Danemarche prindrent le roy._

[241]Moult se doubta Bernart le Danois que le roy ne retournast avec Hues-le-Grant, et qu'il ne feist plus grief aux Normans que devant. Pour ce manda Agrolde le roy de Danemarche, qui encore demouroit à Cherbourch, que il assemblast sa gent et la chevalerie de Costentin et de Baieux, et les envoyast par terre; et il appareillast ses nefs et entrast en Normandie par devers la mer et destruisist tout devant luy; si que il convenist que le roy venist à luy à parlement; et ainsi pourroit vengier la mort le duc Guillaume, son amy. Cil le fist volentiers: sa navie appareilla et entra en la terre, par devers la marine. Tost fu la nouvelle sceue en France que les Normans estoient retournés et qu'il avoient jà pris les pors et la marine à grant multitude de nefs. Bernart le Danois et Raoul la Torte mandèrent au roy ceste besoingne, et le roy assembla grant ost et s'en ala au plutost qu'il peust à Rouen. Au roy Agrolde manda que il venist à luy à parlement au gué qui est appelé Herluin, pour dire la raison pour quoy il dégastoit ainsi son royaume. Moult plut ceste chose au roy paien, car il avoit grant talent de vengier la mort du duc Guillaume. Quant il furent assemblés, si disputèrent longuement de ce que le duc Guillaume avoit ainsi esté mort; et un Danois regarda le conte Herlouyn, qui estoit sire du chastel, par quoy le duc avoit esté occis; d'une lance le feri parmi le corps et le jeta mort à la terre. Et Lambert, son frère et autres si coururent sus au Danois, et les paiens les reçurent fièrement. Là eut grant bataille et fort; si en occirent les Danois dix-huit des plus grans et des plus nobles, car il estoient garnis et appensés[242] de mal faire, et le roy ne s'en prenoit garde. Là eut faite grant occision de notre gent. Le roy meisme eut esté prins; mais il monta seur un isnel[243] cheval, et, ainsi qu'il s'enfuyoit, il chéy ès mains d'un chevalier. Moult le proia en promettant grans dons, sé il le sauvoit des mains à ses ennemis; et le chevalier, qui pitié en eut, l'envoia repostement en une isle. Et quant Bernart le Danois seut ce, par ceulx qui luy rapportèrent, il envoia querre le chevalier et le mist en prison. A la parfin recongnut-il coment il voloit sauver le roy par les promesses que il luy faisoit; pris fu le roy et mené en prison à Rouen par le commandement Bernart le Danois.

Note 241: _Willelm. Gemet. hist., lib. IV, cap. 7._

Note 242: _Garnis et appensés de._ Préparés par de longues réflexions à....

Note 243: _Isnel._ Prompt. Comme l'allemand _snell_.

[244]Moult fu dolente la royne Engelberge quant elle sceut ceste meschéance. Au roy Henry d'oultre Rin, son père, s'en ala et luy requist qu'il assemblast son ost et asségeast la cité de Rouen, et délivrast son seigneur de prison. Et il respondi que ce estoit à bon droit, pour ce que il n'avoit pas gardé la foy et le serement qu'il avoit au duc Guillaume; ains l'avoit brisié quant il avoit mis son fils Richart en prison. Lors dist à sa fille qu'elle luy aidast par ses gens, car il avoit assez à faire de ses propres besoingnes. Ainsi s'en retourna la royne Engelberge sans rien faire. Lors s'en ala à Hues-le-Grant et luy proia moult humblement qu'il méist paine à la délivrance de son seigneur; et Hues-le-Grant ala à Bernart le conte de Senlis et l'envoia parler aux Normans pour prendre jour de parlement à Saint-Cler-sur-Epte.

Note 244: _Willelmi Gemeticensis historia, lib. IV, c. 8._

Quant assemblés furent, si parlèrent longuement de la délivrance du roy. Au darrenier dist Hues: «Rendez-nous notre roy et prenez son fils en ostage en telle manière que nous assenblons cy une autre fois et que nous affermons ensemble paix et alliance.» A ce s'accordèrent les Normans et reçurent les ostages, c'est assavoir Lothaire, le fils le roy, et deulx évesques, Hildric, l'évesque de Beauvais, et Guy, l'évesque de Senlis. Ces choses ainsi faites, le roy s'en ala à Loon et les Normans s'en retournèrent à Rouen.

[245]Un pou après, les Normans assemblèrent grant ost et ramenèrent de Senlis l'enfant Richart, leur seigneur. Au terme qui fu mis assembla le roy les prélas de France et Hues-le-Grant, et s'en vint à grant gent sur l'eaue d'Epte. D'autre part, revinrent les Normans et amenèrent l'enfant Richart. Tant alèrent messages d'une part et d'autre, que paix et alliance furent fermées; à tant retourna le roy à Loon, et Richart et sa gent à Rouen.

Note 245: _Willelmi Gemet. hist., lib. IV, cap. 9._

[246]Raoul la Torte, que le roy avoit fait prévost de la cité, le [247]commença malement à traictier luy et sa gent; constraindre les vouloit à ce que il n'eussent chascun jour que vingt-deux deniers pour toutes choses. Et le duc, qui moult en fu couroucié, le chaça hors de la cité, et cil s'en ala à son fils qui estoit évesque de Paris. D'ilecque en avant eut le duc Richart et tint la terre de Normandie; et le roy Aigrold s'en retourna en Danemarche, et fist paix à Suène, son fils, qui du royaume l'avoit chacié.

Note 246: _Id.--id., c. 10._

Note 247: _Le._ C'est-à-dire: _Richard_.

Hues-le-Grant, qui bien véoit que le duc Richart proufitoit et amendoit en sens et en force, fist tant, par l'assentement Bernart, son oncle, le conte de Senlis, qu'il lui affia[248] sa fille, qui avoit nom Emma.

Note 248: _Luy affia._ Lui fiança, ou seulement lui promit. Wace emploie la même expression:

Li dus out deus enfés d'une dame enorée, Un fils et une fille, mes la fille est poisnée; Ne pooit por l'aage estre encor mariée, Mès li dus l'_afia_ ke li seroit donnée Dès qu'ele porroit estre par raison mariée.

(Vers 3871 et suiv.)

VII.

ANNEE: 946.

_Coment Othon, le roy d'oultre le Rhin, tint à grant ost sur les Normans par le conseil le roy et Arnoul le conte de Flandres. Coment il assailli la cité de Rouen, et coment il perdi son nepveu. Et coment il s'enfui._

Ceste chose espoventa moult le roy et plusieurs des barons de France, et meismement le conte Arnoul de Flandres, homme plain de grant trayson et de tricherie. Le roy regarda que ces deulx ducs, qui ensemble estoient joins par affineté, le povoient moult grever; et pour ce envoya Arnoul, conte de Flandres, par son conseil meisme à Othon, le roy d'outre le Rin, et luy mandoit que s'il abatoit Hues-le-Grant du tout en tout, il luy rendroit toute la terre de Normandie en sa main, et luy rendroit le royaume de Loraine (que les hoirs de France tenoient au temps de lors.) Et cil, qui moult fu lié quant il oy la promesse qu'il avoit tousjours désirée, assembla son ost comme il put plus et si grant comme il convenoit à tel besoingne. Les osts le roy Loys et les gens au conte de Flandres assembla avec les siens et courut à grant force sur la terre Hues-le-Grant; et quant il eust tout gasté ce que il trouva dehors les murs des chasteaux, il retourna en Normandie.

Un sien nepveu envoia devant la grant chevalerie, pour espouvanter la cité; si cuida que les Normans, qui dedens se tenoient, ne fussent de nulle prestesse; aux portes commença forment à assaillir, et ceux dedens ouvrirent soudainement les portes et leur coururent sus. Le nepveu le roy Othon occistrent dessus le pont et tant des aultres qu'il en eschappa petit. Après vint le roy Othon et le conte Amoul à toute leur gent; [249]et quant le roy Othon vist que la cité estoit si fort, et il eut d'autre part oy la mort de son nepveu et la desconfiture de sa gent, si commença à conscillier sa gent privéement dedens l'abbaye Saint-Oyen[250], coment il livreroit au roy le conte Arnoul, et puis à ordonner coment il s'en pourroit plus surement retourner. Mais quant le conte Arnoul apperçu que il béoit ce à faire, si fist trousser son harnois à mienuit et se mist à la fuyte, luy et sa gent; si que les aultres, qui pas ne le savoient, avoient grant paour de la freinte[251] de leurs chevaux.

Note 249: _Willelm. Gemet. hist., lib. IV, cap. 11._

Note 250: L'église de Saint-Ouen étoit alors dans le faubourg, comme le remarque Guillaume de Jumièges. «Cum suis clam coepit consultare infrà ecclesiam sancti Petri sanctique Audoeni, quæ in suburbio sita est civitatis.»

Note 251: _Freinte._ Le hennissement.

Au matin sceurent les deulx roys que le traytre s'en estoit alé. Tantost firent trousser leurs harnois et s'en alèrent, sans plus faire, par là meisme où il estoient venus et laissèrent le siège. Et les Normans issirent hors et s'appareillèrent et les enchauscièrent longuement, et assez en occistrent et pristrent. Celle fin dut bien avenir à celle besoingne qui par le conseil Arnoul le traystre fu commencée.

[252]Hues-le-Grant, qui moult fu dolent de sa terre qui estoit gastée, assist la cité de Poitiers. Tandis comme il tenoit le siège, leva un estorbeillon, et commença à espartir et à tonner si forment et venter, que ses paveillons furent desrompus d'amont jusque aval; et paour luy prist si grant, luy et tout son ost, qu'il leur sembloit qu'il ne peussent eschapper de ce pays: tantost tournèrent tous en fuye. Tout ce fist Nostre-Seigneur par le mérite saint Hilayre, qui est garde et deffendeur de la cité, (jà soit ce que son corps ne gise pas dedens. Mais qui vouldra son corps aourer, si voist à St-Denys, en France, où il repose honourablement[253]).

Note 252: Notre traducteur quitte ici Guillaume de Jumièges et passe au texte de Hugues, moine de Floury. (Voy. _Historiens de France_, tome VIII, p. 323.)

Note 253: On voit que c'est ici le moine de Saint-Denis qui croit devoir ajouter un mot au récit de Hugues, moine de Fleury.--_Voist_, aille.

_Incidence._ En ce temps plut sanc sur les ouvriers des champs.

_Ci fénist l'istoire du roy Loys._

CI COMENCENT LES GESTES LE ROY LOTHAIRE, FILS LE ROY LOYS.

* * * * *

I.

ANNEE: 960.

_Coment Lothaire, l'ainsné fils le roy Loys, fu couronné à Rains. Après, coment Thibaut, le conte de Chartres, accusa faussement le duc Richart de Normandie envers la royne Engeberge._

[254] En celle année meisme que ces choses avindrent mourut le roy Loys. Enterré fu en l'églyse Saint-Remy de Rains. Tout le cours de sa vie se démena en angoisses et en tribulution. Deulx fils eut de la royne Engeberge, la sereur Othon qui puis fu empereur: Lothaire et Charles. Cil Charles mena sa vie en privées besoingnes. Lothaire, l'ainsné, couronnèrent les barons à Rains devant les ydes de novembre.

Note 254: _Ex chronico Hugonis monachi Floriacensis, anno 954._

En celle année mourut Gillebert, le duc de Bourgoingne; la duchée laissa à Othon, le fils Hues-le-Grant; car cil Hues avoit sa fille espousée.

Bien sentit Hues-le-Grant que la fin de son temps approchoit. Les princes de sa duchée manda et par leur conseil livra Hues, l'ainsné de ses fils, au duc Richart de Normandie. De ce siècle trespassa vieux et plain de jour ès kalendes de juingnet. Enseveli fu en l'églyse Saint-Denys, en France. Trois fils eut de sa femme, la fille Othon, roy de Saissoingne, Hues, l'ainsné, Othon et Henry; cil Hues fu fait duc de France, Othon duc de Bourgoingne, si comme nous avons dit, et Henry, son frère, refu duc après sa mort.

_Incidence._--En ce temps mut contens entre Ensegise, l'évesque de Troies, et le conte Robert. Au derrenier le geta, le conte Robert, de la cité et l'évesque s'en ala en Sassoingne à l'empereur Othon. Grant plenté amena des Sesnes et assist la cité de Troies et le conte Robert. Du siège se despartirent les Sesnes et alèrent en proie vers la cité de Sens; mais l'archevesque Archambaut et le vieus conte Renart leur furent au-devant à grant gens à un lieu qui a nom Villers et les occistrent et Herpon leur prince. Cil Herpon s'estoit vanté qu'il ardroit les églyses et les villes qui sont sus la rivière de Venene[255], et qu'il ficheroit sa lance en la porte St-Lyon; mais il fu tout autrement, car il et sa gent furent prins et presque tous occis; son corps firent porter[256] en son pays en Ardenne; car sa mère, Warna, l'avoit ainsi devisé. L'archevesque Archambault et le vieus conte Renart le plainstrent et regrettèrent assez, tout fust-il par eulx occis, pour ce qu'il estoit leur cousin. Et quant Brunon (compains estoit de Herpon), un autre duc, vit qu'il fu occis et sa gent desconfite, si se leva du siège et s'en retourna en son pays.

Note 255: _Venene_, _la Vaine_, rivière qui se perd dans l'Yonne, justement à l'entrée de la ville de Sens.

Note 256: _Firent porter_. Le latin attribue ce transport aux serviteurs de Herpon. «Reportatus est in patriam suam Ardennam à servis suis.»

[257]En ce temps commença le conte Thibaut de Chartres à guerroier le duc Richart de Normandie; et prit sa terre à gaster et à proier. Mais le duc ne se souffri pas[258] longuement que il ne chastoiast sa présompcion; et quant le conte veit qu'il ne pouvoit venir à chief par luy d'omme si puissant, si se tirast à la royne Engeberge et luy commença à dire mauvaises paroles et fausses du duc, et luy fist entendre que jà le roy Lothaire, son fils, ne tendroit son royaume en paix tant comme il vesquit; dont ce seroit le souverain conseil que elle féist tant en toutes manières que si grant ennemi feust chacié du royaume ou occis. La royne, qui feust déçue, cuida qu'il déist voir. Tantost manda à Bruns l'archevesque de Couloingne et duc, son frère, qu'il aydast Lothaire, son nepveu, à garder et à deffendre son royaume; et s'il pouvoient en nulle manière, qu'il préissent Richart, duc de Normandie, car c'estoit le plus grant et le plus fort ennemi du royaume. L'archevesque Bruns envoia tantost un évesque au duc et luy manda qu'il ne laissast mie qu'il ne venist à luy à parlement en Amienois, car il vouloit mettre paix entre luy et Lothaire le roy; et feist, sé il pouvoit, que le royaume feust en sa pourvéance, et le duc qui n'y pensa à nul mal pensa que ce fust voir. Tantost vint, et quant il fust meus, deulx chevaliers luy vindrent au-devant qui estoient de la mesnie au conte Thibaut de Chartres, desquels l'un luy demanda: «Noble duc, où vas-tu? Veulx-tu estre duc de Normandie, ou estre pasteur de brebis hors de ton pays?» Et le duc leur demanda à qui il estoient chevaliers; et l'un des chevaliers luy dist: «Que te chaut à qui nous soions? tu scés bien que nous ne sommes pas à toy.» Lors s'averti le duc et se pensa qu'il estoient envoiés de qui que ce feust ou venus de leur volonté pour son bien et pour le avertir. Honorablement les salua. Au départir donna à un une armille[259] de fin or de quatre livres pesant; à l'aultre donna une moult riche espée dont le pommel et l'enheudeure[260] estoient de fin or de ce pois meisme. D'ilecques s'en retourna à Rouen et l'archevesque Bruns se retourna à Couloingne, mas et confus de ce que sa trayson estoit ainsi découverte.

Note 257: _Willelm. Gemetic. historia, lib. IV, c. 13._

Note 258: _Ne se souffri pas_. Ne patienta pas.

Note 259: _Une armille_. Un collier ou un bracelet. Plusieurs manuscrits, et entre les autres le numéro 6 Suppl. franç., portent: _Un fermeillet_.

Note 260 L'_enheudeure_. La poignée.

II.

ANNEE: 962.

_Coment le roy Lothaire et sa mère, par le conseil du conte Thibaut, se pourpensèrent de trayson et de desloiauté contre le duc Richart de Normandie._

[261]Bien vit le roy Lothaire et la royne sa mère que celle desloiauté, qui contre le duc Richart avoit été pourparlée, estoit à noient venue; pour ce, se pourpensa d'une autre manière de desloiauté par l'énortement et par le conseil le conte Thibaut de Chartres, et manda au duc telles paroles: «O tu, jusques à quant atendras-tu à moy rendre le service que tu me dois? Ne scés-tu bien que je suis roy de France, et que tu me dois hommage et services? N'auroient grant joie mes ennemis et les tiens sé guerre mouvoit entre moy et toy? Regarde doncques et mets jus de ton cuer toute manière de haines et de discordes et viens encontre moy hastivement, si que nous fermons entre nous alliance et amour à tousjours mais, et s'esjoïsse le roy du service de si grant duc, et le duc de la seigneurie de si grant roy.» Et le duc luy remanda que volentiers viendroit à luy et qu'il feroit sa volenté.

Note 261: _Willelm. Gemet. historia, lib._ IV, c. 14.

Quant le roy oï ce, si fu moult lié; lors manda les ennemis Richart, c'est assavoir le conte Baudouyn de Flandres, Geffroy le conte d'Angiers et Thibaut le conte de Chartres, et vint à tous ces trois contes sur la rivière de Eaune[262], là où il dévoient assembler; et le duc fu d'autre part de l'eaue avec sa gent. Toutesfois s'apensa-il et envoia aucuns de ses plus privés oultre l'eaue en l'ost le roy pour savoir coment il se contenoient. Si s'apperçurent tantost que cil trois ducs s'appareilloient pour courre contre le duc; tantost s'en retournèrent et luy distrent et loèrent qu'il s'en retournast isnellement, car il estoit traïs et que ses ennemis s'appareilloient efforciement de courre sus luy et sus sa gent. Lors assembla les siens entour luy et deffendi un pou le passage de l'eaue contre ses ennemis. Toutesfois, pour ce qu'il se doubla de la force du roy, s'en retrait et s'en retourna à Rouen.

Note 262: _Eaune_, rivière qui se jette dans la Béthune et dans l'Arques, à peu de distance du Dieppe.