Part 10

Note 209: _Ex chronico Hugonis Floriacensis, anno 926._

Note 210: _Kallos li mons._ Hugues de Fleury dit: _In monte Chalo_, et le continuateur d'Aimoin: _Kalomonte_.

Note 211: _Aimoini continuatio, lib. V, cap. 42._

II.

ANNEEs: 931/933.

_Des bones meurs Guillaume, duc de Normandie; et coment il eut victoire sur tous ceulx qui le vouloient grever._

[212]Après la mort Rollo, qui en baptesme fu appelé Robert, tint la duché de Normandie son fils Guillaume, dont l'istoire a fait là dessus mencion. La foy crestienne gardoit de tout son pouvoir loiaument; moult lui avoit Dieu donné de graces, car il estoit grant et bien fourmé, beau de face, les ieus vairs et clairs. Débonnaire estoit et de ferme volenté à ses amis, et à ses ennemis horrible et fier comme un lyon: en bataille fors comme un géant, si n'apétiçoit pas entour lui sa seigneurie, ains la croissoit de toutes pars: et pour ce conçurent maint des barons de France hayne et envie contre luy. En ce temps se vouldrent soustraire de son fié et de sa seigneurie les deulx princes de Bretaingne Alain et Berengier, qui au temps le roy Robert, son père, luy avoient fait hommage, et se vouldrent monstrer amis du royaume de France[213]; mais le duc entra tantost en Bretaingne; le pays dégasta, et abati les forteresses. Tant mena Alain qui estoit principal de cette félonie, qu'il le chasça en Angleterre, et Bérengier fist vers luy paix.

Note 212: _Willelmi Gemetie, lib. III, cap. 1._

Note 213: _Et se vouldrent monstrer amis._ Dom Bouquet a lu: _Et se vodrent mettre nu à nu de sor le roiaume de France._ Je pense que j'ai reproduit le véritable texte de la traduction; mais cette traduction est mauvaise. Il falloit: Et se disposent à faire la guerre au roi de France. «_Regi Francorum ulterius disponentes militare_.»

[214]Après ce lui sourdi autre guerre de ses gens meismes; car Riulphe, l'un de ses princes, le cuida chascier de Normandie. Grant gens assembla, le fleuve de Seine trespassa soudainement, et dedens la cité de Rouen assist le duc Guillaume qui dedens estoit à peu de gens, comme cil qui pas ne s'en prenoit garde. Si pensoit à ce le traître qu'il l'occiroit et se mettroit en saisine de la terre. [215]Et quant le duc se vit ainsi entreprins des siens meismes, il se commença à pourpenser quel conseil il pourroit prendre qui fust à son honneur et à sa sauveté, et par quoy il chastoyast les siens de telle présomption. En la fin issi hors par l'enticement Bothone[216] un sien amy qui assez luy disoit de laides paroles pour luy encouragier. A tout trois cens chevaliers armés courut sus ses ennemis; parmy les tentes se feri et fist d'eulx moult grant occision. Et les autres s'enfuyrent et se rependirent parmi les bois et là où il se peurent le miex sauver. Et Riulphe, qui vit la desconfiture de sa gent, se mist avec ceulx qui fuyoient et eschappa en telle manière. Après la bataille nombra le duc sa gent et trouva qu'il n'en y avoit nuls perdus. Le lieu où telle desconfiture fu est encore aujourd'huy appelé _Le Pré de la bataille_[217].

Note 214: _Villelm. Gemet., lib. III, c. 2._ Ce Riulphe étoit comte de Cotentin.--Wace, vers 2120:

Riouf fu uns Normanz qui mult se fist doter, Quens fu et sage et pros, bien sout mal en arrier; Quais fu de Costentin entre Vire et la mer.

Note 215: _Id.--c. 3._

Note 216: _Bothone. «A quodam Bothone procuratore suo indecenter lacessitus._ Les poètes françois Wace et Beneoît de Sainte-More entrent dans d'autres détails sur _Bothon_. Il étoit, dit Beneoît, comte du Bessin, et fut le _maître_ du jeune Guillaume Longue-Epée. Beneoît ne cite que les reproches de Bernart le Danois, mais Wace nous a conservé ceux de Boton:

Willame, dist Boton, tu dis grant avillance, Encore n'as feru né d'espée né de lance, Et jà t'en veille fuir, mult as dit grant enfance.... Cuars es, dist Boton, par le cors saint Fiacre, etc. (Vers 2175.)

Note 217: _Le pré de la bataille._ M. Le Prévost, dans les notes du roman de Rou, a remarqué que jusqu'à la fin du XVIIIème siècle on avoit continué de désigner sous ce nom le boulevard occidental de Rouen.

Au retourner de celle bataille, luy vint un message de Fescanp qui luy dist qu'il avoit un nouvel fils d'une noble dame qui avoit nom Sporte, qu'il avoit espousée. Moult fu lié de ces nouvelles; tantôt manda à Herie, l'évesque de Baieux, que il le baptisast ès sains fons et que il luy méist nom Richart. L'évesque, qui moult en fu lié, fist son commandement et puis envoia l'enfant pour nourrir à Fescanp.

Pour les victoires que le duc avoit de ses ennemis, estoit jà la renommée de luy espandue par diverses régions, si que les contes et les barons du royaume venoient de diverses parties et hantoient sa court; et il les honoroit tant et donnoit de si beaux dons que quant il se partoient de lui il s'en alloient en grant liesce. De la renommée de luy furent si esmeus le duc Hues et Guillaume le conte de Poitiers, et le conte Herbert, que il vindrent à luy en la forest de Lyons, où il se déduisoit en chasces de bestes sauvages moult lyement; à grant appareil les reçut tant comme il vouldrent demourer avec luy. Souvent disputèrent de moult de besoingnes et de maintes ordenances de choses temporeles. Entre ces choses et ces paroles luy requist Guillaume le conte de Poitiers une sienne seur qui avoit nom Gellot par mariage; et le duc luy octroia volentiers par le conseil Hues-le-Grant. Là meisme l'espousa à grant feste et puis l'enmena en son pays.

Pour la noblesse du duc et pour sa grant renommée desiroit moult aussi le conte Herbert que il eust à faire à luy et que hoirs ississent de luy qui fussent de son lignage. Tant parla le duc Hues de ceste besoingne, que le conte Herbert luy donna sa fille, et le duc Guillaume la prist et l'espousa et puis la mena à Rouen à grant compaingnie de sa gent.

_Ci fine du roy Raoul et du bon duc Guillaume de Normendie._

CI COMENCENT LES GESTES DU ROY LOYS, FILS CHARLE-LE-SIMPLE.

* * * * *

I.

ANNEE: 936.

_Coment le duc Guillaume de Normandie et les barons de France envoièrent en Angleterre querre Loys, le fils Charle-le-Simple; et coment il fu coroné en la cité de Laon._

(En ce temps n'avoit en France point de roy, car le roy Loys et la royne Algine, sa mère, s'en estoient fuys au roy d'Angleterre, son père.) [218]Et Hues-le-Grant et les autres barons de France envoyèrent Guillaume, l'arcevesque de Sens, en Angleterre à la royne Algine, qui femme avoit esté au roy Charle-le-Simple, et à Loys, son fils; et luy mandèrent que seurement s'en retournassent en France, elle et Loys son fils, et il luy feroient serement de loiauté et luy donneroient ostage. [219]Et le roy Elphetains d'Angleterre qui jà avoit oïe la renommée du duc Guillaume, si luy envoia ses messages, à tous grans présens et luy pria moult que il restablisist, par l'accort aux barons, son nepveu Loys au royaume. Et puis si luy prioit après, que il pardonnast son mautalent à Alain, le Breton, pour l'amour de luy. Les prières le roy reçut le duc moult voulentiers; à Alain pardonna son mautalent, et luy donna congié de retourner en son pays.

Note 218: _Hugonis monachi Floriacensis Chronicon, anno 936._

Note 219: _Historia Willelmi Gemetic., lib. III, c. 4._

Quant l'enfant Loys fu retourné en France, le duc Guillaume et le duc Hues-le-Grant et les autres barons du roiaume le firent couronne solempnelement en la cité de Loon.

[220]_Incidence._--Au second an après le seizième jour des kalendes de mars, furent vues compaignies toutes rouges parmi l'air; et commencèrent au cos chantant; et durèrent jusques au jour. Le neuviesme jour de devant les kalendes d'avril, les Hongres, qui estoient encore païens, vindrent en France et commencèrent à dégaster Bourgoingne et Aquitaine.

Note 220: _Hug. monach. Floriac. Chron., anno 937._

Le roy Loys n'eut pas régné plus de cinq ans, quant les barons de France se tournèrent contre luy. En celle année fu si grant famine que l'on vendoit un septier de fourment XXIIII souls; [221]et quant le roy Loys vit qu'il ne povoit durer ainsi, il manda au roy Henry d'oultre le Rin que moult voulentiers aroit à luy parlement et volentiers aroit à luy amour et alliance. Et il luy remanda[222] que en nulle manière il ne feroit cette chose sans la voulenté et sans l'assentement Guillaume, duc de Normandie. Et quant le roy oy ceste chose, il s'en ala au duc et luy requist conseil et ayde vers ses barons, et le duc le reçut honorablement comme roy et comme son lige seigneur et luy promist conseil et ayde vers ses barons. Ensemble demourèrent ne scay quans jours. Un chevalier qui Tigris avoit nom envoyèrent, tandis, au roy Loys d'oultre le Rin; et puis se mirent après à grant gent, et, pour celle besoingne, appelèrent avec eulx deulx princes de France, le duc Hues et le comte Herbert.

Note 221: _Willelmi Gemet., lib. III, cap. 5._

Note 222: _Il lui remanda._ Le roi de Germanie lui manda.

Lors s'assemblèrent les deulx roys sur le fleuve de Meuse et se logèrent l'un çà et l'autre là: et le duc Guillaume traveilla tant pour les deulx parties, que les deulx roys fermèrent amour et alliance l'un vers l'autre tout en la manière que il le devisa. A tant se départirent; si s'en retourna le roy Loys en France, et moult mercya le duc Guillaume de ce que il avoit fait pour luy.

[223]En son retour encontra le roy un message qui à luy venoit battant; qui lui compta que la royne Engeberge avoit eu un fils. Moult en fu le roy lié. Le duc pria, qui estoit encore avec luy, que il le levast des sains fons et luy méist nom Lothaire; le duc luy octroia et moult en fu lié. Ensemble s'en alèrent à Loon; là fu l'enfant baptisié. Du roy se parti le duc et s'en ala à Rouen. Tout le clergié de la cité yssirent hors contre luy, et chantoient: _Bien vingne qui vient au nom de Nostre-Seigneur!_ et le menèrent ainsi chantant jusques à l'églyse de Nostre-Dame. Là fist ses oroisons dévotement, et de là retourna en son palais.

Note 223: _Willelm. Gemet., lib. III, c. 6._

II.

ANNEE: 941.

_Coment le duc Guillaume voua être moine, et coment il establi Richart, son fils, duc de Normandie._

[224]_Incidence._ En ce temps avint que deux sains hommes religieux se départirent du Cambresis, d'une ville qui a nom Hapre. Si avoit nom l'un Baudouyn et l'autre Godoin, et pour mener vie solitaire s'en alèrent à Jumèges et commencèrent à coper haies et buissons à grant traveil de leurs corps, et aplanèrent la terre pour faire habitacion. Si estoit cil lieu près de l'abbaye de Jumèges, qui au temps de lors estoit gastée et détruicte et sans habitacion pour les guerres qui orent esté au temps de la persécucion. Lors avint que le duc Guillaume, qui lors chasçoit en la forest, les trouva et leur enquist de quel pays il estoient là venus et quel édifice c'estoit: car il estoient près de l'abbaye, si comme j'ai dit; et les preudhommes lui comptèrent leur besoingne que il venoient à faire, et luy offrirent du pain d'orge et de l'eaue en charité: et le duc Guillaume ne le voult prendre, ains en eut desdaing pour la vilté du pain d'orge et de l'eaue; et s'en parti le duc Guillaume et entra en la forest. Tantost trouva un grant porc et l'escria[225]. Le porc qui estoit grant et fort se retourna vers luy; et le duc, qui pas ne le redoubta, le reçut à l'espée; si avint que la hante de l'espée brisa et le porc luy courut sus et le débrisa et défoula malement, le duc touteffois sailly sus, et se pourpensa à chief de pièce[226] que ce estoit pour le despit qu'il avoit eu pour la charité des deulx preudhommes. Arrière retourna, leur requist la charité que il avoit devant refusée, et promist à Dieu qu'il restoreroit le lieu de Jumèges. Ouvriers y fist mettre pour le lieu nettoier et pour copper arbres et buissons. L'églyse de Saint-Père, qui estoit descheue, fist noblement rappareiller et recovrir: le cloistre et tous les offices rappareilla et garni. Tandis[227], ses messages envoia à Gelot, sa serour, la contesse de Poitiers, et luy manda que elle luy envoyast un nombre de moines preudhommes religieux, pour mettre en celuy lieu; et la contesse, qui moult fu liée et curieuse de ceste besoingne, luy envoia douze moines et leur abbé, qui Martin avoit nom; si les prist du couvent Saint-Cyprien de Poitiers. Au duc vindrent en la cité de Rouen; liement les reçut et les mena en l'abbaye et donna à l'abbé et le lieu et l'abbaye en la ville, et promist et voua à Dieu qu'il seroit moine en ce meisme lieu. Et eust tantost parfait son veu sé l'abbé ne l'en eust destourbé pour ce que son fils Richart estoit encore enfant: si se doubtoit que le pays ne feust troublé par aucuns pervers hommes, par le deffaut de l'enfant. Et touteffois fist-il tant vers l'abbé que il emporta une coulle et estamine et les mist en son escrin, fermant à une petite clef d'argent qu'il portoit à sa ceinture; dont, retourna à Rouen moult dolent qu'il ne pouvoit faire ce que l'abbé luy avoit deffendu.

Note 224: _Willelm. Gemet. hist., lib. III, c. 7._

Note 225: _Et l'escria._ C'est-à-dire le fit lever, fit mettre les chiens à sa poursuite. Le latin dit: «Quem festinè insequi coepit.»

Note 226: _A chief de pièce._ A la fin. Au bout du compte.

Note 227: _Willelm. Gemet. hist., lib. III, c. 8._

Tantost après fist assembler un parlement des princes de Normandie et de Bretaingne; et quant il furent tous assemblés, si descouvri son cuer. De ce furent tous si esbahis qu'il ne sorent que respondre; au darrenier, quant il furent revenus à eulx-meismes, si commencèrent tous ensemble à crier tretous: «Très-débonnaire sire, pourquoy nous veulx-tu si soudainement laissier; né cui laisseras-tu ta terre et ta seigneurie?» Lors respondi le duc: «Je ay,» dit-il, un fils qui a nom Richart; si vous prie tous que sé oncques m'amastes, que vous le me monstrez maintenant et que vous le retenez à seigneur au lieu de moy; car ce que j'ay promis à Dieu de bouche, je veux ce acomplir par fait.» A sa volenté s'accordèrent, tristes et dolens, puisqu'il le convenoit faire. Tantost fu envoyé messages à Fescamp pour l'enfant amener. Si luy fist chacun hommage, quant il fu venu, en la présence du père humblement; et le père l'envoya à Baieux en la garde Bethon, le prince des chevaliers, pour apprendre la langue danoise, pour ce qu'il sceust donner appertement response aux siens et aux estrangers. Si avons ces choses racomptées de l'abbaye de Jumèges, pour monstrer le saint propos et la dévotion que le duc Guillaume avoit au lieu.

[228]_Incidence._ En ce temps avint que Suènes, le roy de Danemarche, chasça Aigrolde, son père, du royaume; et cil qui eut oy parler du povoir et de la valeur le duc Guillaume, s'en vint en Normandie par mer, à tout soissante nefs garnies de bonnes gens armées. Et le duc le reçut bonnement et luy donna la contrée de Coustance jusques à tant que son ost fu creu, si qu'il peust recouvrer le royaume qu'il avoit perdu.

Note 228: _Willelm. Gemet. hist., lib. III, c. 10._

III.

ANNEE: 943.

_Coment le bon duc Guillaume fu traï et martirié par Arnoul, le desloyal conte de Flandres._

[229]Arnoul, conte de Flandres, qui estoit homme plain de trayson et de boisdie[230], faisoit en ce temps moult de tors et de griefs à ses voisins. Par son orgueil et par sa convoitise, au conte Herlouyn tolly le chastel de Monstereuil. Cil Herlouyn avoit espérance que Hues-le-Grant, qui ses sires estoit, ly deust aydier; mais quand il vit qu'il n'avoit de luy nul secours, il s'en ala au duc Guillaume et le pria en plourant qu'il le secourust contre le conte de Flandres, qui à tort le deshéritoit. Et le duc assembla son ost, mist le siège devant le chastel, à force le prist et le rendi au conte Herlouyn, et puis s'en retourna à Rouen. En ce temps trespassa Franques l'arcevesque de la cité: si fu après luy un autre qui Guimars avoit nom.

Note 229: _Id. id. c. 9._

Note 230: _Boisdie._ Fraude.

[231]Tant fu couroucié le conte Arnoul de Flandres pour ce chastel encontre le duc Guillaume qu'il commença à traitier de sa mort entre luy et aucuns des barons de France, et s'allièrent par serrement contre luy; et le desloyaus traytre qui par trayson véoit à faire ce qu'il avoit en propos, manda au duc que moult volentiers aroit à luy amour et alliance; et que, pour l'amour de luy, pardonneroit à Herloyn son mautalent, et que sé ne fust pour aucunes maladies qu'il avoit, il alast à sa cour meisme; et pour ce luy prioit que il luy nominast un lieu où il peust aler et avoir à luy parlement seur ceste besoingne. Et le duc, qui en toute manière désiroit à prendre l'abit de moinage et à entrer en religion, et qu'il peust tout avant laissier la terre, luy assena à Péquegni[231], sur l'eaue de Somme. Là vindrent de deulx parties. Si fu l'ost du duc d'une partie de l'eaue, et l'autre de l'autre. En my l'eaue estoit une ille; là s'assemblèrent les deulx princes et s'entrebaisèrent, puis s'assistrent pour traitier de la besoingne pourquoy il devoient estre venus; et Arnoul, qui la trayson Judas avoit au cuer, detint longuement le duc en truffes. A la parfin, après plusieurs baisiers et plusieurs seremens de paix et d'amour se départirent. Si estoit jà vers le soleil couchant. Ainsi comme le duc dut entrer en sa nef et trespassoit le flum, Heris, Basox, Robert et Riulphes, cil quatre fils de Deable, le commencèrent à huchier que il retournast, car leur sire avoit oublié à parler à luy d'un secret moult profitable. Quant le duc fu retourné et il eut mis le pied hors de la nef, il sachèrent les espées et martirièrent l'innocent, né ne pot avoir nul secours de sa gent pour l'eaue qui estoit trop profonde, et il n'avoit nul vaissel. Le corps du saint homme laissèrent, et tournèrent en fuie. Et Bérengier et Alain commencèrent à crier, quant il virent occire leur seigneur né secourre ne le povoient. A chief de pièce pristrent le corps et le dépoillèrent; la petite clef d'argent trouvèrent pendant à la ceinture qui le trésor gardoit, c'est assavoir la coulle et l'estamine dont il eust esté vestu en l'abbaye de Jumèges, sé il fust retourné vif. En une bière mistrent le corps et remportèrent à Rouen à grans pleurs et à grans cris. Encontre vint le peuple et le clergié à pleurs et à soupirs, et l'emportèrent à l'églyse Nostre-Dame. Si envoyèrent tantost querre l'enfant Richart à Baieux pour ce qu'il feust à l'enterrement de son père. Là renouvelèrent les barons leur serement à l'enfant et le baillèrent en la garde de Bernard le danois, et vouldrent qu'il feust gardé dedens les murs de la cité.

Note 231: _Willelm. Gemet. hist., c. 11._

Note 232: _Pecquegny_, ou Piquigny, sur la Somme, en Picardie, à trois lieues d'Amiens.--_Willelmi Gemet., lib. III, c. 12._

Mort fu le glorieux duc Guillaume, par seurnom Longue espée, en la seiziesme kalende de janvier, en l'an de l'Incarnation Nostre-Seigneur neuf cent quarante-trois.

IV.

ANNEE: 944.

_Coment le roy Loys tint en prison Richart, fils le bon duc Guillaume. Et coment il fu porté hors de prison dedens un faiscel de herbe._

[233]Après la mort le duc Guillaume, qui fu sacrefié par les mains des traytres en pure innocence, ainsy comme un aigneau, Richart, son fils, demoura pour la terre tenir. Enfant estoit bel et gracieux et bien morigené de souveraine noblesse; et selon la manière son père demonstroit oudeur de vertus ainsi comme le rameau qui est esrachié de l'arbre aromatique est doux et fleurant. Et jà commençoit à venir à si grant perfection de valleur et de sens, que ce que il povoit entendre de sens et de bien selon tel âge, il retenoit en son cuer sans oublier. [234]Et quant les barons de France oyrent parler de la démesurée trayson Arnould, conte de Flandres, et de la mort le duc Guillaume, en y eut qui en furent dolens, et aucuns qui estoient parçonniers de la trayson et qui avant ce faisoient semblans qu'il fussent ses amis, descouvrirent leurs cuers et monstrèrent appertement le mal qu'il avoient conçus. Le roy meisme cuida que grans honneurs luy feussent escheus; au plutost qu'il peut s'en ala à Rouen ainsi comme pour conseil prendre aux Normans de la vengeance du duc Guillaume. Si ne prenoit or pas garde aux bénéfices et aux honneurs que le duc luy avoit faites, né à la foy entérine que il luy avoit toujours portée. Anlech, Rodulphe et Bernart, qui estoient tuteurs de l'enfant et gardes de la duchée, le reçurent à grant honneur comme il afferoit à si grand roy et se mistrent à luy et à sa volenté pour la fiance de leur petit seigneur. Et le roy, qui vit la terre belle et plantureuse et plaine de bois et de rivière, fu meus par convoitise et leur commença teles choses à promettre qu'il n'avoit talent de tenir, et ce meismement que il béoit à retenir pour soy meismes. Lors commanda que l'enfant Richart fust amené devant luy; moult le vit bel et avenant et de noblesse fournie, et voult qu'il fust nourri en son palais et que on luy quist autres nobles enfans pour luy faire compaingnie. Maintenant, courut la nouvelle par toute la cité que le roy vouloit à l'enfant sa terre tollir et qu'il l'avoit jà détenu en prison.

Note 233: _Willelm. Gemet. hist., lib. IV, cap. 1._

Note 234: _Id.--id., c. 2._

Tout maintenant s'armèrent les bourgeois et la chevalerie et coururent parmi la cité tout foursenés, les espées et les glaives ès poins, et vouloient jà entrer au palais pour le occire. Moult eut le roy grant paour quant il vit ce. Par le conseil de Bernart le danois, prit l'enfant entre ses bras et vint à l'encontre eulx; et quant il virent leur seigneur que le roy tenoït, si se tindrent en paix; et le roy, qui volt du tout leurs cuers apaisier, rendit à l'enfant sa terre et son héritage, sauf son droit et son hommage et le reçut en grande foy et en loiauté, et promist aux bourgeois que il leur rendroit bien introduit et bien aprins de la doctrine du palais.

[235]Quant ces choses furent ainsi apaisiées, le roy retourna en France, mais moult porta griefment la villenie que les Normans luy eurent faite, et enmena l'enfant avec luy, c'est assavoir Richart, ainsi comme pour prendre vengeance de la mort de son père. Et le traytre Arnoul, conte de Flandres, se doubla moult que le roy ne courrust sur luy pour la félonie qu'il avoit faitte. Avant envoya par ses messages dix livres d'or, puis vint à court et se voult en telle manière escuser devant le roy et luy dist qu'il n'avoit coupes en la mort le duc Guillaume, et promist que il banniroit hors la contée de Flandres les homicides qui ce avoient fait, sé le roy luy commandoit; puis si dist au roy que il luy déust ramembrer des dommages et des reproches que les Normans luy avoient faits jadis à luy et à son père; et pour ce, luy disoit-il, qu'il feust du tout hors du soupeçon et que plus grant dommage ne luy avenist, le meilleur conseil estoit que l'enfant Richart eust les jarès cuis et que il feust gardé à tousjours en prison, et que les Normans feussent si forment constrains et agrevés de toltes et de tailles que il leur convenist vuidier France par force et retourner en leur pays. Le roy qui feust aveuglé par les dons du trayteur et par les mauvaises paroles qu'il luy amonesta, le délivra du crime dont il déust estre pendu, et destourna son mautalent sur l'enfant qui rien ne luy avoit meffait, à l'exemple de Pilate qui Barrabas, le larron, laissa aler et Jésus-Crist condempna à mort. Lorsque ce fu fait, estoit le roy à Loon; et quant l'enfant fu venu de chascier et de jouer, le roy le prist forment à menacier et à laidengier, et l'appela fils de putain[236], et luy dist que sé il ne se chastioit, il luy feroit cuire les jarès et l'osteroit de tous honneurs; et après commanda que il fust bien gardé si que il ne peust eschapper.

Note 235: _Id.--id., c. 3._

Note 236: Ces mots sont, comme on le voit, anciens dans noire langue. «Meretricis filium ultrò virum alienum rapientis eum vocavit.»