Part 39

"Weill," said he, "ye are wise eneuch; but ye will find that men will nocht beir with you in times to cum, as thay haif done in tymes bypast."

"Gif God stand my freind," said the uther, "as I am assurit he of his mercie will, so lang as I depend upon his promeise, and prefer his glorie to my life and warldlie proffeit, I littill regaird how men behave thame selffis towardis me; nether yit knaw I quhairin till ony man hes borne with me in times past, unles it be, that of my mouth thay haif heard the word of God, quhilk in times to cum, gif thay refuise, my hairt wilbe persit, and for ane seasone will lament; but the incommoditie wilbe thair awne."

And efter thir wordis, quhairinto the Laird of Lochinvar[932] wes witness, thai departit. But unto this day, the 17th of December 1571,[933] thay met nocht in sick familiaritie as thay had befoir.

[932] Sir John Gordon of Lochinvar: see _supra_ p. 260, note 27.

[933] This date forming part of the text, proves that this portion of the MS. must have been transcribed at that date: see introductory notice, vol i. p. xxx.

The bruit of the accusatioun of Johne Knox being divulged, Mr. Johne Spens of Condie, Advocat,[934] a man of gentill nature, and ane that professit the doctrine of the Evangell, came, as it wer, in secreit to Johne Knox, to inquyre the cause of that grit bruit. To quhom the said Johne wes plane in all thingis, and schew unto him the dowbill of the letter. Quhilk heard and consydderit, he said, "I thank my God, I came to you with ane feirfull and sorrowfull hairt, feiring that ye had done sick ane cryme as lawis mycht haif punischit, quhilk wald haif bene na small trubill to the hairtis of all sik as hes ressavit the worde of life quhilk ye haif preichit; but I depairt gritlie rejosit, alsweill becaus I persaif your awin confort, evin in the myddis of your trubillis, as that I cleirly understand, that ye haif committit no sik cryme as ye ar burdenit with: Ye wilbe accusit, (said he,) but God will assist you." And sua he departit.

[934] Mr. John Spens of Condie was Queen's Advocate from 1558, and has several times been mentioned by Knox: see vol. i. p. 419. He died in June 1573. (Register of Confirmed Testaments, 5th March 1577-8.)

[Sidenote: BEFOIR THAY DISDAINED NOT TO CUM TO HIS AWIN HOUS.]

[Sidenote: THE SECRETOURIS COUNSELL TO JOHN KNOX]

The Erle of Murray and the Secretarie send for the said Johne to the Clerk of Registeris house, and began to lament that he had so heighlie offendit the Quenis Majestie, the quhilk thai feirit sould cum to ane grit inconvenient to him self, gif he wer not wyselie forsene. Thay schew quhat paines and travell thai had tackin to mittigat hir anger, but thai could find na thing but extremitie, unless he him self wald confes his offence, and put him in hir Grace's will. To quhilk heidis the said Johne answerit as followis:--

[Sidenote: JOHN KNOX HIS ANSUER.]

"I praise my God, through Jesus Chryst, I haif leirnit nocht to cry conjuratioun and tressoun at everie thing that the godles multitude dois condempne, neither yit to feir the thingis that thai feir. I haif the testimonie of ane gude conscience, that I haif gevin no occasioun to the Quenis Majestie to be offendit with me; for I haif done na thing but my dewtie, and so quhatsoevir sall thairof insew, my gude houpe is, that my God will gif me patience to beir it. But to confes ane offence whair my conscience witnesseth thair is nane, far beit from me."

"How can it be defendit?" said Lethingtoun: "Haif ye not maid convocatioun of the Quenis leigis?"

"Gif I haif nocht," said he, "a just defence for my fact,[935] lat me smart for it."

[935] In MS. 1566, "my falt."

"Lat us heir," said thai, "your defensses; for we wald be glaid that ye mycht be found innocent."

"Nay," said the uther, "for I am informit, and that be diverse, and evin be you, my Lord Secreatarie, that I am allreddie condampnit, and my cause prejudged: Thairfoir I mycht be reputed ane fooll, gif I wald mak you previe to my defensses."

[Sidenote: THIS WES THE FIRST TYME THAT THE ERLE OF MURRAY SPAK TO THE SAID JOHN[936] EFTER THE PARLIAMENT.]

[936] In MS. G, "spack to Johne Knox,"]

At thoise wordis thai semeit baith offendit; and so the Secretarie departit. But the said Erle remanit still, and wald haif interit in farder discourse of the estait of the Court with the said Johne, quho ansuerit, "My Lorde, I understand mair than I wald of the effairis of the Court; and thairfoir it is nocht neidfull that your Lordschip trubill you with the recompting thairof. Gif ye stand in gude caise I am content; and gif ye do not, as I fear you do nocht allreddie, or ellis ye sall nocht do or it be lang, blame nocht me. Ye haif the Counsalouris quhome ye haif chosin; my waik judgement baith ye and thay dispyseit: I can do no thing but behald the end, quhilk, I pray God, be other than my trubilled hairt feireth."

[Sidenote: JOHN KNOX CALLIT BEFOIR THE QUENE AND COUNSELL IN ANNO 1563.][937]

[937] In MS. G, "in December 1563."

Within four days, the said Johne wes callit befoir the Quene and Counsell betwix sax and sevin houris at nycht:[938] The seassoune of the yeir wes the middes of December. The bruit rysing in the toune, that Johne Knox wes send for be the Quene, the brethering of the Kirk[939] followit in such noumer, that the inner close was full, and all the stairs, evin to the chalmer dure whair the Quene and Counsall sat; quho had bene ressonyng amangis thame selves befoir, but had nocht fullie satisfeyit the Secretaris mynd. And so wes the Quene retyreit to hir cabinet, and the Lordis wer talkand ilk one with uther, as occasioune served. Bot upoun the entre of John Knox, thay wer commandit to tak thair places, and so thai did, sytting as Counsalouris one aganis ane uther.

[938] Knox states that his examination before the Privy Council was the middle of December. Randolph, in one of his dispatches to Cecil, on the 21st December, mentions that the Lords had assembled for three causes, the last of which was, "To take order with Knox and his faction, who intended, by a mutinous assembly made by his letter before, to have rescued two of their brethren, (viz. Armstrong and Cranston,) from course of lawe, for usinge an outrage upon a Priest saying Masse to the Queen's household at Halliruydhous." (Keith's Hist., vol. ii. p. 210.)

[939] In MS. G, "the brethren of the Toun."

The Duke, according to his dignitie, began the one syde. Upone the uther syde sat the Erle of Argyle, and consequentlie followit the Erle of Murray, the Erle of Glencarne, the Erle of Merchell, the Lord Ruthven, the commoun officeris, Pettarro than Controllor, the Justice Clark, Mr. John Spens of Condie Advocat; and diverse utheris stude by. Removeand from the tabill sat auld Lethingtoun, father to the Secretour, Mr. Henrie Synclare then Bischope of Rosse, and Mr. James M'Gill Clark Register.

Thingis thus put in ordour, the Quene cam furth, and with no littill warldlie pomp, wes placeit in the chyre, haifing twa faithfull supportis, the Maister of Maxwell upoun the ane tor, and Secretour Lethingtoun on the uther tor of the chyre; quhairupoun thay waittit dillegentlie all time of that accusatioun, sumtymes the one occupying hir ear, sumtymes the uther. Hir pomp lackit one principall point, to wit, womanlie gravitie; for when sche saw John Knox standing at the uther end of the tabill bair-heided, sche first smyleit, and efter gaif ane gawf lauchter. Quhairat quhen hir placeboes[940] gaif thair _plaudite_, affirming with lyke countenance, "This is ane gude begyning," sche said: "But wat ye whairat I lauch? Yon man gart me greit, and grat never teir him self: I will see gif I can gar him greit." At that word the Secretoure quhisperrit hir in the ear, and sche him agane, and with that gaif him ane letter. Efter the inspectioun thairof, he directit his vissage and speche to Johne Knox in this maner:--

[940] In MS. 1566, "hir placebo boyis."

"The Quenis Majestie is informit, that ye haif travellit to raise a tumult of hir subjectis against hir, and for certificatioun thairof, thair is presented to hir your awin letter subscryvit in your name. Yit because hir Grace will do na thing without ane gude advysement, sche hes convenit you befoir this pairt of the Nobilitie, that thai may witness betwix you and hir."

"Lat him acknawlege," said sche, "his awin hand writ, and than sall we juge of the contentis of the letter."

And so wes the letter presentit from hand to hand to Johne Knox, who, taking inspectioun of it, said, "I glaidlie acknawlege this to be my hand writ: and also I remember, I dyteit ane letter in the month of October, giffin significatioun to the brether in sindrie quarteris, of sick thingis as displesit me. And that gude opinioun haif I of the fidelatie of the Scribes that willinglie thai wald nocht adulterat my originall, albeit I left diverse blankis subscryvit with thame; and so I acknawlege boith the hand write and the dytement."

"Ye haif done more," said Lethingtoun, "than I wald haif done."

"Charritie," said the uther, "is not suspicious."

"Weill, weill," said the Quene, "reid your awin letter, and than answer to such thingis as salbe demandit of you."

"I sall do the best I can," said the other; and so with loud voce he began to reid as befoir expressed.

Efter that the letter was red to the end, it was presentit agane to Mr. Johne Spens; for the Quene commandit him to accuse, as he efter did, but verie gentillie,--Efter, we say, that the letter was red, the Quene, behalding the hoill tabill, said, "Hard ye evir, my Lordis, ane mair dispitfull and tressonable letter?"[941]

[941] The Letter on which this accusation was founded, is printed at page 395.

Quhill that no man gaif ansuer, Lethingtoun addressit him to John Knox, and said, "Maister Knox, ar ye nocht sorie from your hairt, and do ye nocht repent that sick ane letter hes past your pen, and from you is cumin to the knawlege of utheris."

Johne Knox ansuerit, "My Lord Secretour, befoir I repent I maun be taucht of my offence."

"Offence," said Lethingtoun, "gif thair wer na mair but the convocatioun of the Quenis leigis, the offence can nocht be denyit."

"Remember your self, my Lord," said the uther, "thair is a differens betwix ane lauchfull convocatioun, and ane unlauchfull. Giff I haif bene giltie in this, I haif oft offendit sen I come [last] in Scotland: for what convocatioun of the brethering hes ever bene to this day into quhilk my pen servit not? Befoir this no man led it to my chairge as ane cryme."

"Than wes than," said Ledingtoun, "and now is now: We haif no neid of sick convocatiounis as sometimes we haif had."

Johne Knox ansuerit, "The time that hes bene is evin now befoir my eyis; for I see the pure flock[942] in no less daunger nor it hes bene at ony time befoir, except that the Devill hes gottin a vissorne upon his face. Befoir he come in with his awin face, discoverit be opin tyrannie, seiking the destructioun of all that hes refuissit idolatrie; and than I think ye will confess the brethering lauchfullie assembled thame selfis for defence of thair lyffeis. And now the Devill cumis under the cloke of Justice, to do that quhilk God wald nocht suffer him to do by strength."

[942] In MS. 1566, "folk."

"What is this?" said the Quene. "Me think ye tryfill with him. Quho gaif him authoritie to mak convocatioun of my leigis? Is nocht that tressoun?"

"Na, Madam," said the Lord Ruithven, "for he makis convocatioun of the pepill to heir prayer and sermoun almost daylie, and whatevir your Grace or utheris will think thereof, we think it no tressoun."

"Hald your peace," said the Quene, "and let him mak ansuer for him self."

"I began, [Madam]" said Johne Knox, "to ressoun with the Secratour, quhome I tak to be ane far better dialectician[943] then your Grace is, that all convocatiouns ar nocht unlauchfull: and now my Lord Ruithven hes gevin the instance, quhilk gif your Grace will deny, I sall addres me for the prufe."

[943] In MS. 1566, "dalectiane."

"I will say nathing," said the Quene, "aganis your religioun, nor aganis your convenyng to your sermonis: But quhat authoritie haif ye to convocat my subjectis quhen ye will, without my commandiment?"

"I haif no plesour," said Johne Knox, "to declyne from the formar purpoise. And yit, Madam, to satisfie your Grace's two questiounis, I ansuer, that at my will I nevir convenit four persounis in Scotland; but at the ordour that the bretherin hes appoyntit, I haif gevin diverse adverteismentis, and grit multitudis haif assemblit thairupone. And gif your Grace complane that this wes done without your Graceis commandiment, I ansuer, sa hes all that God hes blissed within this Realme from the begyning of this actioun. And thairfoir, Madam, I maun be convyckit be ane just law, that I haif done aganis the deutie of Godis messinger in writting of this letter, befoir that either I be sorie, or yit repent for the doing of it, as my Lord Secretour wald perswaid me: For what I haif done, I haif done [at] the commandiment of the generall Kirk of this Realme; and thairfoir, I think, I haif done na wrang."

"Ye sall not eschaip so," said the Quene. "Is it nocht tressoun, my Lordis, to accuse ane Prince of creweltie? I think thair be Actis of Parliament aganis sick whisperaris." That wes grantit of monie.

"But whairintill," said Johne Knox, "can I be accusit?"

"Reid this pairt of your awin bill," said the Quene, quhilk began, "Thir feirfull summondis is direct aganis thame, (to wit, the bretherin foirsaid,) to make, no dout, preparatioun[944] upoun ane few, that ane dore may be opened till execute creweltie upoun ane grytter multitude." "Lo," said the Quene, "quhat say ye to that?"

[944] In MS. G. "a preparatyve."

Quhill monie doubtit quhan the said Johne sould ansuer, he said unto the Quene, "Is it lauchfull for me, Madam, to ansuer for my self? Or sall I be dampned befoir I be hard?"

"Say what ye can," said sche; "for I think ye haif eneuch ado."

"I will first [then] desyre this of your Grace, Madam, and of this maist Honorabill audience, quhidder gif your Grace knawis nocht, that the obstinat Papistis ar deidlie ennemeis to all sick as profess the Evangill of Jesus Christ, and that thai moist eirnistlie desyre the exterminatioun of thame, and of the trew doctrine that is taucht within this Realme?"

The Quene held hir peace: but all the Lordis, with commoun voce, said, "God forbid that either the lyves of the faythfull, or yit the staying of the doctrine, stude in the power of the Papistis: for just experience hes tauld us what creweltie lyis in[945] thair hertis."

[945] In MS. G, 1566, "is in."

"I maun proceid than," said Johne Knox, "seing that I persaif that all will grant that it wer ane barbarous creweltie to destroy sick ane multitude as profess the Evangell of Jesus Christ within this Realme, quhilk ofter then anis or twyse thai haif tempit to do be force, as thingis done of lait dayis do testify, quhairof thay, be God and his providence, being dissapointit, haif inventit moir craftie and daingerous practises, to wit, to mak the Prince pairtie under cullour of law: and so what thai could not do [be] oppin force, thai sall perform be craftie deceat. For who thinkis, my Lordis, that the insatiable crewaltie of the Papistis, within this Realme, I meane, sall end in the murthering of these two bretherin now injustlie summond, and moir unjustlie to be accusit. I think no man of judgement can sa esteme, but rayther the direct contrair, that is, that by this few noumer thai intend to prepair a way to thair bloodie interprises aganis the whole. And thairfoir, Madam, cast up when ye list the Actis of your Parliment. I haif offendit nathing aganis thame; I accuse nocht in my letter your Grace, nor yit your natoure of creweltie. But I affirm yit agane, that the pestilent Papistis, quho have inflamit your Grace without caus againis those pure men at this present, ar the sonis of the devill; and thairfoir maun obey the desires of thair father, quho hes bene ane liar and ane murtherour from the begyning."

"Ye forget your self," said ane; "ye ar not now in the pulpit."

[Sidenote: LAT THE WARLD JUGE QUHAT EFFER SCHORTLIE ANSUERIT.][946]

[946] This marginal note is omitted in MS G.

"I am in the place," said the uther, "quhair I am demandit of conscience to speik the treuth; and thairfoir I speik. The treuth I speik impung it quhoso list. And heirunto [I add,] Madam, that honest, gentill, and meik naturis be appeirance, be wickit and corrupt counsallouris, may be convertit and alter[947] to the direct contrair. Exampill we haif of Nero, who in the begyning of his impyre, we find haifing some naturall schame;[948] but efter that his flatteraris had encuraged him in all impietie, alleging, that na thing wes either unhonest nor yit unlauchfull for his personage, quho wes Empriour abuif utheris: quhen he had drunken of this coup, I say, to quhat enormiteis he fell, the historeis beiris witnes. And now, Madam, to speik planelie, Papistis and conjureit ennemeis to Jesus Christ, haif your Graceis eare patent at all tymeis. I assure your Grace thai ar daingerous counsallouris, and that your Mother fand."

[947] In MS. G, "be subverted and altered."

[948] In M.S. 1566, "some mortell."

As this wes said, Ledingtoun smyleit,[949] and spak secreitlie to the Queue in hir eare; what it wes, the tabill hard nocht. But immediatlie sche addressit hir vissage, and spack to Johne Knox, and said, "Weill, ye speik fair eneuch heir befoir my Lordis; but the last tyme I spak with you secreitlie, ye causit me weip monie salt teiris, and said to me stubernelie, 'Ye set not by my greitting.'"

[949] In MS. G. "smyrklit."

"Madam," said the uther, "becaus now the secound tyme your Grace hes burdened me with that crime, I maun ansuer, as [leist] for my silence I be haldin gyltie. [If your Grace] be rypelie rememberit, the Laird of Dun, yit leving to testifie the treuth, was present at that tyme quhairof your Grace complenis. Your Grace accuseit me, that I had irreventlie handyllit you in the pulpat; that I denyit. Ye said, What ado had I to speik of your marriage? What was I, that I sould mell with syk maiteris? I ansuerit, As tueching natour, I wes ane worm of this earth, and yet ane subject of this Commounwelth; but as tueching the office whairintill it hes plesit God to place me, I wes ane watchman, bayth over the Realme, and over the Kirk of God gatherit within the same; be reasoun whairof I wes bound in conscience to blaw the trumpet publictlie, so oft as evir I saw onie upfall, onie appeiring dainger,[950] either of the one or of the other. But sa it wes, that ane certane bruit affermed that traffick of mariage wes betwix your Grace and the Spanishe allya; quhairinto I said, that gif your Nobylattie and Estaitis did agrie, unles that bayth ye and your husband sould be so straitlie bound, that neither of you mycht hurte this Commounwealth, nor yit the pure Kirk of God within the same, that in that cais I wald pronunce, that the consentaris wer trubleris[951] of this Commounwelth, and ennemeis to God, and to his promeis plantit within the same.[952] At these wordis, I grant, your Grace stormed, and burstit furth into ane unressonable weiping. Quhat myttigatioun the Laird of Dun wald haif maid, I suppois your Grace hes not forget. But whill that nathing wes abill to stay your weiping, I wes compellit to say, I tak God to record, that I never tuik plesour to see onie creatour weip, [yea, not my children quhen my awin hands had bett thame,][953] meikle less can I rejoise to see your Grace mak sick regreat. But seing I haif offerit your Grace no such occasioun, I maun rather suffer your Grace to tack your awin plesour, or that I dar conceil the treuth, and so betray baith the Kirk of God and my Commounwelth. Thir wes the maist extreme wordis that I spak that day."

[950] In MS. G, "ony upfall or apparand danger." In MS. 1566, "apfaw."

[951] In MS. G, "wer traytors."

[952] In MS. G, "and to his truth planted within the same."

[953] These words omitted in MS 1566.

Efter that the Secretar had conferrit with the Quene, he said, "Mr. Knox, ye may returne to your hous for this nicht."

"I thank God and the Quenis Majestie," said the other. "And, Madame, I pray God to purge your hairt from Papeistrey, and to preserve you from the counsall of flatteraris; for how pleasand that thei appeir to your ear and corrupt affectioun for the tyme, experience hes tauld us in what perplexatie thay have brocht famous princes."

Ledingtoune and the Maister of Maxwell [were] that nycht the two stoupeis of hir chair.

Johne Knox being departit, the Tabill of the Lordis, and utheris that wer present, wer demandit, everie man be his vote, Gif Johne Knox had nocht offendit the Quenis Majestie. The Lordis voteit uniformelie thai coulde find no offence. The Quene wes past to hir cabinet. The flatteraris of the Courte, and Ledingtoune pryncipally, raged. The Quene wes brocht agane, and placeit in hir chyre, and thai commandit to vote oure agane: quhilk thing heichlie offendit the haill Nobylattie, and began to speik in opin audience, "What! sall the Laird of Lethingtoune haif power to controle us: or sall the presence of ane woman caus us to offend God, and to dampne ane innocent aganis oure conscience for plesour of onie creatour?" And so the haill Nobylattie absolved Johne Knox agane, and praisit God for his modestie, and for his plane and sensible ansueris. Yit befoir the end, ane thing is to be noittit, to witt, that amangis sa monie placeboes, we mene the flatteraris of Courte, thair wes nocht ane that planelie durst condampne the pure man that was accusit, this same God reuling thair tounge that sometymeis reulit the toung of Balaam,[954] when gladlie he wald haif cursit Godis pepill.

[954] In MS. 1566, "Balam."

[Sidenote: THE TANT OF THE QUENE TO MR. HENRIE SYNCLAIR.]

[Sidenote: THE CRAFT OF THE COURTE.]

This persaveit, the Quene began to upbraid Mr. Henrie Synclair, then Bischope of Ross, and said, heiring his vote to agree with the rest, "Trubill nocht the barne: I pray you trubill him nocht; for he is newlie walknit out of his sleip. Why soulde nocht the aulde fule follow the futestapis of thame that haif passit befoir him." The Bischope answerit cauldlie, "Your Grace may considder, that it is neither affectioun to the man, nor yit lufe to his proffessioun that moved me to absolve him; but the sempill treuthe, quhilk planelie appeiris in his defence, drawis me efter it, albeit that utheris wald haif condampnit him." And this being said, the Lordis and haill assisteris araise and departit. That nycht wes nether dansing nor fyddilling in the Courte; for Madame wes disappoyntit of hir purpois, quhilk wes to haif had Johne Knox in hir will be vote of hir Nobylattie.

Johne Knox, absolved be the votes of the grittest pairt of the Nobylattie from the cryme intendit aganis him, evin in the presence of the Quene, sche rageit, and the placebois of the Courte stormed: And so began new assaultis to be maid at the handis of the said Johne, to confes ane offence, and to put him in the Quenis will, and thay soulde promeis that his gryttest punischement sould be to go within the Castell of Edinburgh, and immediatlie to returne to his awin hous. He answerit, "God forbid that my confessioune soulde dampne those nobill men that of thair conscience, and with displasour of the Quene, have absolved me. And forder, I am assureit, ye will nocht in earnist desyre me to confes ane offence, onles that thairwith ye wald desyre me to ceise from preiching: for how can I exhorte utheris to peace and Cryssin quyetnes, gif I confes myself ane authour and mover of seditioun?"

[Sidenote: QUHILK BEGAN THE 25 OF DECEMBER.][955]