BOOK X

Here the King passes against John of Lorn.

[Sidenote: 1308] _John of Lorn occupies a Pass_]

Qwhen Thomas Randol, on this wis Wes takyn, as I heir devis, And send to duell in gud keping, For the speke he spak to the King; 4 The gud King, that thoucht on the scath, The dispit and felony bath, That John of Lorne had till him done, His host assemblit he than soyn, 8 And toward Lorn he tuk the way, With his men in-to gude aray. Bot Johne of Lorn of his cummyng, Lang or he com, had witteryng; 12 And men on ilk syde gaderit he, I trow twa thousand thai mycht be; And send thame for to stop the way, Quhar the King behufit to ga: 16 And that wes in ane evill place, That so strat and so narrow was, That twa men sammyn mycht nocht ryde In sum place of the hyllis syde. 20 The nethir half wes perelous; For a schoir crag, hye and hyduous, Raucht till the se, doun fra the pas. On the owthir half ane montane was 24 So cumrous and ek so stay, That it wes hard to pas that way. Crechanben hecht that montane. I trow that nocht in all Bretane, 28 Aye hyer hill may fundyn be. Thar Johne of Lorne gert his menyhe Enbuschit be abovyn the way; For, gif the gud King held that way, 32 He thoucht he suld soyn vencust be; And hym-self held hym on the se, Weill neir the pas with his galays. Bot the King, that in all assays 36 Wes fundyn wis and averte, Persavit thair subtilite, And that he neid that gat suld ga. His men departit he in twa; 40 And to the gud lorde of Douglas, Quham in all wit and worschip was, He taucht the archaris evirilkane. And this gud lord has with him tane 44 Schir Alysander Freser the wicht, And Williame Wisman, a gud knycht, And with thame gud Schir Androu Gray: Thir with thair menyhe held thar way, 48 And clam the hill delyverly. And, or thai of the tothir party Persavit thame, thai had ilkane The hicht abovyn thair fayis tane. 52

Here the King meets with John of Lorn’s Company.

[Sidenote: 1308] _The Fight for the Bridge_]

The King and his men held thar way, And quhen in-to the pas war thai Enterit, the folk off Lorne in hy Apon the King rasit ane cry, 56 And schot, and tumlit on hym stanys, Richt gret and hevy for the nanys. Bot thai scathit nocht gretly the King; For he had thar, in his leding, 60 Men that licht and delyver war, And licht arming had on thaim thar, Swa that thai stoutly clam the hill, And lettit thair fayis to fullfill 64 The mast part off thar felony. And als, apon the tothir party, Com James of Douglas and his rout, And schot apon thame with a schout, 68 And woundit thame with arrowis fast. Syne with thair swerdis, at the last, Thai ruschit emang thame hardely. For thai of Lorn, full manlely, 72 Grete and apert defens can ma. Bet quhen thai saw at thai war swa Assalyheit apon twa parteis, And saw weill that thair enymyis 76 Had all the farer off the ficht, In full gret hy thai tuk the flicht. And thai a felloun chas can ma, And slew all at thai mycht ourta. 80 And thai that mycht eschap, perfay, Richt till ane wattir held thair way, That ran doun by the hillis syde, And wes rycht styth, bath deip and wyde, 84 That men in na place mycht it pas Bot at ane brig beneth thaim was. To that brig held thai fast thair way, And till brek it can fast assay. 88 Bot thai that chassit, quhen thai thaim saw, Mak thair arest, but dreid or aw Thai ruschit apon thame hardely, And discumfit thame utrely, 92 And held the brig haill, quhill the King, With all the folk of his leding, Passit the bryg all at thair ese. Till Johne of Lorne it suld displese, 96 I trow, quhen he his men mycht se, Out of his schippis fra the se, Be slayn and chassit fra the hill, And he mycht set no help thar-till. 100 For it angeris als gretumly, To gud hertis that ar worthy, Till se thair fais fulfill thair will, As to thame-self to thole the ill. 104

[72: C _manfully_ (S), which is not a rhyme.]

[81: E _but delay_.]

Here the King besieges and wins Dunstaffnage Castle.

At sic myscheiff war thai of Lorne; For feill the lyffis thair has lorne, And othir sum thai flede away. The Kyng in hy gert ses the pray 108 Of all the land; quhar men mycht se So gret aboundans cum off fe, That it war woundir till behald. The King, that stout wes, stark and bald, 112 Till Dunstaffynch richt suddanely He past, and segit it sturdely And assalyheit, the castell to get. And in schort tyme he has thame set 116 In sic thrang, that tharin war than, That, magre tharis, he it wan, And a gud wardane thair-in set, And betaucht hym bath men and met, 120 Swa that he thair lang tym mycht be, Magre thaim all of that cuntre. Schir Alexander of Argill that saw The King distroy up, cleyn and law, 124 His land, send tretis to the King, And com his man but tarying; And he resavit him till his pes. But Johne of Lorn his son yheit wes 128 Rebell, as he wes wont to be, And fled with schippes to the see.

[113-115: E has--

_sturdely A sege set; and besyly Assaylit_, etc.]

[118: C _is wan_ (S), which is certainly wrong.]

[126: E _mar duelling_.]

[Sidenote: 1313] _William Bunnock’s Stratagem_]

Bot thai that left apon the land War to the King all obeysand; 132 And he thar homage all has tane; Syne toward Perth is passit agane, To play hym thair in-to the playn: Yheit Lowdyan wes him agayn. 136 And at Lythkow wes than a peill, Mekill and stark, and stuffit weill With Inglis men, that wes reset Till thaim that with armouris or met 140 Fra Edinburgh wald to Strevilling ga, And fra Strevilling again alsua; And till the cuntre did gret ill. Now may yhe heir, gif that yhe will, 144 Interludys and juperdys, That men assayit on mony wis, Castellis and pelis for till ta. And this Lithkow wes ane of thai; 148 And I sall tell how it wes tane. In the cuntre thar wonnyt ane That husband wes, and with his fee Oftsis hay to the peill led he. 152 Wilyhame Bunnok to nayme he hicht, *That stalward man wes in-to ficht. He saw sa hard the cuntre stad, *That he gret noy and pite had Throu fortrassis that war then Governit and led with Inglis men, 156 Thai travalit men outour mesur. He wes a stout carle and a sture, And of him-self dour and hardy, And had frendis wonnand hym by, 160 And schew till sum his prevate; That apon his covyn gat he Men that mycht ane enbuschement ma, Quhill that he with his wayn suld ga 164 Till lede thaim hay in-to the peill. Bot his wayn suld be stuffit weill: For aucht men armyt in the body Of his wayn suld syt prevaly, 168 And with hay helyt be about. And hym-self, that wes dour and stout, Suld by the wayn gang ydilly; And ane yheman, wicht and hardy, 172 Befor suld dryf the wayn, and ber Ane hachit, that war scharp to scher, Undir his belt; and quhen the yhet Wes opnyt, and thai war thar-at, 176 Quhen he herd hym cry sturdely, “Call all! Call all!” than hastyly He suld stryk with the ax in twa The hede-soyme; than in hy suld thai, 180 That war within the wayn, cum out, And mak debat, quhill at thar rout, That suld neir by enbuscht be, Cum for to manteyme the melle. 184

[*154, *156: E omits. In C and H.]

This wes in-till the harvist tyde, Quhen feldis, that war fair and wyde, Chargit with corne assoverit war; For syndri cornys that thai bair 188 Woxe rype to wyn to mannys fude; And the treis all sammyn stude Chargit with froytis on syndri wis. That sammyn tym, as I devis, 192 Thai of the peill had wonnyn hay, And with this Bunnok spokin had thai To leid thair hay, for he wes neir; And he consentit but dangeir, 196 And said that in-to the mornyng Weill soyn ane fudyr he suld bring, Farer and greter, and weill mor Than eny he broucht that yher befor: 200 And held thaim cunnand sekirly. For that nycht warnyt he prevaly Thaim that in the wayn suld ga, And bad the buschement be alsua. 204 And thai so grathly sped thaim thar, That or day thai enbuschit war Weill neir the peill, quhar thai mycht heir The cry alsoyne as ony weir, 208 And held thame swa still but stering, That nane of thame had persavyng.

[192: E and H have _In this swete tyme_.]

[Sidenote: 1313] _Linlithgow Castle is Taken_]

And this Bunnok fast can him payn Till dres his menyhe in his wayn; 212 And all a quhile befor the day, He had thaim helit with the hay; Than maid he him to yhok his fee, Till men the sone schynande mycht se. 216 And sum that war within the peill War yschit, on thair awn unseill, To wyn thair harvist neir thar-by. Than Bunnok, with the cumpany 220 That in his wayn closit he had, Went on his way but mair abaid, And callit his wayn toward the peill. And the portar, that saw hym weill 224 Cum neir the yhat, it opnyt soyn: And than Bunnok, forouten hoyn, Gert call the wayn deliverly. And quhen it wes set evinly 228 Betuix the chekys of the yhet, Swa that men mycht it spar na gat, He cryit, “Theif! Call all! Call all!” And he than leyt the gadwand fall, 232 And hewit in twa the soym in hy. Bunnok with that deliverly Raucht till the portar sic ane rout That blude and harnys bath com out. 236 And thai that war within the wayn Lap out belif, and soyn has slayn Men of the castell that war by. Than in a quhill begouth the cry: 240 And thai that neir enbuschit war Lap out, and com with swerdis bar, And tuk the castell all but payn, And thame that tharin wes has slayn. 244 And thai that war went furth beforn, Quhen thai the castell saw forlorn, Thai fled to warrand to and fra; And sum till Edinburgh can ga, 248 And till Strevilling ar othir gane, And sum in-to the way war slayn.

[230: C has _And he that wald no longer let_.]

How Earl Thomas Randolph became Man to the Good King Robert the Bruce.

Bunnok on this wis, wyth his wayn, The peill tuk, and the men has slayn; 252 Syne taucht it to the Kyng in hy, That hym rewardit worthely; And gert doun driff it to the ground; And syne our all the land can found, 256 Settand in pes all the cuntre, That till hym obeisand wald be.

And quhen a litill tym wes went, Eftir Thomas Randale he sent, 260 And with hym so weill tretit he, That he his man hecht for till be. And the king him soyn forgaf: Ande, for till hye his stat, hym gaf 264 Murref, and tharof Erll hym maid And othir syndri landis braid He gaf him in-till heritage. He knew his worthy vassalage, 268 And his gret wit and his avis, His trast hart and his leill servis. Tharfor in hym affyit he, And maid him rych of land and fee, 272 As it wes certis richt worthy. *For, and men spek of him trewly, *He was so curageous a knycht, *So wis, so worthy, and so wycht, And of so soverane gret bounte, That mekill of him may spokin be. Therfor I think of hym to reid, 276 And till schaw part of his gud deid, And till discryve yhow his fassoun With part of his condicioun. He wes of mesurabill stature, 280 And portrait weill at all mesure, With braid visage, plesand and fair, Curtas at poynt, and debonar; And of richt sekir contenyng. 284 Laute he lufit atour all thing; Falsade, tresoune, and felony, He stude agayne ay ythandly. He hyet honour and larges, 288 And ay mantemyt richtwisnes. In cumpany solacious He wes, and thar-with amorus. And gud knychtis he lufit ay. 292 For gif that I the suth sall say, He wes fullfillit of all bunte, And off all vertuis maid wes he. I will commend him heir no mar, 296 Bot yhe sall weill heir forthirmar That he, for his dedis worthy, Suld weill be prisit soveranly.

[*274-*276: In E, but omitted by Pinkerton.]

[Sidenote: 1314] _Randolph besieges Edinburgh Castle_]

Qwhen the King wes thus with him saucht, 300 And gret lordschippis had him betaucht, He wex so wis and avise, That his land first weill stablist he; And syne he sped him to the were, 304 Till help his eym and his effere. With the consent of the gud Kyng, Bot with a sympill apparalyng, Till Edinburgh he went in hy, 308 With gud men in-till cumpany, And set a sege to the castele, That than wes warnyst wondir wele With men and vittale at all richt, 312 So that it dred no mannis mycht. Bot this gud Erll nocht-for-thi The sege tuk full apertly: And presyt the folk that thar-in was 316 Swa that nocht ane the yhet durst pas. Thai may abyde thar-in and et Thair victaill, quhill thai oucht mai get: Bot I trow thai sall lettit be 320 To purchas mair in the cuntre.

[305: E _in his myster_.]

[316: C _wes_ (S).]

[319: C _mycht get_ (S).]

That tym Edward, of Ingland Kyng, Had gevin the castell in keping Till Schir Peris Lumbard a Gascoun. 324 And quhen thai of his warnysoun Saw the sege set thair stithly, Thai mystrowit hym of tratory, For that he spokin had with the King. 328 And, for that ilk mystrowing Thai tuk him and put in presoun; And off thair awne nacioun Thai maid a constabill thaim to leid, 332 Richt war and wis and wicht of deid. And he set wit and strinth and slicht To kepe the castell at his mycht.

But now of thame I will be still, 336 And spek a litill quhill I will Of the douchty lord Dowglas, At that tym in the Forest was. Quhar he full mony a juperdye, 340 And fair poyntis off chevelry, Previt, als weill be nycht as day, Till thame that in the castellis lay, Off Roxburgh and Jedworth; bot I 344 Will let fele of thame pas forby. For I can nocht rehers thame all, And thouch I couth, trow weill yhe sall, That I might nocht suffice thar-to, 348 Sa mekill suld be thair ado. Bot thai that I wat wittirly, Eftir my wit rehers sall I.

The winning of the Castle of Roxburgh by the Douglas through the Sleight of John Ledhouse.

[Sidenote: FEB. 27, 1314] _The Scots are taken for Oxen_]

This tym that the gud Erll Thomas 352 Assegit, as the lettir sais, Edinburgh, James of Douglas Set all his wit for till purchas How Roxburgh throu subtilite 356 Or ony craft, mycht wonnyn be; Till he gert Sym of the Ledows, A crafty man and a curious, Of hempyn rapis ledderis ma, 360 With treyn steppis bundin swa, That wald brek apon nakyn wis. A cruk thai maid, at thair devis, Of irn, that wes styth and square; 364 That, fra it in ane kyrnaill ware, And the leddir thar-fra stratly Strekit, it suld stand sekirly. This lord of Douglas than, alsoyn 368 As this devisit wes and done, Gaderit gud men in prevate; Thre score I trow at thai mycht be. And on the Fasteryn evyn rycht, 372 In the begynnyng of the nycht, Till the castell thai tuk the way. With blak froggis all helit thai The armouris at thai on thame had. 376 Thai com ner by thar but abaid, And send haly thair hors thame fra, And on range in ane rod can ga On handis and feit, quhen thai war neir, 380 Richt as thai ky and oxin weir, That war unbondyn left therout. It wes richt merk forouten dout: The-quhethir ane, on the wall that lay, 384 Besyde him till his feir can say, “This man thinkis to mak gude chere,” (And nemmyt ane husband thar-by neir) “That has left all his oxyne out.” 388 The tothir said, ‘It is na dout ‘He sall mak merye this nycht, thouch thai ‘Be with the Douglas led away.’ Thai wende the Douglas and his men 392 Had beyn oxyne, for thai yheid then On handis and feit, ay ane and ane. The Dowglas rycht gud tent has tane Till all thar speke, bot als-soyn thai 396 Held carpand inward on thar way.

[359: C has _That wes a man rycht craftyus_. Text from E and H (S).]

The Douglas men thar-of wes blith. And till the wall thai sped thame swith, And soyn has up thair ledderis set, 400 That maid a clap, quhen the cleket Wes festnyt fast in the kyrnell. That herd ane of the wachis wele, And buskit thiddirward but baid; 404 Bot Ledous, that the leddyr maid, Sped hym to clym first to the wall: Bot, or he wes up gottin all, He at that ward had in keping, 408 Met him rycht at the up-cummyng; And for he thoucht to dyng hym doune, He maid na noyis na cry na sowne, Bot schot till him deliverly. 412 And he that wes in juperdy Till de, a lans till him he maid, And gat him be the nek but baid, And stekit him upward with ane knyff, 416 Quhill in his hand he left the liff. And quhen he ded sa saw him ly, Upon the wall he went in hy, And doune the body kest thame till, 420 And said, “All gangis as we will. “Speid yhow upward deliverly.” And thai did swa in full gret hy. Bot, or thai wan up, thar com ane, 424 And saw Ledows stand him allane, And knew he wes nocht of thar men. In hy he ruschit till hym then, And hym assalyheit sturdely; 428 Bot he hym slew deliverly, For he wes armyt and wes wycht, The tothir nakyt wes, I hicht, And had nocht for till stynt no strak. 432 Sic melle tharup can he mak, Quhill Douglas, and his menyhe all War wonnyn up apon the wall.

[Sidenote: FEB. 27, 1314] _Douglas holds the Hall_]

Than in the tour thai went in hy. 436 The folk that tym wes halely In-to the hall at thair dansyng, Synging, and othir wayis playing: As apon Fastryn evyn is 440 The custom to mak joy and blis, To folk that ar in-to savite; Swa trowit thai that tym to be. Bot, or thai wist, rycht in the hall 444 Douglas and his men cummyn war all. And cryit on hicht, “Douglas! Douglas!” And thai, that ma war than he was, Herd “Dowglas!” cryit richt hidwisly, 448 Thai war abasit for the cry, And schupe richt na defens to ma. And thai but pite can thame sla, Till thai had gottyn the ovir hand. 452 The tothir fled to seyk warrand, That out-our mesure dede can dreid. The wardane saw how that it yheid, That callit wes Gylmyne de Fenis, 456 In the gret toure he gotten is, And othir of his cumpany, And sparit the entre hastily. The layff, that levit war without, 460 War tane or slane, forouten dout, Bot giff that ony lap the wall. The Douglas held that nycht the hall, All-thouch his fais thar-of wes wa. 464 His men war gangand to and fra Throu-out the castell all that nycht, Till on the morn that day wes lycht. The wardane that wes in the tour, 468 That wes a man of gret valour, Gylmyne the Fynis, quhen he saw The castell tynt, bath hye and law, He set his mycht for till defende 472 The tour; but thai without him send Arrowes in so gret quantite, That anoyit tharof wes he. Bot to the tothir day nocht-for-thi 476 He held the tour full sturdely, And than at ane assalt he was Woundit so felly in the face, That he wes dredand of his lif: 480 Tharfor he tretit thame belif, And yhald the tour on sic maner, That he and all that with hym weir Suld saufly pas in-to Ingland. 484 Douglas held thame gud cunnand, And convoyit thame to thair cuntre. Bot thar full schort tym liffit he; For throu the wound in-till the face 488 He deit soyn, and beryit was. Douglas the castell sesit all, At than wes closit with stalward wall, And send this Leydous till the Kyng, 492 That maid hym full gret rewarding. And his brothir in full gret hy, Schir Edward, that wes sa douchty, He send thiddir to tummyll it doune 496 Bath tour, castell, and dungeoune. And he com with gret cumpany, And gert travale so besaly, That tour and wall rycht to the ground 500 War tumlyt in ane litill stound: And duelt still thar, quhill Tevydaie Com to the Kyngis pes all haill, Outane Jedworth and othir that neir, 504 The Inglis mennis bowndis weir.

[471: E has _be clene_; _cf._ line 124.]

Here Sir Thomas Randolph besieges Edinburgh.

Qwhen Roxborgh won wes on this wis, The Erll Thomas, that hye enpris Set ay apon soverane bounte, 508 At Edinburgh with his menyhe Was lyand at the sege, as I Tald yhow befor all oppynly. Bot fra he herd how Roxburgh was 512 Tane with a trane, all his purchas, With wit and besynes, I hicht, He set to purches him sum slicht, How he mycht help hym throu body 516 Mellit with full hye chevelry, To wyn the wall of the castell Throu sumkyn slicht; for he wist weill That no strinth mycht it planly get, 520 Quhill thai within had men and met. Tharfor prevely sperit he Gif ony man mycht fundin be, That couth ony gude jupardye 524 To clym the wallis prevelye; And he suld haf his warisoune. For it wes his entencioune Till put him in-to aventure, 528 Or at that sege on him forfure.

[516: C has _throu vietory_, from which S adopts _voidry_ = “cunning” as “a shrewd guess.” Text from E.]

[Sidenote: MARCH, 1314] _William Francis offers to Guide_]

Than wes thair ane William Francas, Wicht and apert, wis and curtas, That in-till his yhouthede had beyn 532 In the castell; quhen he has seyn The Erll sa ynkirly hym set Sum sutelte or wile to get, Quhar-throu the castell haf mycht he, 536 He com till hym in prevate, And said; “Me think yhe wald blithly “That men fand yhow sum juperdy, “How yhe mycht our the wallis wyn: 540 “And certis gif yhe will begyn “For till assay on sic a wis, “I undirtak, for my service, “For to ken yhow to clym the wall, 544 “And I sall formast be off all; “Quhar with a schort leddir may we, “I trow of tuelf fut it may be, “Clym to the wall up all quytly. 548 “And gif that yhe will wit how I “Wat this, I sall yhow lichtly say. “Quhen I wes yhoung this hendir day, “My fader wes kepar of yhon hous, 552 “And I wes sumdele volageous, “And lufit ane wench her in the toune; “And for I, but suspicioun, “Micht repair till hir prevely, 556 “Of rapis ane leddir to me maid I, “And tharwith our the wall I slaid. “Ane strat rod, that I spyit had “In-till the crag, syne doune I went; 560 “And oftsis com to myne entent; “And quhen it neir drew to the day, “I held agane that ilke way, “And ay com in but persaving. 564 “I oysit lang that travailing, “So that I can that rod ga richt, “Thouch men se nevir so myrk the nycht. “And gif yhow thinkis yhe will assay 568 “To pass up eftir me that way, “Up to the wall I sall yhow bring, “Gif God us kepis fra persaving “Of thame that wachis on the wall. 572 “And gif that us so fair may fall, “That we our leddir up may set, “Giff a man on the wall may get, “He sall defend, gif it beis neid, 576 “Quhill the remanand up thaim speid.” The Erll wes blith of his carping, And hicht him full fair rewardyng; And undirtuk that gat to ga, 580 And bad him soyn his leddir ma, And hald him preve quhill thai mycht Set for thair purpos on ane nycht.

[529: E H _mysfure_.]

[531: In C _pert_, E _curyus_ (S).]

[568: E _yhe think_.]

The winning of the Castle of Edinburgh by Good Earl Thomas Randolph.

[Sidenote: MARCH 14, 1314] _A Dangerous Climb_]

Soyne eftir wes the leddir maid; 584 And than the Erll, but mair abaid, Purvait hym on a nycht prevaly, With thritty men, wicht and hardy; And in ane myrk nycht held thar way. 588 Thai put thame in full hard assay, And to gret perell sekyrly. I trow, mycht thai haf seyne cleirly, That gat had nocht beyn undirtane, 592 Thouch thai to let thame had nocht ane. For the crag wes hye and hidwous, And the clymbyng rycht perelus: For hapnyt ony to slyde or fall, 596 He suld be soyne to-fruschit all. The nycht wes myrk, as I herd say, And till the fut soyn cummyn ar thai Of the crag, that wes hye and schore, 600 Than Williame Francous thame befor Clam in the crykis forouth thaim ay, And at the bak him followit thai, With mekill payne, quhill to, quhill fra; 604 Thai clam in-to the crykis swa, Quhill half the craggis thai clummyn had, And thair ane place thai fand so braid, That thai mycht syt on anerly. 608 And thai war ayndles and wery, And thair abaid thair aynd to ta. And richt as thai war syttand swa, Abovyn thame, apon the wall, 612 The chak-wachis assemblit all. Now help thame God that all thing may! For in full gret perell ar thai. For, mycht thai se thame, thair suld nane 616 Eschap out of that place unslane; Till ded with stanys thai suld thaim dyng, That thai mycht help thame-self no thing.

Bot wondir myrk wes all the nycht, 620 Swa that thai had of thame na sycht. And nocht-for-thi yheit wes thar ane Of thame that swappit doun a stane, And said, “Away! I se yhow weill.” 624 The-quhethir he saw thame nocht a deill. Out-our thair hedis flaw the stane, And thai sat still, lurkande ilkane. The wachis, quhen thai herd nocht stere, 628 Fra that ward passit all sammyn were, And carpand held fer by thair way. Erll Thomas than alsoyne, and thai That on the crag thar satt hym by, 632 Toward the wall clam hastely, And thiddir com with mekill mayne, And nocht but gret perell and payne. For fra-thine up wes grevousar 636 To clym up, na be-neth be fer. Bot quhatkyn payn at evir thai had, Richt to the wall thai com but baid, That had weill neir tuelf fut on hicht. 640 And, for-owt persaving or sicht, Thai set their ledder to the wall, And syne Francous, befor thame all, Clam up, and syne Schir Androu Gray, 644 And syne the Erll him-self, perfay, Wes the thrid man the wall can ta. Quhen thai thair doun thair lord swa Saw clymen up apon the wall, 648 As wood men thai clame eftir all.

Bot or up cummyn all wer thai, Thai that war wachis till assay Herd bath stering and ek speking, 652 And alswa fraying of armyng, And on thame schot full sturdely: And thai met thame richt hardely; And slaw off thame dispitwisly. 656 Than throu the castell ras the cry, “Tresoune! Tresoune!” thai cryit fast. Than sum of tham war sa agast, That thai fled and lap our the wall. 660 Bot to say suth, thai fled nocht all; For the constabill, that wes hardy, All armyt schot furth to the cry, And with him feill hardy and stout. 664 Yheit wes the Erll with his rout, Fechtand with thame apon the wall; Bot soyn he thame discomfit all. Be that his men war cummyn ilkane 668 Up at the wall, and he has tane His way doune to the castell soyne. In gret perell he has hym done; For thair wes fer ma men tharin, 672 And thai had beyn of gude covyn, Than he; bot thai effrayit war. And nocht-for-thi with wapnys bar, The constabill and his cumpany 676 Met hym and his richt hardely,

[650: E _clumbene_.]

[Sidenote: MARCH 14, 1314] _The Fight for the Castle_]

Thar men micht se gret bargane rys, For with wapnys, on mony wis, Thai dang on othir at thar mycht, 680 Quhill swerdis, that war fayr and brycht, War till the hyltis all bludy. Then hidwisly begouth the cry; For thai that fellit or stekit war 684 With gret noyis can cry and rar. The gud Erll and his cumpany Faucht in that ficht so sturdely, That all thair fayis ruschit war. 688 The constabill wes slayn richt thar: And fra he fell, the remanand Fled quhar thai best mycht to warrand: Thai durst nocht byde na mak debat. 692 The Erll wes handlyt thair sa hat, That had it nocht hapnyt throw cas, That the constabill thair slayn was, He had beyn in gret perell thar; 696 Bot than thai fled, thar was no mar, Ilke man for to sauf his lif, And furth his dayis for to drif; And sum slaid doune out our the wall. 700 The Erll has tane the castell all, For than wes nane durst him withstand. I hard nevir quhar in ane land, Wes castell tane so hardely, 704 Outakyn Tyre all anerly, Quhen Alexander the Conquerour, That conquerit Babilonys tour, Lap fra a berfrois on the wall; 708 Quhar he emang his fayis al Defendit him full douchtely, Quhill that his noble chevelry With ledderis our the wallis yheid, 712 That nouthir left for ded no dreid; For fra thai wist weill at the king Wes in the toune, ther wes no thing In-till that tyme that stint thame mocht, 716 For all perell thai set at nocht. Thai clam the wallis, quhar Arestee Com first to the gude king, quhar he Defendit him with all his mycht, 720 That than wes set so hard, I hicht, That he wes fellit on a kne: He till his bak had set ane tre, For dreid thai suld behynd assalyhe. 724 Arestee then to the battalyhe Sped him in all hye sturdely, And dang on thame so douchtely, That the king weill reskewit was. 728 For his men, in-to syndry plas, Clam our the wall and soucht the kyng, And him reskewit with hard fichting; And wan the toune deliverly. 732 Outakyn this takyng all anerly, I herd nevir in na tyme gane Quhar castell wes sa stoutly tane.

[Sidenote: 1314] _The Prophecy of Queen Margaret_]

And of this takyng that I meyne, 736 Sanct Mergaret, the gud haly queyne, Wist in hir tyme, throw reveling Of him that knawis and wat all thing. Tharfor, in stede of prophesye, 740 Scho left ane takyne richt joly, That is that scho in hir chapell Gert weill be portrait ane castell, A leddir up to the wall standand 744 And a man thar-on clymande, And wrat owth him, as old men sayis, In Franch, _Gardis vous de Francois_. And for this word scho gert writ swa, 748 Men wend the Franch-men suld it ta. Bot for Francois hattyn wes he, That swa clam up in prevate, Scho wrat that as in prophesy: 752 And it fell eftirward suthly Richt as scho said; for tane it was, And _Francois_ led thame up that place.

[742: E _That is yheit in-till_; but _cf._ line 746.]

On this wis Edinburgh wes tane; 756 And thai that war tharin ilkane War tane, or slane, or lap the wall; Thair gudis haff thai sessit all, And soucht the housis evirilkane. 760 Schir Peris Lumbard that wes tane, As I said ere befor, thai fand In presoune, fetterit with boyis, sittand. Thai broucht hym to the Erll in hy, 764 And he gert lows hym hastely; Than he becom the Kingis man. Thai send word to the King rycht than, And tald how the castell wes tane; 768 And he in hy is thiddir gane, With mony men in cumpany, And gert myne doune all halely Bath tour and wall richt to the ground: 772 And syne our all the land can found, Sesand the cuntre till his pes. Of this deid, that so worthy wes, The Erll wes prisit gretumly. 776 The King, that saw him sa worthy, Wes blith and joyfull our the laif, And to manteym his stat, him gaff Rentis and landis fair eneuch. 780 And he to sa gret worschip dreuch, That all spak of his gret bounte. His fayis gretly stonayit he, For he fled nevir throu fors of ficht. 784 Quhat sall I mair say of his mycht? His gret manheid, and his bountee Gerris him yheit oft renownyt be.

How Sir Edward won Ru’glen peel And Dundee, then Stirling, besieged well.

In this tyme that thir juperdyis 788 On thir castellis, that I devis, War eschevit swa hardely, Schir Edward the Brois, the worthy, Had all Galloway and Nyddis-daill 792 Wonnyn till his liking all haill; And doungyn doune the castellis all Richt in the dik, bath tour and wall. He herd than say, and knew it weill, 796 That in Ruglyne wes ane peill. Thiddir he went with his menyhe, And wonnyn it in schort tym has he. Syne till Dunde he tuk the way, 800 That than wes haldin, as I herd say, Agane the King; tharfor in hy He set ane sege thar-to stoutly, And lay thar quhill it yholdyn was. 804 Till Strevilling syne the way he tais, Quhar gud Schir Philip the Mowbra, That wes full douchty at assay, Wes wardane, and had in keping 808 That castell of the Inglis Kyng. Thar-till ane sege he set stythly; Thai bykkirrit oftsis sturdely; Bot gret chevelry done wes nane. 812 Schir Edward, fra the sege wes tane, A weill lang tyme about it lay, Fra the Lenteryne, that is to say, Quhill forrouth the Saint Johnnis mes. 816 The Inglis folk, that tha-rin wes, Begouth to fale the vittale than. Than Schir Philip, the douchty man, Tretit, quhill thai consentit weir, 820 That gif at Mydsummer tyme ane yheir To cum, it war nocht with bataill Reskewit, that than, withouten faill, He suld the castell yheld quytly. 824 That cunnand band thai sekirly.