Part 5

_Davyd Rex._

I am David, of Jesse rote, The fresche kyng by naturalle successyon, And of my blood xal sprynge oure bote, As God hymself hath mad promyssyon; Of regalle lyff xal come suche foyson, That a clene mayde modyr xal be, Ageyns the devellys fals illusyon, With regalle power to make man fre.

_Jeremias propheta._

I am the prophete Jeremye, And fulliche acorde in alle sentence With kyng David and with Ysaie, Affermynge pleynly beforn this audyens, That God of his highe benyvolens, Of prest and kynge wylle take lynage, And bye us alle ffrom oure offens, In hevyn to have his herytage.

_Salamon Rex._

I am Salamon the secunde kynge, And that wurthy temple for sothe made I, Whiche that is fygure of that mayde ȝynge, That xal be modyr of grett Messy.

_Ezechiel propheta._

A vysion of this, fful veryly, I Eȝechiel have had also, Of a gate that sperd was trewly, And no man but a prince myght therin go.

_Roboas Rex._

The iij.ᵈᵉ kynge of the jentylle Jesse, My name is knowe, kyng Roboas, Of oure kynrede ȝitt men xul se A clene mayde trede downe foule Sathanas.

_Micheas propheta._

And I am a prophete calde Mycheas, I telle ȝou pleynly that thus it is, Evyn lyke as Eve modyr of wo was, So xal a maydyn be modyr off blyss.

_Abias Rex._

I, that am calde kynge Abias, Conferme for trewe that ȝe han seyd; And sey also as in this cas, That alle oure myrthe comyth of a mayd.

_Danyel propheta._

I prophete Danyel am welle apayed, In fygure of this I saw a tre; Alle the fendys of helle xalle ben affrayd, Whan maydenys ffrute theron thei se.

_Asa Rex._

I, kynge Asa, beleve alle this, That God wylle of a maydyn be borne, And, us to bryngyn to endles blys, Ruly on rode be rent and torn.

_Jonas propheta._

I, Jonas, sey that on the iij.ᵈᵉ morn ffro dethe he xal ryse, this is a trewe talle, Fyguryd in me, the whiche longe beforn Lay iij. days beryed within the qwalle.

_Josophat rex._

And I, Josophat, the vj.ᵗᵉ kynge serteyne, Of Jesse rote in the lenyalle successyon, Alle that my progenitouris hath befor me seyn, ffeythfully beleve withowtyn alle dubytacion.

_Abdias propheta._

I, Abdias prophete, make this protestacion, That aftyr he is resyn to lyve onys aȝen, Dethe xal be drevyn to endles dampnacion, And lyff xal be grawntyd of paradys ful pleyn.

_Joras Rex._

And I, Joras, also in the numbre of sefne, Of Jesse rote kynge, knowlyche that he Aftyr his resurreccion returne xal to hefne, Bothe God and verry man ther endles to be.

_Abacuche propheta._

I, Abacuche prophete, holde wele with the, Whan he is resyn he xal up stye, In hevyn as juge sitt in his se, Us for to deme whan we xal dye.

_Ozias Rex._

And I, Ozyas, kynge of hygh degré, Spronge of Jesse rote, dare welle sey this, Whan he is gon to his dygnyté, He xal send the sprytt to his discyplis.

_Joelle propheta._

And I, Joel, knowe fulle trewe that is, God bad me wryte in prophesye, He wolde sende downe his sprytt i-wys, On ȝonge and olde ful sekyrlye.

_Joathas rex._

My name is knowe, kyng Joathan, The ix.ᵉ kynge spronge of Jesse, Of my kynrede God wol be man, Mankend to save, and that joyth me.

_Aggeus propheta._

With ȝow I do holde that am prophete Aggee, Com of the same hygh and holy stok, God of oure kynrede in dede born wyl be, ffrom the wulf to save al shepe of his flok.

_Achas rex._

Off Jesse kyng Achas is my name, That falsly wurchepyd ydolatrye, Tyl Ysaie putt me in blame, And seyd a mayd xulde bere Messye.

_Ozyas propheta._

Off that byrthe wyttnes bere I, A prophete Osyas men me calle, And aftyr that tale of Isaye, That mayd xal bere Emanuelle.

_Ezechias rex._

My name is knowyn, kyng Eȝechias, The xj.ᵗᵉ kyng of this geneologye, And say fforsothe, as in this cas, A mayde be mekenes xal brynge mercye.

_Sophosas propheta._

I a prophete callyd Sophonye, Of this matyr do bere wyttnes, And for trowth to sertyfie, That maydens byrthe oure welthe xal dresse.

_Manasses rex._

Of this nobylle and wurthy generacion, The xij. kyng am I Manasses, Wyttnessynge here, be trew testyficacion, That maydenys childe xal be prince of pes.

_Baruk propheta._

And I, Baruk prophete, conferme wurdys thes, Lord and prince of pes, thow that chylde be, Al his fomen ageyn hym that pres, Ryght a grym syre at domysday xal he be.

_Amon rex._

Amon kynge, ffor the last conclusyon, Al thynge beforn seyd ffor trowthe do testyfie, Praynge that lord of oure synne remyssyon, At that dredful day he us graunt mercye.

Thus we alle of this genealogye, Accordynge in on here in this place, Pray that heyȝ lorde whan that we xal dye, Of his gret goodnesse to grawnt us his grace!

_Explicit Jesse._

VIII. THE BARRENNESS OF ANNA.

_Contemplacio._ Cryst conserve this congregacion Fro perellys past, present, and future, And the personys here pleand, that the pronunciacion Of here sentens to be seyd mote be sad and sure. And that non oblocucyon make this matere obscure, But it may profite and plese eche persone present, ffrom the gynnynge to the endynge so to endure, That Cryst and every creature with the conceyte be content.

This matere here mad is of the modyr of mercy, How be Joachym and Anne was here concepcion, Sythe offred into the temple, compiled breffly, Than maryed to Joseph, and so folwyng the salutacion. Metyng with Elyzabeth and therwith a conclusyon, In fewe wurdys talkyd, that it xulde nat be tedyous, To lernyd nyn to lewd nyn to no man of reson, This is the processe, now preserve ȝow Jhesus!

Thereffore of pes I ȝow pray alle that ben here present, And take hed to oure talkyn what we xal say, I be-teche ȝow that lorde that is evyr omnypotent, To governe ȝow in goodnes, as he best may, In hevyn we may hym se. Now God that is hevyn kynge, Sende us alle hese dere blyssynge, And to his towre he mote us brynge. Amen, ffor charyté!

_Ysakar._ The prestys of God offre sote ensens Unto here God, and therfore they be holy; We that mynistere here in Goddys presens, In us xuld be fownd no maner of ffoly. Ysakar, prynce of prestys, am I, That this holyest day here have mynystracion, Certyfyenge alle tribus in my cure specyaly, That this is the hyest fest of oure solennyȝacion.

This we clepe _festum Encenniorum_, The new ffest of whiche iij. in the ȝere we exercyse; Now alle the kynredys to Jerusalem must cum, Into the temple of God here to do sacryfyse; Tho that be cursyd my dygnyté is to dysspyse, And tho that be blyssyd here holy sacrefyse to take; We be regal sacerdocium, it perteyneth us to be wysse, Be fastyng, be prayng, be almes, and at du tyme to wake.

_Joachym._ Now alle this countré of Galylé, With this cetye of Nazareth specyal, This ffest to Jerusalem must go we, To make sacrefyce to God eternal. My name is Joachym, a man in godys substancyalle, Joachym is to say, he that to God is redy, So have I be and evyr more xal, ffor the dredful domys of God sore drede I.

I am clepyd ryghtful, why wole ȝe se? ffor my godys into thre partys I devyde, On to the temple and to hem that ther servyng be, Anodyr to the pylgrimys and pore men; the iij.ᵈᵉ ffor hem with me abyde. So xulde every curat in this werde wyde, ȝeve a part to his chauncel i-wys, A part to his parochoneres that to povert slyde, The thryd part to kepe for hym and his. But, blyssyd wyff Anne, sore I drede In the temple this tyme to make sacryfice; Becawse that no frute of us dothe procede, I fere me grettly the prest wole me dysspice. Than grett slawndyr in the tribus of us xulde aryse: But this I avow to God, with alle the mekenes I can, ȝyff of his mercy he wole a childe us devyse, We xal offre it up into the temple to be Goddys man.

_Anna._ ȝour swemful wurdys make terys trekyl downe be my face, I-wys, swete husband, the fawte is in me; My name is Anne, that is to sey, grace, We wete not how gracyous God wyl to us be. A woman xulde bere Cryst, these profecyes have we, If God send frute and it be a mayd childe; Withe alle reverens I vow to his magesté, Sche xal be here foot-mayd to mynyster here most mylde.

_Joachym._ Now lete be it as God wole, ther is no more, Tweyn turtelys ffor my sacryfice with me I take; And I beseche, wyff, and evyr we mete more, That hese grett mercy us meryer mut make. _Anna._ For dred and ffor swem of ȝour wourdys I qwake, Thryes I kysse ȝow with syghys ful sad; And to the mercy of God mekely I ȝow betake, And tho that departe in sorwe, God make ther metyng glad!

_Senior tribus._ Worchepful sere Joachym, be ȝe redy now? Alle ȝour kynrede is come ȝow to exorte, That thei may do sacrifice at the temple with ȝow, ffor ȝe be of grett wurchep, as men ȝow report. _Joachym._ Alle synfulle, seke, and sory, God mote comforte, I wolde I were as men me name! Thedyr in Goddys name now late us alle resorte: A Anne, Anne, Anne, God scheeld us fro shame!

_Anne._ Now am I left alone, sore may I wepe, A, husbond! ageyn God wel mote ȝow brynge! And fro shame and sorwe he mote ȝow kepe, Tyl I se ȝow ageyn I kan not sees of wepynge. _Senior._ Prynce of oure prestys, if it be ȝour plesynge, We be com mekely to make our sacrefice. _Ysakar._ God do ȝow mede, bothe elde and ȝynge, Than devowtly we wyl begynne servyse.

_There they xal synge this sequens, “Benedicta sit beata Trinitas.” And in that tyme Ysakar with his ministeres ensensythe the autere, and than thei make her offryng, and Isaker seyth_,

Comyth up, serys, and offeryth alle now, ȝe that to do sacryfice worthy are: Abyde a qwyle, sere, whedyr wytte thou? Thou and thi wyff arn barrany and bare; Neyther of ȝow ffruteful nevyr ȝett ware, Whow durste thou amonge fruteful presume and abuse? It is a tokyn thou art cursyd thare, Wherefore with grett indygnacion thin offeryng I refuse!

_Et refudit sacrificium Joachi._

Amonge alle this pepyl barreyn be no mo, Therefore comyth up and offeryth here alle: Thou, Joachym, I charge the fast out the temple thou go; Than with Goddys holy wourde blysse ȝow I shalle!

_Et redit flendo._

_Ministro catando._ Adjutorium nostrum in nomine Domini! _Johns._ Qui fecit cœlum et terram! _Minister._ Sit nomen Domini benedictum! _Chorus._ Ex hoc nunc et usque in sæculum! _Episcopus._ Benedicat vos divina majestas et una deitas, Pater, et Filius, et Spiritus Sanctus! _Chorus._ Amen.

_Signando manu cum cruce solenniter, et recedant tribus extra templum._

Now of God and man blyssyd be ȝe alle, Homward aȝen now returne ȝe, And in this temple abyde we xalle, To servyn God in Trinyté.

_Joachym._ A! mercyfful Lord, what is this lyff? What have I do, Lorde, to have this blame? ffor hevynes I dare not go hom to my wyff, And amonge my neybores I dare not abyde ffor shame. A Anne! Anne! Anne! al oure joye is turnyd to grame, ffrom ȝour blyssyd ffelacheppe I am now exilyd, And ȝe here onys of this ffowle fame, Sorwe wyl sle ȝow to se me thus revylyd.

But son God soferyth thys us must sofron nede, Now wyl I go to my shepherdys and with hem abyde, And ther evyrmore levyn in sorwe and in drede, Shame makyth many man his hed for to hyde. Ha! how de ȝe, felas? in ȝow is lytel pryde, How fare ȝe and my bestys? this wete wolde I veryly. _Primus pastor._ A! welcome hedyr! blyssyd mayster, we pasture hem ful wyde, They be lusty and fayr and grettly multyply. How do ȝe, mayster? ȝe loke al hevyly! How dothe oure dame at hom? sytt she and sowyht? _Joachym._ To here the speke of here it sleyth myn hert veryly, How I and sche doth, God hymself knowythe! The meke God lyftyth up, the proude over-throwyht, Go do what ȝe lyst; se ȝour bestys not stray. _Secundus pastor._ Aftere grett sorwe, mayster, evyr gret grace growyht; Sympyl as we kan, we xal for ȝow pray. _Tertius Pastor._ ȝa, to pray ffor careful it is grett nede, We alle wul prey ffor ȝow knelende, God of his goodnes send ȝow good spede, And of ȝour sorwe ȝow sone amende!

_Joachym._ I am nott wurthy, Lord, to loke up to hefne! My synful steppys anvempnyd the grounde; I loth folest that levyth thou, Lord, hyest in thi setys sefne, What art thou, Lord? what am I wrecche werse than an hownde? Thou hast sent me shame whiche myn hert doth wounde; I thank the more herefore than for alle my prosperité: This is a tokyn thou lovest me,—now to the I am bounde; Thou seyst thou art with hem that in tribulacion be.

And ho so have the, he nedyth not care thanne; My sorwe is feryng I have do sum offens; Punchyth me, Lorde, and spare my blyssyd wyff Anne, That syttyth and sorwyth ful sore of myn absens! Ther is not may profyte but prayour to ȝour presens; With prayores prostrat byfore thi person I wepe; Have mende on oure avow, for ȝour meche magnyficens, And my lovyngest wyff Anne, Lord, for thi mercy kepe!

_Anna._ A! mercy, Lord! mercy! mercy! mercy! We are synfolest; it shewyth that ȝe send us alle this sorwe: Why do ȝe thus to myn husbond, Lord? why, why, why? For my barynes he may amend this thiself and thou lyst to morwe, And it plese so thi mercy, the, my Lord, I take to borwe, I xal kepe myn avow qwyl I leve and leste, I fere me I have offendyd the; myn hert is ful of sorwe: Most mekely I pray thi pety, that this bale thou wyl breste.

_Here the aungel descendith the hefne syngyng_,

“_Exultet cœlum laudibus!_ _Resultet terra gaudiis!_ _Archangelorum gloria_ _Sacra canunt solemnia._”

_Joachym._ Qwhat art thou, in Goddys name, that makyst me adrad? It is as lyth abowt me as al the werd were fere.

_Angelus._ I am an aungel of God come to make the glad! God is plesyd with thin helmes, and hath herd thi prayere; He seyth thi shame, thi repreff, and thi terys cler: God is a vengere of synne, and not nature doth lothe! Whos wombe that he sparyth and makyth barreyn her, He doth to shewe his myth and his mercy bothe!

Thu seest that Sara was nynty ȝer bareyn, Sche had a sun Ysaac, to whom God ȝaff his blyssynge; Rachel also had the same peyn, She had a son Joseph, that of Egypt was kynge. A strongere than Sampson nevyr was be wrytynge, Nor an holyere than Samuel, it is seyd thus; ȝett here moderes were bareyn bothe in the gynnynge; The concepcion of alle swyche, it is ful mervelyous.

And in the lyke wyse Anne, that blyssyd wyff, Sche xal bere a childe xal hygthe Mary, Whiche xal be blyssyd in here body and have joys ffyff, And fful of the Holy Goost inspyred syngulyrly. Sche xal be offryd into the temple solemply, That of here non evyl ffame xuld sprynge thus, And as sche xal be bore of a barrany body, So of here xal be bore without nature Jhesus,

That xal be savyour unto al mankende! In tokyn, whan thou come to Jherusalem, to the gyldyn gate, Thou xalt mete Anne thi wyff, have this in thi mende; I xal sey here the same here sorwys to rebate. _Joachym._ Of this incomparabyl comfort I xal nevyr forgete the date, My sorwe was nevyr so grett, but now my joy is more; I xal hom in hast, be it nevyr so late. A, Anne! blyssyd be that body of the xal be bore! Now farewel, myn shepherdys, governe ȝow now wysly.

_Primus pastor._ Have ȝe good tydynges, mayster? than we be glad! _Joachym._ Prayse God for me, for I am not wourthy! _Secundus pastor._ In feyth, sere, so we xal with alle oure sowlys sad. _Tertius pastor._ I holde it helpfful that on of us with ȝow be had. _Joachym._ Nay, abyde with ȝour bests, sone, in Goddys blyssynge. _Primus pastor._ We xal make us so mery now this is be-stad, That a myle on ȝour wey ȝe xal here us synge.

_Anne._ Alas! ffor myn husbond me is ful wo, I xal go seke hym what so evyr be-falle; I wote not in erth whiche wey is he go, ffadyr of hefne, ffor mercy to your ffete I falle. _Angelus._ Anne, thin husbond ryght now I was with-alle, The aungel of God, that bare hym good tydynge, And as I seyd to hym so to the sey I xal, God hath herd thi preyour and thi wepynge.

At the goldyn gate thou xalte mete hym ful mylde, And in grett gladnes returne to ȝour hous; So be proces thou xalt conseyve and bere a childe, Whiche xalt hyght Mary, and Mary xal bere Jhesus, Whiche xal be Savyour of alle the werd and us,— Aftere grett sorwe evyr grett gladnes is had! Now myn inbasset I have seyd to ȝow thus, Gooth in oure Lordys name, and in God beth glad!

_Anne._ Now blyssyd be oure Lorde and alle his werkys ay! Alle heffne and erthe mut blysse ȝow for this! I am so joyful I not what I may say! Ther can no tounge telle what joye in me is! I to bere a childe that xal bere alle mannys blyss, And have myn hosbonde ageyn; ho mythe have joys more? No creature in erthe is grauntyd more mercy i-wys! I xal hyȝe me to the ȝate to be ther before.

_Here goth the aungel aȝen to hefne._

A! blyssyd be our Lord! myn husbond I se. I xalle on myn knes and to hym-ward crepe. _Joachym._ A! gracyous wyff Anne, now frutefull xal he be! ffor joy of this metyng in my sowle I wepe; Have this kusse of clennesse and with ȝow it kepe, In Goddys name now go we, wyff, hom to our hous. _Anne._ Ther was nevyr joy sank in me so depe, Now may we say, husbond, God is to us gracyous, Verily. _Joachym._ ȝa, and if we have levyd wel here before, I pray the, Lord, thin ore, So mote we levyn evyr more, And be thi grace more holyly.

_Anne._ Now hom-ward, husbond, I rede we gon, Ryth hom al to our place, To thank God that sytt in trone, That thus hath sent us his grace.

IX. MARY IN THE TEMPLE.

_Contemplacio._ Sovereynes, ȝe han sen shewyd ȝow before, Of Joachym and Anne here botheres holy metynge, How our lady was conseyvid, and how she was bore; We passe ovyr that, breffnes of tyme consyderynge. And how our lady, in here tendyr age and ȝyng, Into the temple was offryd, and so forthe proced, This sentens sayd xal be hire begynnyng, Now the Modyr of mercy in this be our sped!

And as a childe of iij. ȝere age here she xal appere, To alle pepyl that ben here present, And of here grett grace now xal ȝe here, How she levyd evyr to Goddys entent With grace. That holy matere we wole declare, Tyl ffortene ȝere how sche dyd ffare; Now of ȝour speche I pray ȝow spare, Alle that ben in this place.

_Here Joachym and Anne, with oure lady betwen hem, beyng al in whyte as a childe of iij. ȝere age, presente here into the temple, thus seyng Joachym_,

_Joachym._ Blyssyd be oure Lord, ffayr ffrute have we now! Anne, wyff, remembyr wole ȝe, That we made to God an holy avow, That oure fyrst childe the servaunt of God xulde be! The age of Mary oure dowtere is ȝeres thre, Therfore to thre personys and on God lete us here present; The ȝonger she be drawyn the bettyr semyth me, And for teryeng of our avow of God we myth be shent! _Anne._ It is as ȝe say, husbond, indede, Late us take Mary our dowter us betwen, And to the temple with here procede: Dowtere, the aungel tolde us ȝe xulde be a qwen! Wole ȝe go se that lord ȝour husbond xal ben, And lerne for to love hym and lede with hym ȝour lyf? Telle ȝour ffadyr and me her, ȝour answere let sen; Wole ȝe be pure maydyn and also Goddys wyff? _Maria._ ffadyr and modyr, if it plesynge to ȝow be, ȝe han mad ȝour avow, so ssothly wole I, To be Goddys chast servaunt whil lyff is in me, But to be Goddys wyff I was nevyr wurthy; I am the sympelest that evyr was born of body. I have herd ȝow seyd God xulde have a modyr swete, That I may leve to se hire, God graunt me for his mercy, And abyl me to ley my handys undyr hire fayr fete.

_Et genuflectet ad Deum._

_Joachym._ I-wys, dowtere, it is wel seyd, ȝe answere and ȝe were twenty ȝere olde. _Anne._ Whith ȝour speche, Mary, I am wel payd, Can ȝe gon alone? lett se beth bolde. _Maria._ To go to Goddys hous wole ȝe now beholde, I am joyful thedyrward, as I may be. _Joachym._ Wyff, I ryght joyful oure dowter to beholde. _Anne._ So am I wys, husbond; now in Goddys name go we! _Joachym._ Sere, prince of prestes, and it plese ȝow, We that were barreyn God hath sent a childe, To offre here to Goddys service we mad oure avow, Here is the same mayde, Mary most mylde. _Isakar._ Joachym, I have good mende how I ȝow revyled, I am ryght joyful that God hath ȝove ȝow this grace, To be amonge fruteful now be ȝe reconsylid, Come, swete Mary, come, ȝe have a gracyous face!

_Joachym flectendo ad Deum, sic dicens_,

_Joachym._ Now, ffadyr, and Sone, and Holy Gost, On God and personys thre! We offre to the, Lorde of myghtes most, Oure dowtere thi servaunt evyr more to be! _Anna._ Ther-to most bounde evyr more be we: Mary, in this holy place leve ȝow we xalle; In Goddys name now up go ȝe! Oure fadyr, oure prest, lo! doth ȝow calle. _Maria._ Modyr, and it plese ȝow, fyrst wole I take my leve Of my fadyr and ȝow my modyr i-wys; I have a fadyr in hefne, this I beleve, Now, good ffadyr, with that fadyr ȝe me blysse! _Joachym._ In nomine Patris et Filii et Spiritus Sancti! _Maria._ Amen! Now ȝe, good modyr. _Anne._ In nomine Patris et Filii et Spiritus Sancti! _Maria._ Amen! _Maria._ Now, oure Lord, thank ȝow for this! Here is my fadyr and my modyr bothe, Most mekely I beseche I may ȝow kys;— Now forȝeve me yf evyr I made ȝow wrothe!

_Et explexendo osculabit patrem et matrem._

_Joachym._ Nay, dowtere, ȝe offendyd nevyr God nor man; Lovyd be that lord ȝow so doth kepe! _Anne._ Swete dowtyr, thynk on ȝour modyr An, ȝour swemynge smytyht to myn hert depe. _Maria._ ffadyr and modyr, I xal pray for ȝow and wepe, To God with al myn hert specyaly; Blysse me day and nyght evyr her ȝe slepe, Good ffadyr and modyr, and be mery. _Joachym._ A! ho had evyr suche a chylde? Nevyr creature ȝit that evyr was bore! Sche is so gracyous, she is so mylde,— So xulde childyr to fadyr and modyr evyr more. _Anne._ Than xulde thei be blyssyd and plese God sore! Husbond, and it plese ȝow not hens go we xal, Tyl Mary be in the temple above thore, I wold not for al erthe se here fal. _Episcopus._ Come, gode Mary, come, babe, I the calle; Thi pas pratyly to this plas pretende, Thou xalt be the dowtere of God eternalle, If the fyftene grees thou may ascende; It is meracle if thou do; now God the dyffende! ffrom Babylony to hevynly Jherusalem this is the way; Every man that thynk his lyf to amende, The fyftene psalmys in memorye of this mayde say, Maria!

_Maria! et sic deinceps usque ad finem quindecim psalmorum._

The fyrst degré gostly applyed, It is holy desyre with God to be, In trobyl to God I have cryed, And in sped that lord hath herde me.

_Ad Dominum cum tribularer clamavi, et exaudivit me._

The secunde is stody with meke inquysissyon veryly, How I xal have knowynge of Godys wylle, To the mownteynes of hefne I have lyfte myn ey, ffrom qwens xal comyn helpe me tylle.

_Levavi oculos meos in montes, unde veniat auxilium mihi._

The thrydde is gladnes in mende in hope to be, That we xalle be savyd alle thus; I am glad of these tydynges ben seyd to me,— Now xal we go into Goddys hous.

_Lætatus sum in hiis, quæ dicta sunt mihi: in domum Domini ibimus._